മഹാഭാരതം മൂലം/വനപർവം/അധ്യായം220

മഹാഭാരതം മൂലം/വനപർവം
രചന:വ്യാസൻ
അധ്യായം220

1 [മാർക്]
     യദാ സ്കന്ദേന മാതൄണാം ഏവം ഏതത് പ്രിയം കൃതം
     അഥൈനം അബ്രവീത് സ്വാഹാ മമ പുത്രസ് ത്വം ഔരസഃ
2 ഇച്ഛാമ്യ് അഹം ത്വയാ ദത്താം പ്രീതിം പരമദുർലഭാം
     താം അബ്രവീത് തതഃ സ്കന്ദഃ പ്രീതിം ഇച്ഛസി കീദൃശീം
3 [സ്വാഹാ]
     ദക്ഷസ്യാഹം പ്രിയാ കന്യാ സ്വാഹാ നാമ മഹാഭുജ
     ബാല്യാത് പ്രഭൃതി നിത്യം ച ജാതകാമാ ഹുതാശനേ
4 ന ച മാം കാമിനീം പുത്രസമ്യഗ് ജാനാതി പാവകഃ
     ഇച്ഛാമി ശാശ്വതം വാസം വസ്തും പുത്ര സഹാഗ്നിനാ
5 [സ്കന്ദ]
     ഹവ്യം കവ്യം ച യത് കിം ചിദ് ദ്വിജാ മന്ത്രപുരസ്കൃതം
     ഹോഷ്യന്ത്യ് അഗ്നൗ സദാ ദേവി സ്വാഹേത്യ് ഉക്ത്വാ സമുദ്യതം
6 അദ്യ പ്രഭൃതി ദാസ്യന്തി സുവൃത്താഃ സത്പഥേ സ്ഥിതാഃ
     ഏവം അഗ്നിസ് ത്വയാ സാർധം സദാ വത്സ്യതി ശോഭനേ
7 [മാർക്]
     ഏവം ഉക്താ തതഃ സ്വാഹാ തുഷ്ടാ സ്കന്ദേന പൂജിതാ
     പാവകേന സമായുക്താ ഭർത്രാ സ്കന്ദം അപൂജയത്
8 തതോ ബ്രഹ്മാ മഹാസേനം പ്രജാപതിർ അഥാബ്രവീത്
     അഭിഗച്ഛ മഹാദേവം പിതരം ത്രിപുരാർദനം
9 രുദ്രേണാഗ്നിം സമാവിശ്യ സ്വാഹാം ആവിശ്യ ചോമയാ
     ഹിതാർഥം സർവലോകാനാം ജാതസ് ത്വം അപരാജിതഃ
10 ഉമാ യോന്യാം ച രുദ്രേണ ശുക്രം സിക്തം മഹാത്മനാ
    ആസ്തേ ഗിരൗ നിപതിതം മിഞ്ജികാ മിഞ്ജികം യതഃ
11 സംഭൂതം ലോഹിതോദേ തു ശോക്ര ശേഷം അവാപതത്
    സൂര്യരശ്മിഷു ചാപ്യ് അന്യദ് അന്യച് ചൈവാപതദ് ഭുവി
    ആസക്തം അന്യദ് വൃക്ഷേഷു തദ് ഏവം പഞ്ചധാപതത്
12 ത ഏതേ വിവിധാകാരാ ഗണാ ജ്ഞേയാ മനീഷിഭിഃ
    തവ പാരിഷദാ ഘോരാ യ ഏതേ പിശിതാശനാഃ
13 ഏവം അസ്ത്വ് ഇതി ചാപ്യ് ഉക്ത്വാ മഹാസേനോ മഹേശ്വരം
    അപൂജയദ് അമേയാത്മാ പിതരം പിതൃവത്സലഃ
14 അർകപുഷ്പൈസ് തു തേ പഞ്ച ഗണാഃ പൂജ്യാ ധനാർഥിഭി
    വ്യാധിപ്രശമനാർഥം ച തേഷാം പൂജാം സമാചരേത്
15 മിഞ്ജികാ മിഞ്ജികം ചൈവ മിഥുനം രുദ്ര സംഭവം
    നമഃ കാര്യം സദൈവേഹ ബാലാനാം ഹിതം ഇച്ഛതാ
16 സ്ത്രിയോ മാനുഷമാംസാദാ വൃദ്ധികാ നാമ നാമതഃ
    വൃക്ഷേഷു ജാതാസ് താ ദേവ്യോ നമഃ കാര്യാഃ പ്രജാർഥിഭിഃ
17 ഏവം ഏതേ പിശാചാനാം അസംഖ്യേയാ ഗണാഃ സ്മൃതാഃ
    ഘണ്ടായാഃ സപതാകായാഃ ശൃണു മേ സംഭവം നൃപ
18 ഐരാവതസ്യ ഘണ്ടേ ദ്വേ വൈജയന്ത്യാവ് ഇതി ശ്രുതേ
    ഗുഹസ്യ തേ സ്വയം ദത്തേ ശക്രേണാനായ്യ ധീമതാ
19 ഏകാ തത്ര വിശാഖസ്യ ഘണ്ടാ സ്കന്ദസ്യ ചാപരാ
    പതാകാ കാർത്തികേയസ്യ വിശാഖസ്യ ച ലോഹിതാ
20 യാനി ക്രീഡനകാന്യ് അസ്യ ദേവൈർ ദത്താനി വൈ തദാ
    തൈർ ഏവ രമതേ ദേവോ മഹാസേനോ മഹാബലഃ
21 സ സംവൃതഃ പിശാചാനാം ഗണൈർ ദേവഗണൈസ് തഥാ
    ശുശുഭേ കാഞ്ചനേ ശൈലേ ദീപ്യമാനഃ ശ്രിയാ വൃതഃ
22 തേന വീരേണ ശുശുഭേ സ ശൈലഃ ശുഭകാനനഃ
    ആദിത്യേണേവാംശുമതാ മന്ദരശ് ചാരുകന്ദരഃ
23 സന്താനകവനൈഃ ഫുല്ലൈഃ കരവീര വനൈർ അപി
    പാരിജാത വനൈശ് ചൈവ ജപാ ശോകവനൈസ് തഥാ
24 കദംബതരുഷണ്ഡൈശ് ച ദിവ്യൈർ മൃഗഗണൈർ അപി
    ദിവ്യൈഃ പക്ഷിഗണൈശ് ചൈവ ശുശുഭേ ശ്വേതപർവതഃ
25 തത്ര ദേവഗണാഃ സർവേ സർവേ ചൈവ മഹർഷയഃ
    മേഘതൂര്യ രവാശ് ചൈവ ക്ഷുബ്ധോദധി സമസ്വനാഃ
26 തത്ര ദിവ്യാശ് ച ഗന്ധർവാ നൃത്യന്ത്യ് അപ്സരസസ് തഥാ
    ഹൃഷ്ടാനാം തത്ര ഭൂതാനാം ശ്രൂയതേ നിനദോ മഹാൻ
27 ഏവം സേന്ദ്രം ജഗത് സർവം ശ്വേതപർവതസംസ്ഥിതം
    പ്രഹൃഷ്ടം പ്രേക്ഷതേ സ്കന്ദം ന ച ഗ്ലായതി ദർശനാത്