ശാരീരകോപനിഷത്
ഉപനിഷത്തുകൾ

ശാരീരകോപനിഷത്
തിരുത്തുക


തത്ത്വഗ്രാമോപായസിദ്ധം പരതത്ത്വസ്വരൂപകം .
ശാരീരോപനിഷദ്വേദ്യം ശ്രീരാമബ്രഹ്മ മേ ഗതിഃ ..
ഓം സഹ നാവവതു . സഹ നൗ ഭുനക്തു . സഹ വീര്യം കരവാവഹൈ .
തേജസ്വി നാവധീതമസ്തു . മാ വിദ്വിഷാവഹൈ ..
ഓം ശാന്തിഃ ശാന്തിഃ ശാന്തിഃ ..
ഓം അഥാതഃ പൃഥിവ്യാദിമഹാഭൂതാനാം സമവായം ശരീരം .
യത്കഠിനം സാ പൃഥിവീ യദ്ദ്രവം തദാപോ യദുഷ്ണം തത്തേജോ യത്സഞ്ചരതി
സ വായുര്യത്സുഷിഅരം തദാകാശം
ശ്രോത്രാദീനി ജ്ഞാനേന്ദ്രിയാണി . ശ്രോത്രമാകാശേ വായൗ ത്വഗഗ്നൗ ചക്ഷുരപ്സു
ജിഹ്വാ പൃഥിവ്യാം ഘ്രാണമിതി .
ഏവമിന്ദ്രിയാണാം യഥാക്രമേണ ശബ്ദസ്പർശരൂപരസഗന്ധാശ്ചൈതേ
വിഷയാഃ പൃഥിവ്യാദിമഹാഭൂതേഷു ക്രമേണോത്പന്നാഃ .
വാക്പാണിപാദപായൂപസ്ഥാഖ്യാനി കർമേന്ദ്രിയാണി .
തേഷാം ക്രമേണ വചനാദാനഗമനവിസർഗാനന്ദശ്ചൈതേ വിഷയാഃ
പൃഥിവ്യാദിമഹാഭൂതേഷു ക്രമേണോത്പനാഃ .
മനോബുദ്ധിരഹങ്കാരശ്ചിത്തമത്യന്തഃകരണചതുഷ്ടയം .
തേഷാം ക്രമേണ സങ്കൽപവികൽപാധ്യവസായാഭിമാനാവധാരണാസ്വരൂപശ്ചൈതേ
വിഷയാഃ .
മനഃസ്ഥാനം ഗലാന്തം ബുദ്ധേർവദനമഹങ്കാരസ്യ ഹൃദയം ചിത്തസ്യ നാഭിരിതി .
അസ്ഥിചർമനാഡീരോമമാംസാശ്ചേതി പൃഥിവ്യംശാഃ .
മൂത്രശ്ലേഷ്മരക്തശുക്രസ്വേദാ അബംശാഃ .
ക്ഷുത്തൃഷ്ണാലസ്യമോഹമൈഥുനാന്യഗ്നേഃ .
പ്രചാരണവിലേഖനസ്ഥൂലാക്ഷ്യുന്മേഷനിമേഷാദി വായോഃ .
കാമക്രോധലോഭമോഹഭയാന്യാകാശസ്യ .
ശബ്ദസ്പർശരൂപരസഗന്ധാഃ പൃഥിവീഗുണാഃ .
ശബ്ദസ്പർശരൂപരസാശ്ചാപാം ഗുണാഃ .
ശബ്ദസ്പർശരൂപാണ്യഗ്നിഗുണാഃ .
ശബ്ദസ്പർഷാവിതി വായുഗുണൗ .
ശബ്ദ ഏക ആകാശസ്യ .
സാത്ത്വികരാജസതാമസലക്ഷണാനി ത്രയോ ഗുണാഃ ..
