മഹാഭാരതം മൂലം/കർണപർവം/അധ്യായം25
| ←അധ്യായം24 | മഹാഭാരതം മൂലം/കർണപർവം രചന: അധ്യായം25 |
അധ്യായം26→ |
1 [ദുർ]
ഏവം സ ഭഗവാൻ ദേവഃ സർവലോകപിതാമഹഃ
സാരഥ്യം അകരോത് തത്ര യത്ര രുദ്രോ ഽഭവദ് രഥീ
2 രഥിനാഭ്യധികോ വീരഃ കർതവ്യോ രഥസാരഥിഃ
തസ്മാത് ത്വം പുരുഷവ്യാഘ്ര നിയച്ഛ തുരഗാൻ യുധി
3 [സ്]
തതഃ ശല്യഃ പരിഷ്വജ്യ സുതം തേ വാക്യം അബ്രവീത്
ദുര്യോധനം അമിത്രഘ്നഃ പ്രീതോ മദ്രാധിപസ് തദാ
4 ഏവം ചേൻ മന്യസേ രാജൻ ഗാന്ധാരേ പ്രിയദർശന
തസ്മാത് തേ യത് പ്രിയം കിം ചിത് തത് സർവം കരവാണ്യ് അഹം
5 യത്രാസ്മി ഭരതശ്രേഷ്ഠ യോഗ്യഃ കർമണി കർഹി ചിത്
തത്ര സർവാത്മനാ യുക്തോ വക്ഷ്യേ കാര്യധുരം തവ
6 യത് തു കർണം അഹം ബ്രൂയാം ഹിതകാമഃ പ്രിയാപ്രിയം
മമ തത്ക്ഷമതാം സർവം ഭവാൻ കർണശ് ച സർവശഃ
7 [കർണ]
ഈശാനസ്യ യഥാ ബ്രഹ്മാ യഥാ പാർഥസ്യ കേശവഃ
തഥാ നിത്യം ഹിതേ യുക്തോ മദ്രരാജഭജസ്വ നഃ
8 [ഷല്യ]
ആത്മനിന്ദാത്മപൂജാ ച പരനിന്ദാ പരസ്തവഃ
അനാചരിതം ആര്യാണാം വൃത്തം ഏതച് ചതുർവിധം
9 യത് തു വിദ്വാൻ പ്രവക്ഷ്യാമി പ്രത്യയാർഥം അഹം തവ
ആത്മനഃ സ്തവസംയുക്തം തൻ നിബോധ യഥാതഥം
10 അഹം ശക്രസ്യ സാരഥ്യേ യോഗ്യോ മാതലിവത് പ്രഭോ
അപ്രമാദ പ്രയോഗാച് ച ജ്ഞാനവിദ്യാ ചികിത്സിതൈഃ
11 തതഃ പാർഥേന സംഗ്രാമേ യുധ്യമാനസ്യ തേ ഽനഘ
വാഹയിഷ്യാമി തുരഗാൻ വിജ്വരോ ഭവ സൂതജ