ഉഷഃകാലം നാം എഴുന്നേൽക്കുക പരനേശുവെ സ്തുതിപ്പാൻ
ഉഷഃകാലം നാം എഴുന്നേൽക്കുക
പരനേശുവെ സ്തുതിപ്പാൻ
ഉഷഃകാലം എന്താനന്ദം നമ്മൾ
പ്രിയനൊടടുത്തീടുകിൽ
ഇതുപോലൊരു പ്രഭാതം നമു-
ക്കടുത്തീടുന്നു മനമെ!
ഹാ! എന്താന്ദം നമ്മുടെ പ്രിയൻ
നീതി സുര്യനായ്‌ വരുന്നാൾ
നന്ദിയാലുള്ളം തുടിച്ചീടുന്നു
തള്ളയാമേശു കാരുണ്യം
ഓരോന്നൊരോന്നായ്‌ ധ്യാനിപ്പാനിതു
നല്ല സന്ദർഭമാകുന്നു
ഇന്നലെ ഭൂവിൽ പാർത്തിരുന്നവ-
രെത്ര പേർ ലോകം വിട്ടുപോയ്
എന്നാലൊ നമുക്കൊരുനാൾകൂടെ
പ്രിയനെ പാടി സ്തുതിക്കാം
നഗ്നനായി ഞാൻ ലോകത്തിൽ വന്നു
നഗ്നനായിത്തന്നെ പോകുമെ
ലോകത്തിലെനിക്കില്ലയാതൊന്നും
എന്റെ കൂടന്നു പോരുവാൻ
ഹാ! എൻ പ്രിയന്റെ പ്രേമത്തെയോർ-
ത്തിട്ടാനന്ദം, പരമാനന്ദം!
ഹാ! എൻപ്രിയനാ പുതുവാനഭൂ
ദാനം ചെയ്തതെന്താനന്ദം!
മരുവിൽ നിന്നു പ്രിയന്മേൽ ചാരി
വരുന്നൊരിവൾ ആരുപോൽ
വനത്തിൽ കൂടെ പോകുന്നെ ഞാനും
സ്വന്ത രാജ്യതിൽ ചെല്ലുവാൻ
കൊടുങ്കാറ്റുണ്ടീ വനദേശത്തെൻ
പ്രിയനെ എന്നെ വിടല്ലേ
കൊതിയൊടു ഞാൻ വരുന്നേ-
എന്റെ സങ്കടമങ്ങു തീർക്കണെ!
മൂത്താം‌പാക്കൽ സാധു കൊച്ചു കുഞ്ഞുപദേശി