അഹിംസാ സത്യമസ്തേയബ്രഹ്മചര്യാപരിഗ്രഹാഃ .
അക്രോധോ ഗുരുശുശ്രുഷാ ശൗചം സന്തോഷ ആർജവം .. 1..
അമാനിത്വമദംഭിത്വമാസ്തികത്വമഹിംസ്രതാ .
ഏതേ സർവേ ഗുണാ ജ്ഞേയാഃ സാത്ത്വികസ്യ വിശേഷതഃ .. 2..
അഹം കർതാഽസ്മ്യഹം ഭോക്താഽസ്മ്യഹം വക്താഽഭിമാനവാൻ .
ഏതേ ഗുണാ രാജസസ്യ പ്രോച്യന്തേ ബ്രഹ്മവിത്തമൈഃ .. 3..
നിദ്രാലസ്യേ മോഹരാഗൗ മൈഥുനം ചൗര്യമേവ ച .
ഏതേ ഗുണസ്താമസസ്യ പ്രോച്യന്തേ ബ്രഹ്മവാദിഭിഃ .. 4..
ഊർധ്വേ സാത്വികോ മധ്യേ രജസോഽധസ്താമസ ഇതി .
സത്യജ്ഞാനം സാത്ത്വികം . ധർമജ്ഞാനം രാജസം . തിമിരാന്ധം താമസമിതി .
ജാഗ്രത്സ്വപ്നസുഷുപ്തിതുരീയമിതി ചതുർവിധാ അവസ്ഥാഃ .
ജ്ഞാനേന്ദ്രിയകർമേന്ദ്രിയാന്തഃകരണചതുഷ്ടയം ചതുർദശകരണയുക്തം ജാഗ്രത് .
അന്തഃകരണചതുഷ്ടയൈരേവ സംയുക്തഃ സ്വപ്നഃ .
ചിത്തൈകകരണാ സുഷുപ്തിഃ .
കേവലജീവയുക്തമേവ തുരീയമിതി .
ഉന്മീലിതനിമീലിതമധ്യസ്ഥജീവപരമാത്മനോർമധ്യേ ജീവാത്മാ ക്ഷേത്രജ്ഞ ഇതി വിജ്ഞായതേ ..
ബുദ്ധികർമേന്ദ്രിയപ്രാണപഞ്ചകൈർമനസാ ധിയാ .
ശരീരം സപ്തദശഭിഃ സൂക്ഷ്മം തല്ലിംഗമുച്യതേ .. 5..
മനോ ബുദ്ധിരഹങ്കാരഃ ഖാനിലാഗ്നിജലാനി ഭൂഃ .
ഏതാഃ പ്രകൃതയസ്ത്വഷ്ടൗ വികാരാഃ ഷോഡശാപരേ .. 6..
ശ്രോത്രം ത്വക്ചക്ഷുഷീ ജിഹ്വാ ഘ്രാണം ചൈവ തു പഞ്ചമം .
പായൂപസ്ഥൗ കരൗ പാദൗ വാക്ചൈവ ദശമീ മതാ .. 7..
ശബ്ദഃ സ്പർശശ്ച രൂപം ച രസോ ഗന്ധസ്തഥൈവ ച .
ത്രയോവിംശതിരേതാനി തത്ത്വാനി പ്രകൃതാനി തു .
ചതുർവിംശതിരവ്യക്തം പ്രധാനം പുരുഷഃ പരഃ .. 8..
ഇത്യുപനിഷത് ..
ഓം സഹ നാവവതു . സഹ നൗ ഭുനക്തു . സഹ വീര്യം കരവാവഹൈ .
തേജസ്വി നാവധീതമസ്തു . മാ വിദ്വിഷാവഹൈ ..
ഓം ശാന്തിഃ ശാന്തിഃ ശാന്തിഃ ..
.. ഇതി കൃഷ്ണയജുർവേദീയ ശാരീരകോപനിഷത്സമാപ്താ ..