മഹാഭാരതം മൂലം/വനപർവം/അധ്യായം18
| ←അധ്യായം17 | മഹാഭാരതം മൂലം/വനപർവം രചന: അധ്യായം18 |
അധ്യായം19→ |
1 [വാ]
ഏവം ഉക്ത്വാ രൗക്മിണേയോ യാദവാൻ ഭരതർഷഭ
ദംശിതൈർ ഹരിഭിർ യുക്തം രഥം ആസ്ഥായ കാഞ്ചനം
2 ഉച്ഛ്രിത്യ മകരം കേതും വ്യാത്താനനം അലങ്കൃതം
ഉത്പതദ്ഭിർ ഇവാകാശം തൈർ ഹയൈർ അന്വയാത് പരാൻ
3 വിക്ഷിപൻ നാദയംശ് ചാപി ധനുഃശ്രേഷ്ഠം മഹാബലഃ
തൂണഖഡ്ഗധരഃ ശൂരോ ബദ്ധഗോധാംഗുലി ത്രവാൻ
4 സ വിദ്യുച്ചലിതം ചാപം വിഹരൻ വൈ തലാത് തലം
മോഹയാം ആസ ദൈതേയാൻ സർവാൻ സൗഭനിവാസിനഃ
5 നാസ്യ വിക്ഷിപതശ് ചാപം സന്ദധാനസ്യ ചാസകൃത്
അന്തരം ദദൃശേ കശ് ചിൻ നിഘ്നതഃ ശാത്രവാൻ രണേ
6 മുഖസ്യ വർണോ ന വികൽപതേ ഽസ്യ; ചേലുശ് ച ഗാത്രാണി ന ചാപി തസ്യ
സിംഹോന്നതം ചാപ്യ് അഭിഗർജതോ ഽസ്യ; ശുശ്രാവ ലോകോ ഽദ്ഭുതരൂപം അഗ്ര്യം
7 ജലേ ചരഃ കാഞ്ചനയഷ്ടി സംസ്ഥോ; വ്യാത്താനനഃ സർവതിമി പ്രമാഥീ
വിത്രാസയൻ രാജതി വാഹമുഖ്യേ; ശാല്വസ്യ സേനാ പ്രമുഖേ ധ്വജാഗ്ര്യഃ
8 തതഃ സ തൂർണം നിഷ്പത്യ പ്രദ്യുമ്നഃ ശത്രുകർശനഃ
ശാല്വം ഏവാഭിദുദ്രാവ വിധാസ്യൻ കലഹം നൃപ
9 അഭിയാനം തു വീരേണ പ്രദ്യുമ്നേന മഹാഹവേ
നാമർഷയത സങ്ക്രുദ്ധഃ ശാല്വഃ കുരുകുലോദ്വഹ
10 സ രോമമദമത്തോ വൈ കാമഗാദ് അവരുഹ്യ ച
പ്രദ്യുമ്നം യോധയാം ആസ ശാല്വഃ പരപുരഞ്ജയഃ
11 തയോഃ സുതുമുലം യുദ്ധം ശാല്വ വൃഷ്ണിപ്രവീരയോഃ
സമേതാ ദദൃശുർ ലോകാ ബലിവാസവയോർ ഇവ
12 തസ്യ മായാമയോ വീര രഥോ ഹേമപരിഷ്കൃതഃ
സധ്വജഃ സപതാകശ് ച സാനുകർഷഃ സതൂണവാൻ
13 സ തം രഥവരം ശ്രീമാൻ സമാരുഹ്യ കില പ്രഭോ
മുമോച ബാണാൻ കൗരവ്യ പ്രദ്യുമ്നായ മഹാബലഃ
14 തതോ ബാണമയം വർഷം വ്യസൃജത് തരസാ രണേ
പ്രദ്യുമ്നോ ഭുജവേഗേന ശാല്വം സംമോഹയന്ന് ഇവ
15 സ തൈർ അഭിഹതഃ സംഖ്യേ നാമർഷയത സൗഭരാട്
ശരാൻ ദീപ്താഗ്നിസങ്കാശാൻ മുമോച തനയേ മമ
16 സ ശാല്വ ബാണൈ രാജേന്ദ്ര വിദ്ധോ രുക്മിണിനന്ദനഃ
മുമോച ബാണം ത്വരിതോ മർമഭേദിനം ആഹവേ
17 തസ്യ വർമ വിഭിദ്യാശു സ ബാണോ മത് സുതേരിതഃ
ബിഭേദ ഹൃദയം പത്രീ സ പപാത മുമോഹ ച
18 തസ്മിൻ നിപതിതേ വീരേ ശാല്വരാജേ വിചേതസി
സമ്പ്രാദ്രവൻ ദാനവേന്ദ്രാ ദാരയന്തോ വസുന്ധരാം
19 ഹാഹാകൃതം അഭൂത് സൈന്യം ശാല്വസ്യ പൃഥിവീപതേ
നഷ്ടസഞ്ജ്ഞേ നിപതിതേ തദാ സൗഭപതൗ നൃപ
20 തത ഉത്ഥായ കൗരവ്യ പ്രതിലഭ്യ ച ചേതനം
മുമോച ബാണം തരസാ പ്രദ്യുമ്നായ മഹാബലഃ
21 തേന വിദ്ധോ മഹാബാഹുഃ പ്രദ്യുമ്നഃ സമരേ സ്ഥിതഃ
ജത്രു ദേശേ ഭൃശം വീരോ വ്യവാസീദദ് രഥേ തദാ
22 തം സ വിദ്ധ്വാ മഹാരാജ ശാല്വോ രുക്മിണിനന്ദനം
നനാദ സിംഹനാദം വൈ നാദേനാപൂരയൻ മഹീം
23 തതോ മോഹം സമാപന്നേ തനയേ മമ ഭാരത
മുമോച ബാണാംസ് ത്വരിതഃ പുനർ അന്യാൻ ദുരാസദാൻ
24 സ തൈർ അഭിഹതോ ബാണൈർ ബഹുഭിസ് തേന മോഹിതഃ
നിശ്ചേഷ്ടഃ കൗരവശ്രേഷ്ഠ പ്രദ്യുമ്നോ ഽഭൂദ് രണാജിരം