മഹാഭാരതം മൂലം/ഭീഷ്മപർവം/അധ്യായം33
| ←അധ്യായം32 | മഹാഭാരതം മൂലം/ഭീഷ്മപർവം രചന: അധ്യായം33 |
അധ്യായം34→ |
1 അർജുന ഉവാച
മദനുഗ്രഹായ പരമം ഗുഹ്യം അധ്യാത്മസഞ്ജ്ഞിതം
യത് ത്വയോക്തം വചസ് തേന മോഹോ ഽയം വിഗതോ മമ
2 ഭവാപ്യയൗ ഹി ഭൂതാനാം ശ്രുതൗ വിസ്തരശോ മയാ
ത്വത്തഃ കമലപത്രാക്ഷ മാഹാത്മ്യം അപി ചാവ്യയം
3 ഏവം ഏതദ് യഥാത്ഥ ത്വം ആത്മാനം പരമേശ്വര
ദ്രഷ്ടും ഇച്ഛാമി തേ രൂപം ഐശ്വരം പുരുഷോത്തമ
4 മന്യസേ യദി തച് ഛക്യം മയാ ദ്രഷ്ടും ഇതി പ്രഭോ
യോഗേശ്വര തതോ മേ ത്വം ദർശയാത്മാനം അവ്യയം
5 ശ്രീഭഗവാൻ ഉവാച
പശ്യ മേ പാർഥ രൂപാണി ശതശോ ഽഥ സഹസ്രശഃ
നാനാവിധാനി ദിവ്യാനി നാനാവർണാകൃതീനി ച
6 പശ്യാദിത്യാൻ വസൂൻ രുദ്രാൻ അശ്വിനൗ മരുതസ് തഥാ
ബഹൂന്യ് അദൃഷ്ടപൂർവാണി പശ്യാശ്ചര്യാണി ഭാരത
7 ഇഹൈകസ്ഥം ജഗത് കൃത്സ്നം പശ്യാദ്യ സചരാചരം
മമ ദേഹേ ഗുഡാകേശ യച് ചാന്യദ് ദ്രഷ്ടും ഇച്ഛസി
8 ന തു മാം ശക്യസേ ദ്രഷ്ടും അനേനൈവ സ്വചക്ഷുഷാ
ദിവ്യം ദദാമി തേ ചക്ഷുഃ പശ്യ മേ യോഗം ഐശ്വരം
9 സഞ്ജയ ഉവാച
ഏവം ഉക്ത്വാ തതോ രാജൻ മഹായോഗേശ്വരോ ഹരിഃ
ദർശയാം ആസ പാർഥായ പരമം രൂപം ഐശ്വരം
10 അനേകവക്ത്രനയനം അനേകാദ്ഭുതദർശനം
അനേകദിവ്യാഭരണം ദിവ്യാനേകോദ്യതായുധം
11 ദിവ്യമാല്യാംബരധരം ദിവ്യഗന്ധാനുലേപനം
സർവാശ്ചര്യമയം ദേവം അനന്തം വിശ്വതോമുഖം
12 ദിവി സൂര്യസഹസ്രസ്യ ഭവേദ് യുഗപദ് ഉത്ഥിതാ
യദി ഭാഃ സദൃശീ സാ സ്യാദ് ഭാസസ് തസ്യ മഹാത്മനഃ
13 തത്രൈകസ്ഥം ജഗത് കൃത്സ്നം പ്രവിഭക്തം അനേകധാ
അപശ്യദ് ദേവദേവസ്യ ശരീരേ പാണ്ഡവസ് തദാ
14 തതഃ സ വിസ്മയാവിഷ്ടോ ഹൃഷ്ടരോമാ ധനഞ്ജയഃ
പ്രണമ്യ ശിരസാ ദേവം കൃതാഞ്ജലിർ അഭാഷത
15 അർജുന ഉവാച
പശ്യാമി ദേവാംസ് തവ ദേവ ദേഹേ; സർവാംസ് തഥാ ഭൂതവിശേഷസംഘാൻ
ബ്രഹ്മാണം ഈശം കമലാസനസ്ഥം; ഋഷീംശ് ച സർവാൻ ഉരഗാംശ് ച ദിവ്യാൻ
16 അനേകബാഹൂദരവക്ത്രനേത്രം; പശ്യാമി ത്വാ സർവതോ ഽനന്തരൂപം
നാന്തം ന മധ്യം ന പുനസ് തവാദിം; പശ്യാമി വിശ്വേശ്വര വിശ്വരൂപ
