മഹാഭാരതം മൂലം/വനപർവം/അധ്യായം24

മഹാഭാരതം മൂലം/വനപർവം
രചന:വ്യാസൻ
അധ്യായം24

1 [വൈ]
     തസ്മിൻ ദശാർഹാധിപതൗ പ്രയാതേ; യുധിഷ്ഠിരോ ഭീമസേനാർജുനൗ ച
     യമൗ ച കൃഷ്ണാ ച പുരോഹിതശ് ച; രഥാൻ മഹാർഹാൻ പരമാശ്വയുക്താൻ
2 ആസ്ഥായ വീരാഃ സഹിതാ വനായ; പ്രതസ്ഥിരേ ഭൂതപതിപ്രകാശാഃ
     ഹിരണ്യനിഷ്കാൻ വസനാനി ഗാശ് ച; പ്രദായ ശിക്ഷാക്ഷര മന്ത്രിവിദ്ഭ്യഃ
3 പ്രേഷ്യാഃ പുരോ വിംശതിർ ആത്തശസ്ത്രാ; ധനൂംഷി വർമാണി ശരാംശ് ച പീതാൻ
     മൗർവീശ് ച യന്ത്രാണി ച സായകാംശ് ച; സർവേ സമാദായ ജഘന്യം ഈയുഃ
4 തതസ് തു വാസാംസി ച രാജപുത്ര്യാ; ധാത്ര്യശ് ച ദാസ്യശ് ച വിഭൂഷണം ച
     തദ് ഇന്ദ്രസേനസ് ത്വരിതം പ്രഗൃഹ്യ; ജഘന്യം ഏവോപയയൗ രഥേന
5 തതഃ കുരുശ്രേഷ്ഠം ഉപേത്യ പൗരാഃ; പ്രദക്ഷിണം ചക്രുർ അദീനസത്ത്വാഃ
     തം ബ്രാഹ്മണാശ് ചാഭ്യവദൻ പ്രസന്നാ; മുഖ്യാശ് ച സർവേ കുരുജാംഗലാനാം
6 സ ചാപി താൻ അഭ്യവദത് പ്രസന്നഃ; സഹൈവ തൈർ ഭ്രാതൃഭിർ ധർമരാജഃ
     തസ്ഥൗ ച തത്രാധിപതിർ മഹാത്മാ; ദൃഷ്ട്വാ ജനൗഘം കുരുജാംഗലാനാം
7 പിതേവ പുത്രേഷു സ തേഷു ഭാവം; ചക്രേ കുരൂണാം ഋഷഭോ മഹാത്മാ
     തേ ചാപി തസ്മിൻ ഭരത പ്രബർഹേ; തദാ ബഭൂവുഃ പിതരീവ പുത്രാഃ
8 തതഃ സമാസാദ്യ മഹാജനൗഘാഃ; കുരുപ്രവീരം പരിവാര്യ തസ്ഥുഃ
     ഹാ നാഥ ഹാ ധർമ ഇതി ബ്രുവന്തോ; ഹ്രിയാ ച സർവേ ഽശ്രുമുഖാ ബഭൂവുഃ
9 വരഃ കുരൂണാം അധിപഃ പ്രജാനാം; പിതേവ പുത്രാൻ അപഹായ ചാസ്മാൻ
     പൗരാൻ ഇമാഞ് ജാനപദാംശ് ച സർവാൻ; ഹിത്വാ പ്രയാതഃ ക്വ നു ധർമരാജഃ
10 ധിഗ് ധാർതരാഷ്ട്രം സുനൃശംസ ബുദ്ധിം; സസൗബലം പാപമതിം ച കർണം
    അനർഥം ഇച്ഛന്തി നരേന്ദ്ര പാപാ; യേ ധർമനിത്യസ്യ സതസ് തവാഗ്രാഃ
11 സ്വയം നിവേശ്യാപ്രതിമം മഹാത്മാ; പുരം മഹദ് ദേവപുരപ്രകാശം
    ശതക്രതുപ്രഥം അമോഘകർമാ; ഹിത്വാ പ്രയാതഃ ക്വ നു ധർമരാജഃ
12 ചകാര യാം അപ്രതിമാം മഹാത്മാ; സഭാം മയോ ദേവ സഭാ പ്രകാശാം
    താം ദേവ ഗുപ്താം ഇവ ദേവ മായാം; ഹിത്വാ പ്രയാതഃ ക്വ നു ധർമരാജഃ
13 താൻ ധർമകാമാർഥവിദ് ഉത്തമൗജാ; ബീഭത്സുർ ഉച്ചൈഃ സഹിതാൻ ഉവാച
    ആദാസ്യതേ വാസം ഇമം നിരുഷ്യ; വനേഷു രാജാ ദ്വിഷതാം യശാംസി
14 ദ്വിജാതിമുഖ്യാഃ സഹിതാഃ പൃഥക് ച; ഭവദ്ഭിർ ആസാദ്യ തപസ്വിനശ് ച
    പ്രസാദ്യ ധർമാർഥവിദശ് ച വാച്യാ; യഥാർഥസിദ്ധിഃ പരമാ ഭവേൻ നഃ
15 ഇത്യ് ഏവം ഉക്തേ വചനേ ഽർജുനേന; തേ ബ്രാഹ്മണാഃ സർവവർണാശ് ച രാജൻ
    മുദാഭ്യനന്ദൻ സഹിതാശ് ച ചക്രുഃ; പ്രദക്ഷിണം ധർമഭൃതാം വരിഷ്ഠം
16 ആമന്ത്ര്യ പാർഥം ച വൃകോദരം ച; ധനഞ്ജയം യാജ്ഞസേനീം യമൗ ച
    പ്രതസ്ഥിരേ രാഷ്ട്രം അപേതഹർഷാ; യുധിഷ്ഠിരേണാനുമതാ യഥാ സ്വം