മഹാഭാരതം മൂലം/ഉദ്യോഗപർവം/അധ്യായം79
| ←അധ്യായം78 | മഹാഭാരതം മൂലം/ഉദ്യോഗപർവം രചന: അധ്യായം79 |
അധ്യായം80→ |
1 [സഹദേവ]
യദ് ഏതത് കഥിതം രാജ്ഞാ ധർമ ഏഷ സനാതനഃ
യഥാ തു യുദ്ധം ഏവ സ്യാത് തഥാ കാര്യം അരിന്ദമ
2 യദി പ്രശമം ഇച്ഛേയുഃ കുരവഃ പാണ്ഡവൈഃ സഹ
തഥാപി യുദ്ധം ദാശാർഹ യോജയേഥാഃ സഹൈവ തൈഃ
3 കഥം നു ദൃഷ്ട്വാ പാഞ്ചാലീം തഥാ ക്ലിഷ്ടാം സഭാ ഗതാം
അവധേന പ്രശാമ്യേത മമ മന്യുഃ സുയോധനേ
4 യദി ഭീമാർജുനൗ കൃഷ്ണ ധർമരാജശ് ച ധാർമികഃ
ധർമം ഉത്സൃജ്യ തേനാഹം യോദ്ധും ഇച്ഛാമി സംയുഗേ
5 [സാത്യകി]
സത്യം ആഹ മഹാബാഹോ സഹദേവോ മഹാമതിഃ
ദുര്യോധന വധേ ശാന്തിസ് തസ്യ കോപസ്യ മേ ഭവേത്
6 ജാനാസി ഹി യഥാദൃഷ്ട്വാ ചീരാജിനധരാൻ വനേ
തവാപി മന്യുർ ഉദ്ഭൂതോ ദുഃഖിതാൻ പ്രേക്ഷ്യ പാണ്ഡവാൻ
7 തസ്മാൻ മാദ്രീ സുതഃ ശൂരോ യദ് ആഹ പുരുഷർഷഭഃ
വചനം സർവയോധാനാം തൻ മതം പുരുഷോത്തമ
8 [വ്]
ഏവം വദതി വാക്യം തു യുയുധാനേ മഹാമതൗ
സുഭീമഃ സിംഹനാദോ ഽഭൂദ് യോധാനാം തത്ര സർവശഃ
9 സർവേ ഹി സർവതോ വീരാസ് തദ് വചഃ പ്രത്യപൂജയൻ
സാധു സാധ്വ് ഇതി ശൈനേയം ഹർഷയന്തോ യുയുത്സവഃ