17 കിരീടിനം ഗദിനം ചക്രിണം ച; തേജോരാശിം സർവതോ ദീപ്തിമന്തം
പശ്യാമി ത്വാം ദുർനിരീക്ഷ്യം സമന്താദ്; ദീപ്താനലാർകദ്യുതിം അപ്രമേയം
18 ത്വം അക്ഷരം പരമം വേദിതവ്യം; ത്വം അസ്യ വിശ്വസ്യ പരം നിധാനം
ത്വം അവ്യയഃ ശാശ്വതധർമഗോപ്താ; സനാതനസ് ത്വം പുരുഷോ മതോ മേ
19 അനാദിമധ്യാന്തം അനന്തവീര്യം; അനന്തബാഹും ശശിസൂര്യനേത്രം
പശ്യാമി ത്വാം ദീപ്തഹുതാശവക്ത്രം; സ്വതേജസാ വിശ്വം ഇദം തപന്തം
20 ദ്യാവാപൃഥിവ്യോർ ഇദം അന്തരം ഹി; വ്യാപ്തം ത്വയൈകേന ദിശശ് ച സർവാഃ
ദൃഷ്ട്വാദ്ഭുതം രൂപം ഇദം തവോഗ്രം; ലോകത്രയം പ്രവ്യഥിതം മഹാത്മൻ
21 അമീ ഹി ത്വാ സുരസംഘാ വിശന്തി; കേ ചിദ് ഭീതാഃ പ്രാഞ്ജലയോ ഗൃണന്തി
സ്വസ്തീത്യ് ഉക്ത്വാ മഹർഷിസിദ്ധസംഘാഃ; സ്തുവന്തി ത്വാം സ്തുതിഭിഃ പുഷ്കലാഭിഃ
22 രുദ്രാദിത്യാ വസവോ യേ ച സാധ്യാ; വിശ്വേ ഽശ്വിനൗ മരുതശ് ചോഷ്മപാശ് ച
ഗന്ധർവയക്ഷാസുരസിദ്ധസംഘാ; വീക്ഷന്തേ ത്വാം വിസ്മിതാശ് ചൈവ സർവേ
23 രൂപം മഹത് തേ ബഹുവക്ത്രനേത്രം; മഹാബാഹോ ബഹുബാഹൂരുപാദം
ബഹൂദരം ബഹുദംഷ്ട്രാകരാലം; ദൃഷ്ട്വാ ലോകാഃ പ്രവ്യഥിതാസ് തഥാഹം
24 നഭഃസ്പൃശം ദീപ്തം അനേകവർണം; വ്യാത്താനനം ദീപ്തവിശാലനേത്രം
ദൃഷ്ട്വാ ഹി ത്വാം പ്രവ്യഥിതാന്തരാത്മാ; ധൃതിം ന വിന്ദാമി ശമം ച വിഷ്ണോ
25 ദംഷ്ട്രാകരാലാനി ച തേ മുഖാനി; ദൃഷ്ട്വൈവ കാലാനലസംനിഭാനി
ദിശോ ന ജാനേ ന ലഭേ ച ശർമ; പ്രസീദ ദേവേശ ജഗന്നിവാസ
26 അമീ ച ത്വാം ധൃതരാഷ്ട്രസ്യ പുത്രാഃ; സർവേ സഹൈവാവനിപാലസംഘൈഃ
ഭീഷ്മോ ദ്രോണഃ സൂതപുത്രസ് തഥാസൗ; സഹാസ്മദീയൈർ അപി യോധമുഖ്യൈഃ
27 വക്ത്രാണി തേ ത്വരമാണാ വിശന്തി; ദംഷ്ട്രാകരാലാനി ഭയാനകാനി
കേ ചിദ് വിലഗ്നാ ദശനാന്തരേഷു; സന്ദൃശ്യന്തേ ചൂർണിതൈർ ഉത്തമാംഗൈഃ
28 യഥാ നദീനാം ബഹവോ ഽംബുവേഗാഃ; സമുദ്രം ഏവാഭിമുഖാ ദ്രവന്തി
തഥാ തവാമീ നരലോകവീരാ; വിശന്തി വക്ത്രാണ്യ് അഭിവിജ്വലന്തി
29 യഥാ പ്രദീപ്തം ജ്വലനം പതംഗാ; വിശന്തി നാശായ സമൃദ്ധവേഗാഃ
