ഈ താളിൽ തെറ്റുതിരുത്തൽ വായന ഉണ്ടായിട്ടില്ല
൨൦൨ ആധുനികഗദ്യസാഹിത്യം സകർത്താവും Dream Children എന്നതുപോലെയുള്ള ഒരു ഉപന്യാസവും എന്നാണു് നമ്മുടെ ഭാഷയിലുണ്ടാവുക !
മേൽ പ്രസ്താവിച്ച സാഹിത്യവിഭാഗങ്ങളെല്ലാം സൃഷ്ടിപരമായ മനോവ്യാപാരത്തിന്റെ ഫലങ്ങളാണു് . ഗദ്യത്തിനു് സൃഷ്ടി വിമർശനം ഇങ്ങനെ രണ്ടു ധർമ്മങ്ങളുണ്ടു് . വിമർശനപ്രധാനമായ കൃതികളിൽ സാഹിത്യനിരൂപണം , കലാനിരൂപണം , ദേശചരിത്രം , ജീവചരിത്രം , സാഹിത്യഗുണമുള്ള ശാസ്ത്രീയപ്രബന്ധങ്ങൾ , സഞ്ചാരകഥകൾ , ആത്മകഥാകഥനം , ലോകവ്യവഹാരചർച്ച , ഇങ്ങനെ പലതും ഉൾപ്പെടുന്നു. ഇവയോരോന്നിനെക്കുറിച്ചും എന്തെങ്കിലും പറയാമെന്നുവെച്ചാൽ , അവസരം പറ്റിയതാണെങ്കിലും ശ്രോതാക്കളുടെ ക്ഷമയ്ക്കും ഒരതിരുണ്ടല്ലോ . സാഹിത്യനിരൂപണത്തെക്കുറിച്ചു മാത്രം രണ്ടുവാക്കു പറഞ്ഞു പ്രകൃതം സമാപിക്കാം. ജന്തുക്കൾക്കെല്ലാം ബഹിർല്ലോകഗ്രഹണത്തിനു പര്യാപ്തമായ ഇന്ദ്രീയങ്ങളുണ്ടെങ്കിലും മനുഷ്യനു മാത്രമേ അന്തർമ്മുഖമായ ബുദ്ധിവ്യാപാരംകൊണ്ടു തന്നെപ്പറ്റിത്തന്നെ ഓരോന്നു മനസ്സിലാക്കാൻ കഴിവുള്ളു. ഈ സാമർത്ഥ്യവിശേഷം മനുഷ്യന്റെ വിശിഷ്ടസൃഷ്ടിയായ സാഹിത്യത്തിലും പ്രയോഗിക്കപ്പെടുന്നതിന്റെ ഫലമാണു് സാഹിത്യനിരൂപണം. ഒരു ശ്ലോകം ഉദ്ധരിച്ചു ' ഹ'! എത്ര ലളിതകോമളമായിരിക്കുന്നു ! എത്ര പുളകോൽഗമകാരിയായ വചഃ:പ്രസരം ! എന്നൊക്കെ അത്ഭുതപ്പെടുകയോ മറ്റൊരു ശ്ലോകം ഉദ്ധരിച്ച് അതിലെ യതിഭംഗം ചൂണ്ടിക്കാണിക്കുകയോ ചെയ്താൽ അതുപര്യാപ്തമായ സാഹിത്യനിരൂപണമാകയില്ല . ശ്ലോകം ചൊല്ലി വിഗ്രഹിച്ച് അർത്ഥംപറഞ്ഞു് , വൃത്തവും വൃത്തലക്ഷണവും നിശ്ചയിച്ച് , അലങ്കാരം ഏതുവകുപ്പിലാണു് പെടുത്തേണ്ടതെന്നു പ്രദിപാതിച്ചുകൊണ്ടുള്ള രീതിയിലാണു് ഉയർന്നക്ലാസുകളിൽപ്പോലും ഇന്നു സാഹിത്യനിരൂപണം ചെയ്യാൻ കോളേജ് വിദ്യാർത്ഥികളെ പഠിപ്പിച്ചുവരുന്നതു് . പാവപ്പെട്ട അധ്യാപകന്മാർ എന്തു പിഴച്ചു ? ചോദ്യക്കടലാസ്സിലും ഈ
-
ഈ താൾ വിക്കിഗ്രന്ഥശാല ഡിജിറ്റൈസേഷൻ മത്സരം 2014-ന്റെ ഭാഗമായി സ്കൂൾ ഐടി ക്ലബ്ബിലെ വിദ്യാർഥികൾ നിർമ്മിച്ചതാണ്.