മറ്റൊരു താരാട്ട്
(പുതിയ ഭരണവ്യവസ്ഥക്കിടാവിനെ തൊട്ടിലിൽക്കിടത്തി പാടുവാൻ വേണ്ടി )
ഓമനപ്പന്നികിടാവോ - നല്ല
കോമാളക്കൊട്ടതൻ പൂവോ?
പാതിരാകൂരിരുൾ കുഞ്ഞോ ?-ചേറിൽ-
പാതി മറഞ്ഞുള്ള പോത്തോ?
കൂറ്റ്നാം മണ്ഡലിപ്പാമ്പോ?-തിന്നാ-
ലേറ്റം ചൊറിയുന്ന ചെമ്പോ?
പാഴൂറ്റരോട്ടക്കലമോ?-പെരി-
ച്ചാഴി തുരന്നാ വിലമോ?
കാലകുസൃതിക്കുടുക്കോ?-കാള -
കാലദോഷത്തിൻ മിടുക്കോ
പൊട്ടക്കുളത്തിലെ ചോറോ?-തരം-
കെട്ടുള്ള ചങ്ങാതി കൂറോ?
വോട്ടുപിടിയന്റെ കാറോ ?-ക്ഷേത്ര-
ക്കൊട്ടിലിൽക്കിട്ടുന്ന ചോറോ?
ഓട്ടുപാത്രത്തിലെ തൈരോ?- സന്ധ്യ-
യ്ക്കൂട്ടുപുരയിലെ മോരോ?
ആവണക്കെണ്ണകുഴമ്പോ? മിസ്ടിക് -
കാവ്യമുളതൻ കഴമ്പോ?
ആർക്കും ലഭിക്കാത്ത വോട്ടോ?-വിഷാ-
ദാത്മകന്മാരുടെ പാട്ടോ?
സാൾട്ട്ശിപായിതൻ കൊട്ടോ?-ദോബി -
യോട്ടുക്കുകീറിയ ഷർട്ടോ?
ആരും തുറക്കാത്ത പൂട്ടോ?-നാല്-
വാരം പഴകിയ പിട്ടോ?
കാലിത്തൊഴുത്തിലെക്കുണ്ടോ?-നല്ല-
കാഞ്ഞിരക്കായതൻ തൊണ്ടോ?
- സഞ്ജയന്റെ ബാലപംക്തിയിൽ കൊടുത്ത കവിത