തഥൈവ നാശായ വിശന്തി ലോകാസ്; തവാപി വക്ത്രാണി സമൃദ്ധവേഗാഃ
30 ലേലിഹ്യസേ ഗ്രസമാനഃ സമന്താൽ; ലോകാൻ സമഗ്രാൻ വദനൈർ ജ്വലദ്ഭിഃ
തേജോഭിർ ആപൂര്യ ജഗത് സമഗ്രം; ഭാസസ് തവോഗ്രാഃ പ്രതപന്തി വിഷ്ണോ
31 ആഖ്യാഹി മേ കോ ഭവാൻ ഉഗ്രരൂപോ; നമോ ഽസ്തു തേ ദേവവര പ്രസീദ
വിജ്ഞാതും ഇച്ഛാമി ഭവന്തം ആദ്യം; ന ഹി പ്രജാനാമി തവ പ്രവൃത്തിം
32 ശ്രീഭഗവാൻ ഉവാച
കാലോ ഽസ്മി ലോകക്ഷയകൃത് പ്രവൃദ്ധോ; ലോകാൻ സമാഹർതും ഇഹ പ്രവൃത്തഃ
ഋതേ ഽപി ത്വാ ന ഭവിഷ്യന്തി സർവേ; യേ ഽവസ്ഥിതാഃ പ്രത്യനീകേഷു യോധാഃ
33 തസ്മാത് ത്വം ഉത്തിഷ്ഠ യശോ ലഭസ്വ; ജിത്വാ ശത്രൂൻ ഭുങ്ക്ഷ്വ രാജ്യം സമൃദ്ധം
മയൈവൈതേ നിഹതാഃ പൂർവം ഏവ; നിമിത്തമാത്രം ഭവ സവ്യസാചിൻ
34 ദ്രോണം ച ഭീഷ്മം ച ജയദ്രഥം ച; കർണം തഥാന്യാൻ അപി യോധവീരാൻ
മയാ ഹതാംസ് ത്വം ജഹി മാ വ്യഥിഷ്ഠാ; യുധ്യസ്വ ജേതാസി രണേ സപത്നാൻ
35 സഞ്ജയ ഉവാച
ഏതച് ഛ്രുത്വാ വചനം കേശവസ്യ; കൃതാഞ്ജലിർ വേപമാനഃ കിരീടീ
നമസ്കൃത്വാ ഭൂയ ഏവാഹ കൃഷ്ണം; സഗദ്ഗദം ഭീതഭീതഃ പ്രണമ്യ
36 അർജുന ഉവാച
സ്ഥാനേ ഹൃഷീകേശ തവ പ്രകീർത്യാ; ജഗത് പ്രഹൃഷ്യത്യ് അനുരജ്യതേ ച
രക്ഷാംസി ഭീതാനി ദിശോ ദ്രവന്തി; സർവേ നമസ്യന്തി ച സിദ്ധസംഘാഃ
37 കസ്മാച് ച തേ ന നമേരൻ മഹാത്മൻ; ഗരീയസേ ബ്രഹ്മണോ ഽപ്യ് ആദികർത്രേ
അനന്ത ദേവേശ ജഗന്നിവാസ; ത്വം അക്ഷരം സദ് അസത് തത്പരം യത്
38 ത്വം ആദിദേവഃ പുരുഷഃ പുരാണസ്; ത്വം അസ്യ വിശ്വസ്യ പരം നിധാനം
വേത്താസി വേദ്യം ച പരം ച ധാമ; ത്വയാ തതം വിശ്വം അനന്തരൂപ
39 വായുർ യമോ ഽഗ്നിർ വരുണഃ ശശാങ്കഃ; പ്രജാപതിസ് ത്വം പ്രപിതാമഹശ് ച
നമോ നമസ് തേ ഽസ്തു സഹസ്രകൃത്വഃ; പുനശ് ച ഭൂയോ ഽപി നമോ നമസ് തേ
40 നമഃ പുരസ്താദ് അഥ പൃഷ്ഠതസ് തേ; നമോ ഽസ്തു തേ സർവത ഏവ സർവ
അനന്തവീര്യാമിതവിക്രമസ് ത്വം; സർവം സമാപ്നോഷി തതോ ഽസി സർവഃ
41 സഖേതി മത്വാ പ്രസഭം യദ് ഉക്തം; ഹേ കൃഷ്ണ ഹേ യാദവ ഹേ സഖേതി
അജാനതാ മഹിമാനം തവേദം; മയാ പ്രമാദാത് പ്രണയേന വാപി
