താൾ:Bhashabharatham Vol1.pdf/409

വൈശമ്പായനൻ പറഞ്ഞു
എന്നുചൊല്ലീട്ടു കൗന്തേയനന്നാ ഭ്രാതാക്കളൊത്തുതാൻ
പുരത്തിൽനിന്നരവിളിപ്പാടു ദൂരത്തു നിന്നുതേ. 14

ദ്രുപദൻ കൗരവന്മാരെക്കണ്ടു ചുറ്റുമെതിർത്തുടൻ
ശരജാലം കൊണ്ടു മോഹിപ്പിച്ചൂ കൗരവസേനയെ. 15

തനിച്ചെതിർത്താശുകാരി യാകുമായവനെത്തദാ
അനേകരൂപനെന്നോർത്തു കൗരവന്മാർ ഭയത്തോടും; 16

ദ്രുപദന്റെ ശരൗഘങ്ങൾ പതറിപ്പാഞ്ഞു ചുറ്റുമേ.
ശംഖും പെരുമ്പറകളുമസംഖ്യം മദ്ദളങ്ങളും 17

മുഴക്കിയന്നേരമേറ്റം പാഞ്ചാലനഗരാന്തരേ.
സിംഹനാദങ്ങളും കൂട്ടി വീരപാഞ്ചാലപുംഗവർ 18

ധനുർജ്ജ്യാതലഘോഷങ്ങളാകാശത്തു നിറഞ്ഞുതേ.
ദുര്യോധനൻ വികർണ്ണൻ സുബാഹുവാദ്ദീർഘലോചനൻ 19

ദുശ്ശാസനനുമവ്വണ്ണം ചൊടിച്ചമ്പുകൾ തൂകിനാർ.
ഏറ്റമമ്പേറ്റു വില്ലാളി പാർഷതൻ രണദുർജ്ജയൻ 20

മർദ്ദിച്ചാനാസ്സൈന്യമെല്ലാമത്തവ്വിൽത്തന്നേ ഭാരത !
ദുര്യോധനൻ കർണ്ണനേവം വികർണ്ണൻ മുറ്റുമിങ്ങനെ 21

നാനാ നൃപസുതന്മാരെസ്സേനാനിരകളൊത്തഹോ !
അലാതചക്രഭ്രമണംപോലേറ്റമ്പെയ്തു മൂടിനാൻ. 22

നാട്ടാരെല്ലാം മുസലവും യഷ്ടിയും മറ്റുമങ്ങുടൻ
കൗരവന്മാരിൽ വർഷിച്ചൂ കാറു വർഷിച്ചിടുംപടി; 23

ആബാലവൃദ്ധം പൗരന്മാർ കൗരവന്മാരൊടേററുതേ.
പോർത്തും തുമുലമാം യുദ്ധം പാർത്തു കൗരവരൊത്തുടൻ 24

കൂടിയാർത്തു വിളിച്ചുംകൊണ്ടോടിനാർ പാണ്ഡവാന്തികേ.
ലോമഹർഷണമാമാർത്തനാദം കേട്ടഥ പാണ്ഡവർ 25

ദ്രോണാഭിവാദ്യവും ചെയ്തുതാനാരാൽ തേരിലേറിനാർ.
യുദ്ധം ചെയ്യായ്കെന്നു ധർമ്മപുത്രനെത്താൻ തടഞ്ഞുടൻ 26

മാദ്രേയരെച്ചക്രരക്ഷന്മാരാക്കിക്കൊണ്ടിതർജ്ജുനൻ;
സേനത്തലയ്ക്കലായ് ഭീമസേനൻ നിന്നൂ ഗദാധരൻ. 27


എതിർ വീരരവം കേട്ടാ ഭ്രാതൃയോഗത്തൊടൊത്തുടൻ
തേരോടിച്ചു മുഴക്കിച്ചെന്നേറീ കുന്തീകുമാരകൻ. 28

കടഞ്ഞ കടൽ പോലാർത്തേറ്റിടും പാഞ്ചാലസേനയിൽ
ഹന്ത! ഭീമൻ ദണ്ഡുമേന്തിയന്തകൻ കയറുംവിധം 29

കയറീ, കടലിൽ ഘോരമകരം കേറിടുംപടി
താനേറിയാനപ്പടിയിൽത്താനേ ഭീമൻ ഗദാധരൻ 30