മഹാഭാരതം മൂലം/വനപർവം/അധ്യായം224
| ←അധ്യായം223 | മഹാഭാരതം മൂലം/വനപർവം രചന: അധ്യായം224 |
അധ്യായം225→ |
1 [വൈ]
മാർകണ്ഡേയാധിഭിർ വിപ്രൈഃ പാണ്ഡവൈശ് ച മഹാത്മഭിഃ
കഥാഭിർ അനുകൂലാഭിഃ സഹാസിത്വാ ജനാർദനഃ
2 തതസ് തൈഃ സംവിദം കൃത്വാ യഥാവൻ മധുസൂദനഃ
ആരുരുക്ഷൂ രഥം സത്യാം ആഹ്വയാം ആസ കേശവഃ
3 സത്യഭാമാ തതസ് തത്ര സ്വജിത്വാ ദ്രുപദാത്മജാം
ഉവാച വചനം ഹൃദ്യം യഥാ ഭാവസമാഹിതം
4 കൃഷ്ണേ മാ ഭൂത് തവോത്കണ്ഠാ മാ വ്യഥാ മാ പ്രജാഗരഃ
ഭർതൃഭിർ ദേവസങ്കാശൈർ ജിതാം പ്രാപ്സ്യസി മേദിനീം
5 ന ഹ്യ് ഏവം ശീലസമ്പന്നാ നൈവം പൂജിത ലക്ഷണാഃ
പ്രാപ്നുവന്തി ചിരം ക്ലേശം യഥാ ത്വം അസിതേക്ഷണേ
6 അവശ്യം ച ത്വയാ ഭൂമിർ ഇയം നിഹതകണ്ടകാ
ഭർതൃഭിഃ സഹ ഭോക്തവ്യാ നിർദ്വന്ദ്വേതി ശ്രുതം മയാ
7 ധാർതരാഷ്ട്ര വധം കൃത്വാ വൗരാണി പ്രതിയാത്യ ച
യുധിഷ്ഠിരസ്ഥാം പൃഥിവീം ദ്രഷ്ടാസി ദ്രുപദാത്മജേ
8 യാസ് താഃ പ്രവ്രാജമാനാം ത്വാം പ്രാഹസൻ ദർപമോഹിതാഃ
താഃ ക്ഷിപ്രം ഹതസങ്കൽപാ ദ്രക്ഷ്യസി ത്വം കുരു സ്ത്രിയഃ
9 തവ ദുഃഖോപപന്നായാ യൈർ ആചരിതം അപ്രിയം
വിദ്ധി സമ്പ്രസ്ഥിതാൻ സർവാംസ് താൻ കൃഷ്ണേ യമസാദനം
10 പുത്രസ് തേ പ്രതിവിന്ധ്യശ് ച സുത സോമസ് തഥാ വിഭുഃ
ശ്രുതകർമാർജുനിശ് ചൈവ ശതാനീകശ് ച നാകുലിഃ
സഹദേവാച് ച യോ ജാതഃ ശ്രുതസേനസ് തവാത്മജഃ
11 സർവേ കുശലിനോ വീരാഃ കൃതാസ്ത്രാശ് ച സുതാസ് തവ
അഭിമന്യുർ ഇവ പ്രീതാ ദ്വാരവത്യാം രതാ ഭൃശം
12 ത്വം ഇവൈഷാം സുഭദ്രാച പ്രീത്യാ സർവാത്മനാ സ്ഥിതാ
പ്രീയതേ ഭാവനിർദ്വന്ദ്വാ തേഭ്യശ് ച വിഗതജ്വരാ
13 ഭേജേ സർവാത്മനാ ചൈവ പ്രദ്യുമ്ന ജനനീ തഥാ
ഭാനുപ്രഭൃതിഭിശ് ചൈനാൻ വിശിനഷ്ടി ച കേശവഃ
14 ഭോജനാച് ഛാദനേ ചൈഷാം നിത്യം മേ ശ്വശുരഃ സ്ഥിതഃ
രാമപ്രഭൃതയഃ സർവേ ഭജന്ത്യ് അന്ധകവൃഷ്ണയഃ
തുല്യോ ഹി പ്രണയസ് തേഷാം പ്രദ്യുമ്നസ്യ ച ഭാമിനി
15 ഏവമാദി പ്രിയം പ്രീത്യാ ഹൃദ്യം ഉക്ത്വാ മനോഽനുഗം
ഗമനായ മനോ ചക്രേ വാസുദേവ രഥം പ്രതി
16 താം കൃഷ്ണാം കൃഷ്ണ മഹിഷീ ചകാരാഭിപ്രദക്ഷിണം
ആരുരോഹ രഥം ശൗരേഃ സത്യഭാമാ ച ഭാമിനീ
17 സ്മയിത്വാ തു യദുശ്രേഷ്ഠോ ദ്രൗപദീം പരിസാന്ത്വ്യ ച
ഉപാവർത്യ തതഃ ശീഘ്രൈർ ഹയൈഃ പ്രായാത് പരന്തപഃ