42 യച് ചാവഹാസാർഥം അസത്കൃതോ ഽസി; വിഹാരശയ്യാസനഭോജനേഷു
ഏകോ ഽഥ വാപ്യ് അച്യുത തത്സമക്ഷം; തത് ക്ഷാമയേ ത്വാം അഹം അപ്രമേയം
43 പിതാസി ലോകസ്യ ചരാചരസ്യ; ത്വം അസ്യ പൂജ്യശ് ച ഗുരുർ ഗരീയാൻ
ന ത്വത്സമോ ഽസ്ത്യ് അഭ്യധികഃ കുതോ ഽന്യോ; ലോകത്രയേ ഽപ്യ് അപ്രതിമപ്രഭാവ
44 തസ്മാത് പ്രണമ്യ പ്രണിധായ കായം; പ്രസാദയേ ത്വാം അഹം ഈശം ഈഡ്യം
പിതേവ പുത്രസ്യ സഖേവ സഖ്യുഃ; പ്രിയഃ പ്രിയായാർഹസി ദേവ സോഢും
45 അദൃഷ്ടപൂർവം ഹൃഷിതോ ഽസ്മി ദൃഷ്ട്വാ; ഭയേന ച പ്രവ്യഥിതം മനോ മേ
തദ് ഏവ മേ ദർശയ ദേവ രൂപം; പ്രസീദ ദേവേശ ജഗന്നിവാസ
46 കിരീടിനം ഗദിനം ചക്രഹസ്തം; ഇച്ഛാമി ത്വാം ദ്രഷ്ടും അഹം തഥൈവ
തേനൈവ രൂപേണ ചതുർഭുജേന; സഹസ്രബാഹോ ഭവ വിശ്വമൂർതേ
47 ശ്രീഭഗവാൻ ഉവാച
മയാ പ്രസന്നേന തവാർജുനേദം; രൂപം പരം ദർശിതം ആത്മയോഗാത്
തേജോമയം വിശ്വം അനന്തം; ആദ്യം യൻ മേ ത്വദന്യേന ന ദൃഷ്ടപൂർവം
48 ന വേദ യജ്ഞാധ്യയനൈർ ന ദാനൈർ; ന ച ക്രിയാഭിർ ന തപോഭിർ ഉഗ്രൈഃ
ഏവംരൂപഃ ശക്യ അഹം നൃലോകേ; ദ്രഷ്ടും ത്വദന്യേന കുരുപ്രവീര
49 മാ തേ വ്യഥാ മാ ച വിമൂഢഭാവോ; ദൃഷ്ട്വാ രൂപം ഘോരം ഈദൃങ് മമേദം
വ്യപേതഭീഃ പ്രീതമനാഃ പുനസ് ത്വം; തദ് ഏവ മേ രൂപം ഇദം പ്രപശ്യ
50 സഞ്ജയ ഉവാച
ഇത്യ് അർജുനം വാസുദേവസ് തഥോക്ത്വാ; സ്വകം രൂപം ദർശയാം ആസ ഭൂയഃ
ആശ്വാസയാം ആസ ച ഭീതം ഏനം; ഭൂത്വാ പുനഃ സൗമ്യവപുർ മഹാത്മാ
51 അർജുന ഉവാച
ദൃഷ്ട്വേദം മാനുഷം രൂപം തവ സൗമ്യം ജനാർദന
ഇദാനീം അസ്മി സംവൃത്തഃ സചേതാഃ പ്രകൃതിം ഗതഃ
52 ശ്രീഭഗവാൻ ഉവാച
സുദുർദർശം ഇദം രൂപം ദൃഷ്ടവാൻ അസി യൻ മമ
ദേവാ അപ്യ് അസ്യ രൂപസ്യ നിത്യം ദർശനകാങ്ക്ഷിണഃ
53 നാഹം വേദൈർ ന തപസാ ന ദാനേന ന ചേജ്യയാ
ശക്യ ഏവംവിധോ ദ്രഷ്ടും ദൃഷ്ടവാൻ അസി മാം യഥാ
54 ഭക്ത്യാ ത്വ് അനന്യയാ ശക്യ അഹം ഏവംവിധോ ഽർജുന
ജ്ഞാതും ദ്രഷ്ടും ച തത്ത്വേന പ്രവേഷ്ടും ച പരന്തപ
55 മത്കർമകൃൻ മത്പരമോ മദ്ഭക്തഃ സംഗവർജിതഃ
നിർവൈരഃ സർവഭൂതേഷു യഃ സ മാം ഏതി പാണ്ഡവ