മഹാഭാരതം മൂലം/ആശ്രമവാസികപർവം/അധ്യായം47

മഹാഭാരതം മൂലം/ആശ്രമവാസികപർവം
രചന:വ്യാസൻ
അധ്യായം47

1 [നാരദ]
     നാസൗ വൃഥാഗ്നിനാ ദഗ്ധോ യഥാ തത്ര ശ്രുതം മയാ
     വൈചിത്രവീര്യോ നൃപതിസ് തത് തേ വക്ഷ്യാമി ഭാരത
2 വനം പ്രവിശതാ തേന വായുഭക്ഷേണ ധീമതാ
     അഗ്നയഃ കാരയിത്വേഷ്ടിം ഉത്സൃഷ്ടാ ഇതി നഃ ശ്രുതം
3 യാജകാസ് തു തതസ് തസ്യ താൻ അഗ്നീൻ നിർജനേ വനേ
     സമുത്സൃജ്യ യഥാകാമം ജഗ്മുർ ഭരതസത്തമ
4 സ വിവൃദ്ധസ് തദാ വഹ്നിർ വനേ തസ്മിന്ന് അഭൂത് കില
     തേന തദ് വനം ആദീപ്തം ഇതി മേ താപസാബ്രുവൻ
5 സ രാജാ ജാഹ്നവീ കച്ഛേ യഥാ തേ കഥിതം മയാ
     തേനാംഗിനാ സമായുക്തഃ സ്വേനൈവ ഭരതർഷഭ
6 ഏവം ആവേദയാം ആസുർ മുനയസ് തേ മമാനഘ
     യേ തേ ഭാഗീരഥീ തീരേ മയാ ദൃഷ്ടാ യുധിഷ്ഠിര
7 ഏവം സ്വേനാഗ്നിനാ രാജാ സമായുക്തോ മഹീപതേ
     മാ ശോചിഥാസ് ത്വം നൃപതിം ഗതഃ സ പരമാം ഗതിം
8 ഗുരുശുശ്രൂഷയാ ചൈവ ജനനീ തവ പാണ്ഡവ
     പ്രാപ്താ സുമഹതീം സിദ്ധിം ഇതി മേ നാത്ര സംശയഃ
9 കർതും അർഹസി കൗരവ്യ തേഷാം ത്വം ഉദകക്രിയാം
     ഭ്രാതൃഭിഃ സഹിതഃ സർവൈർ ഏതദ് അത്ര വിധീയതാം
10 [വൈ]
    തഥാ സ പൃഥിവീപാലഃ പാണ്ഡവാനാം ധുരന്ധരഃ
    നിര്യയൗ സഹ സോദര്യൈഃ സദാരോ ഭരതർഷഭ
11 പൗരജാന പദാശ് ചൈവ രാജഭക്തിപുരസ്കൃതാഃ
    ഗംഗാം പ്രജഗ്മുർ അഭിതോ വാസസൈകേന സംവൃതാഃ
12 തതോ ഽവഗാഹ്യ സലിലം സർവേ തേ കുരുപുംഗവാഃ
    യുയുത്സും അഗ്രതഃ കൃത്വാ ദദുസ് തോയം മഹാത്മനേ
13 ഗാന്ധാര്യാശ് ച പൃഥായാശ് ച വിധിവൻ നാമഗോത്രതഃ
    ശൗചം നിവർതയന്തസ് തേ തത്രോഷുർ നഗരാദ് ബഹിഃ
14 പ്രേഷയാം ആസ സ നരാൻ വിധിജ്ഞാനാപ്ത കാരിണഃ
    ഗംഗാ ദ്വാരം കുരുശ്രേഷ്ഠോ യത്ര ദഗ്ധോ ഽഭവൻ നൃപഃ
15 തത്രൈവ തേഷാം കുല്യാനി ഗംഗാ ദ്വാരേ ഽന്വശാത് തദാ
    കർതവ്യാനീതി പുരുഷാൻ ദത്തദേയാൻ മഹീപതിഃ
16 ദ്വാദശേ ഽഹനി തേഭ്യഃ സ കൃതശൗചോ നരാധിപഃ
    ദദൗ ശ്രാദ്ധാനി വിധിവദ് ദക്ഷിണാവന്തി പാണ്ഡവഃ
17 ധൃതരാഷ്ട്രം സമുദ്ദിശ്യ ദദൗ സ പൃഥിവീപതിഃ
    സുവർണം രജതം ഗാശ് ച ശയ്യാശ് ച സുമഹാധനാഃ
18 ഗാന്ധാര്യാശ് ചൈവ തേജസ്വീ പൃഥായാശ് ച പൃഥക് പൃഥക്
    സങ്കീർത്യ നാമനീ രാജാ ദദൗ ദാനം അനുത്തമം
19 യോ യദ് ഇച്ഛതി യാവച് ച താവത് സ ലഭതേ ദ്വിജഃ
    ശയനം ഭോജനം യാനം മണിരത്നം അഥോ ധനം
20 യാനം ആച്ഛാദനം ഭോഗാൻ ദാസീശ് ച പരിചാരികാഃ
    ദദൗ രാജാ സമുദ്ദിശ്യ തയോർ മാത്രോർ മഹീപതിഃ
21 തതഃ സ പൃഥിവീപാലോ ദത്ത്വാ ശ്രാദ്ധാന്യ് അനേകശഃ
    പ്രവിവേശ പുനർ ധീമാൻ നഗരം വാരണാഹ്വയം
22 തേ ചാപി രാജവചനാത് പുരുഷാ യേ ഗതാഭവൻ
    സങ്കൽപ്യ തേഷാം കുല്യാനി പുനഃ പ്രത്യാഗമംസ് തതഃ
23 മാല്യൈർ ഗന്ധൈശ് ച വിവിധൈഃ പൂജയിത്വാ യഥാവിധി
    കുല്യാനി തേഷാം സംയോജ്യ തദാചഖ്യുർ മഹീപതേഃ
24 സമാശ്വാസ്യ ച രാജാനം ധർമാത്മാനം യുധിഷ്ഠിരം
    നാരദോ ഽപ്യ് അഗമദ് രാജൻ പരമർഷിർ യഥേപ്സിതം
25 ഏവം വർഷാണ്യ് അതീതാനി ധൃതരാഷ്ട്രസ്യ ധീമതഃ
    വനവാസേ തദാ ത്രീണി നഗരേ ദശ പഞ്ച ച
26 ഹതപുത്രസ്യ സംഗ്രാമേ ദാനാനി ദദതഃ സദാ
    ജ്ഞാതിസംബന്ധിമിത്രാണാം ഭ്രാതൄണാം സ്വജനസ്യ ച
27 യുധിഷ്ഠിരസ് തു നൃപതിർ നാതിപ്രീത മനാസ് തദാ
    ധാരയാം ആസ തദ് രാജ്യം നിഹതജ്ഞാതിബാന്ധവഃ