മഹാഭാരതം മൂലം/അശ്വമേധികപർവം/അധ്യായം96

മഹാഭാരതം മൂലം/അശ്വമേധികപർവം
രചന:വ്യാസൻ
അധ്യായം96

1 [ജ്]
     കോ ഽസൗ നകുല രൂപേണ ശിരസാ കാഞ്ചനേന വൈ
     പ്രാഹ മാനുഷവദ് വാചം ഏതത് പൃഷ്ടോ വദസ്വ മേ
2 [വ്]
     ഏതത് പൂർവം ന പൃഷ്ടോ ഽഹം ന ചാസ്മാഭിഃ പ്രഭാഷിതം
     ശ്രൂയതാം നകുലോ യോ ഽസൗ യഥാ വാഗ് അസ്യ മാനുഷീ
3 ശ്രാദ്ധം സങ്കൽപയാം ആസ ജമദഗ്നിഃ പുരാ കില
     ഹോമധേനുസ് തം ആഗാച് ച സ്വയം ചാപി ദുദോഹ താം
4 തത് ക്ഷീരം സ്ഥാപയാം ആസ നവേ ഭാണ്ഡേ ദൃഢേ ശുചൗ
     തച് ച ക്രോധഃ സ്വരൂപേണ പിഠരം പര്യവർതയത്
5 ജിജ്ഞാസുസ് തം ഋഷിശ്രേഷ്ഠം കിം കുര്യാദ് വിപ്രിയേ കൃതേ
     ഇതി സഞ്ചിന്ത്യ ദുർമേധാ ധർഷയാം ആസ തത് പയഃ
6 തം ആജ്ഞായ മുനിഃ ക്രോധം നൈവാസ്യ ചുകുപേ തതഃ
     സ തു ക്രോധസ് തം ആഹേദം പ്രാഞ്ജലിർ മൂർതിമാൻ സ്ഥിതഃ
7 ജിതോ ഽസ്മീതി ഭൃഗുശ്രേഷ്ഠ ഭൃഗവോ ഹ്യ് അതിരോഷണാഃ
     ലോകേ മിഥ്യാ പ്രവാദോ ഽയം യത് ത്വയാസ്മി പരാജിതഃ
8 സോ ഽഹം ത്വയി സ്ഥിതോ ഹ്യ് അദ്യ ക്ഷമാവതി മഹാത്മനി
     ബിഭേമി തപസഃ സാധോ പ്രസാദം കുരു മേ വിഭോ
9 [ജ്]
     സാക്ഷാദ് ദൃഷ്ടോ ഽസി മേ ക്രോധ ഗച്ഛ ത്വം വിഗതജ്വരഃ
     ന മമാപകൃതം തേ ഽദ്യ ന മന്യുർ വിദ്യതേ മമ
10 യാൻ ഉദ്ധിശ്യ തു സങ്കൽപഃ പയസോ ഽസ്യ കൃതോ മയാ
    പിതരസ് തേ മഹാഭാഗാസ് തേഭ്യോ ബുധ്യസ്വ ഗമ്യതാം
11 ഇത്യ് ഉക്തോ ജാതസന്ത്രാസഃ സ തത്രാന്തർ അധീയത
    പിതൄണാം അഭിഷംഗാത് തു നകുലത്വം ഉപാഗതഃ
12 സ താൻ പ്രസാദയാം ആസ ശാപസ്യാന്തോ ഭവേദ് ഇതി
    തൈശ് ചാപ്യ് ഉക്തോ യദാ ധർമം ക്ഷേപ്സ്യസേ മോക്ഷ്യസേ തദാ
13 തൈശ് ചോക്തോ യജ്ഞിയാൻ ദേശാൻ ധർമാരണ്യാനി ചൈവ ഹ
    ജുഗുപ്സൻ പരിധാവൻ സ യജ്ഞം തം സമുപാസദത്
14 ധർമപുത്രം അഥാക്ഷിപ്യ സക്തു പ്രസ്ഥേന തേന സഃ
    മുക്തഃ ശാപാത് തതഃ ക്രോധോ ധർമോ ഹ്യ് ആസീദ് യുധിഷ്ഠിരഃ
15 ഏവം ഏതത് തദാ വൃത്തം തസ്യ യജ്ഞേ മഹാത്മനഃ
    പശ്യതാം ചാപി നസ് തത്ര നകുലോ ഽന്തർഹിതസ് തദാ