മഹാഭാരതം മൂലം/വനപർവം/അധ്യായം233

മഹാഭാരതം മൂലം/വനപർവം
രചന:വ്യാസൻ
അധ്യായം233

1 [വൈ]
     യുധിഷ്ഠിരവചഃ ശ്രുത്വാ ഭീമസേനപുരോഗമാഃ
     പ്രഹൃഷ്ടവദനാഃ സർവേ സമുത്തസ്ഥുർ നരർഷഭാഃ
2 അഭേദ്യാനി തതഃ സർവേ സമനഹ്യന്ത ഭാരത
     ജാംബൂനദവിചിത്രാണി കവചാനി മഹാരഥാഃ
3 തേ ദംശിതാ രഥൈഃ സർവേ ധ്വജിനഃ സശരാസനാഃ
     പാണ്ഡവാഃ പ്രത്യദൃശ്യന്ത ജ്വലിതാ ഇവ പാവകാഃ
4 താൻ രഥാൻ സാധു സമ്പന്നാൻ സംയുക്താഞ് ജവനൈർ ഹയൈഃ
     ആസ്ഥായ രഥശാർദൂലാഃ ശീഘ്രം ഏവ യയുസ് തതഃ
5 തതഃ കൗരവ സൈന്യാനാം പ്രാദുരാസീൻ മഹാസ്വനഃ
     പ്രയാതാൻ സഹിതാൻ ദൃഷ്ട്വാ പാണ്ഡുപുത്രാൻ മഹാരഥാൻ
6 ജിതകാശിനശ് ച ഖചരാസ് ത്വരിതാശ് ച മഹാരഥാഃ
     ക്ഷണേനൈവ വനേ തസ്മിൻ സമാജഗ്മുർ അഭീതവത്
7 ന്യവർതന്ത തതഃ സർവേ ഗന്ധർവാ ജിതകാശിനഃ
     ദൃഷ്ട്വാ രഥഗതാൻ വീരാൻ പാണ്ഡവാംശ് ചതുരോ രണേ
8 താംസ് തു വിഭ്രാജതോ ദൃഷ്ട്വാ ലോകപാലാൻ ഇവോദ്യതാൻ
     വ്യൂഢാനീകാ വ്യതിഷ്ഠന്ത ഗന്ധമാദനവാസിനഃ
9 രാജ്ഞസ് തു വചനം ശ്രുത്വാ ധർമരാജസ്യ ധീമതഃ
     ക്രമേണ മൃദുനാ യുദ്ധം ഉപക്രാമന്ത ഭാരത
10 ന തു ഗന്ധർവരാജസ്യ സൈനികാ മന്ദചേതസഃ
    ശക്യന്തേ മൃദുനാ ശ്രേയോ പ്രതിപാദയിതും തദാ
11 തതസ് താൻ യുധി ദുർധർഷഃ സവ്യസാചീ പരന്തപഃ
    സാന്ത്വപൂർവം ഇദം വാക്യം ഉവാച ഖചരാൻ രണേ
12 നൈതദ് ഗന്ധർവരാജസ്യ യുക്തം കർമ ജുഗുപ്സിതം
    പരദാരാഭിമർശശ് ച മാനുഷൈശ് ച സമാഗമഃ
13 ഉത്സൃജധ്വം മഹാവീര്യാൻ ധൃതരാഷ്ട്ര സുതാൻ ഇമാൻ
    ദാരാംശ് ചൈഷാം വിമുഞ്ചധ്വം ധർമരാജസ്യ ശാസനാത്
14 ഏവം ഉക്താസ് തു ഗന്ധർവാഃ പാണ്ഡവേന യശസ്വിനാ
    ഉത്സ്മയന്തസ് തദാ പാർഥം ഇദം വചനം അബ്രുവൻ
15 ഏകസ്യൈവ വയം താത കുര്യാമ വചനം ഭുവി
    യസ്യ ശാസനം ആജ്ഞായ ചരാമ വിഗതജ്വരാഃ
16 തേനൈകേന യഥാദിഷ്ടം തഥാ വർതാമ ഭാരത
    ന ശാസ്താ വിദ്യതേ ഽസ്മാകം അന്യസ് തസ്മാത് സുരേശ്വരാത്
17 ഏവം ഉക്തസ് തു ഗന്ധർവൈഃ കുന്തീപുത്രോ ധനഞ്ജയഃ
    ഗന്ധർവാൻ പുനർ ഏവേദം വചനം പ്രത്യഭാഷത
18 യദി സാമ്നാ ന മോക്ഷധ്വം ഗന്ധർവാ ധൃതരാഷ്ട്രജം
    മോക്ഷയിഷ്യാമി വിക്രമ്യ സ്വയം ഏവ സുയോധനം
19 ഏവം ഉക്ത്വാ തതഃ പാർഥഃ സവ്യസാചീ ധനഞ്ജയഃ
    സസർവ നിശിതാൻ ബാണാൻ ഖചരാൻ ഖചരാൻ പ്രതി
20 തഥൈവ ശരവർഷേണ ഗന്ധർവാസ് തേ ബലോത്കടാഃ
    പാണ്ഡവാൻ അഭ്യവർതന്ത പാണ്ഡവാശ് ച ദിവൗകസഃ
21 തതഃ സുതുമുലം യുദ്ധം ഗന്ധർവാണാം തരസ്വിനാം
    ബഭൂവ ഭീമവേഗാനാം പാണ്ഡവാനാം ച ഭാരത