താൾ:Subhashitharathnakaram-patham-pathipp-1953.pdf/119

രണ്ടാം പ്രകരണം

ചൊല്ലാർന്നീടുന്ന മുല്ലത്തറയിലമരുമ-

ക്കല്ലിലും നല്ലസൌര-

ഭ്യോല്ലാസം ചെറ്റതിൻ പൂമ്പൊടികളണകയാൽ

ചെല്ലുമാറില്ലയോവാൻ?

സുഖം.

സ്വാതന്ത്ര്യം, പൂർണ്ണമാകും സ്വഭരണ, മഥ ദുർ-

ഭീതിയില്ലായ്മ, യെന്ന-

ല്ലാതങ്കം ദുസ്സഹം വന്നിടുകിലുമിളകാ-

തുള്ള നൽശാന്തഭാവം,

ചേതസ്സംതൃപ്തിയെന്നുള്ളിതുകളിൽ നിവസി-

ക്കുന്നു സൌഖ്യം, നിനയ്ക്കിൽ

സ്ഫിതം ദ്രവ്യം പ്രതാപം ബലമിതുകളില-

ല്ലായതിനുള്ള വാസം

സുഭാഷിതം.

സുഭാഷിതമയം ദ്രവ്യം സംഭരിക്കാത്ത പൂരുഷൻ

പ്രസംഗയാഗകാലത്തിലെന്തു ദക്ഷിണ നൽകിടും?

പാരിൽ മൂന്നാണു രത്നങ്ങൾ സൂക്തി പാനീയ മന്നവും;

മൂഢന്മാരശ്മഖണ്ഡത്തെ രത്നമെന്നരുളുന്നിതേ.

അവസരമതിലുരചെയ്വാ-

നരിയ സുഭാഷിതമറിഞ്ഞിടാത്ത പുമാൻ

പടുബുദ്ധികളുടെയിടയിൽ

പടമെന്നതുപോലെതന്നെ ശോഭിക്കും.

സ്ത്രീവിദ്യാഭ്യാസം.

കുട്ടിക്കു ബാല്യമതിൽ വേണ്ട വിവേകമേകി-

പുഷ്ടിപ്പെടുത്തുവതിനും, ദയിതന്റെ കാര്യം

ഇഷ്ടാനുകൂലമഖിലം നിറവേറ്റുവാനും

മട്ടാർന്നവാണികളിൽ വിദ്യ വിശേഷഹേതു.

ഉണ്ടാകുന്ന സുതർക്കു ബാല്യമതിലേ-

യോരോ പദാർത്ഥം മുദാ

ചൂണ്ടിക്കാട്ടിയതിന്റെ തത്വമഖിലം

നന്നായറിഞ്ഞീടുവാൻ

വേണ്ടും വണ്ണമുരയ്പതിന്നു പകരം

മൂഢാംഗനാ സന്തതം

വേണ്ടാതുള്ളൊരു ദുർവചസ്സു കളവും

ദുർബോധവും ചേർത്തിടും