മഹാഭാരതം മൂലം/വനപർവം/അധ്യായം4
| ←അധ്യായം3 | മഹാഭാരതം മൂലം/വനപർവം രചന: അധ്യായം4 |
അധ്യായം5→ |
1 [വ്]
തതോ ദിവാകരഃ പ്രീതോ ദർശയാം ആസ പാണ്ഡവം
ദീപ്യമാനഃ സ്വവപുഷാ ജ്വലന്ന് ഇവ ഹുതാശനഃ
2 യത് തേ ഽഭിലഷിതം രാജൻ സർവം ഏതദ് അവാപ്സ്യസി
അഹം അന്നം പ്രദാസ്യാമി സപ്ത പഞ്ച ച തേ സമാഃ
3 ഫലമൂലാമിഷം ശാകം സംസ്കൃതം യൻ മഹാനസേ
ചതുർവിധം തദന്നാദ്യം അക്ഷയ്യം തേ ഭവിഷ്യതി
ധനം ച വിവിധം തുഭ്യം ഇത്യ് ഉക്ത്വാന്തരധീയത
4 ലബ്ധ്വാ വരം തു കൗന്തേയോ ജലാദ് ഉത്തീര്യ ധർമവിത്
ജഗ്രാഹ പാദൗ ധൗമ്യസ്യ ഭ്രാതൄംശ് ചാസ്വജതാച്യുതഃ
5 ദ്രൗപദ്യാ സഹ സംഗമ്യ പശ്യമാനോ ഽഭ്യയാത് പ്രഭുഃ
മഹാനസേ തദാന്നം തു സാധയാം ആസ പാണ്ഡവഃ
6 സംസ്കൃതം പ്രസവം യാതി വന്യം അന്നം ചതുർവിധം
അക്ഷയ്യം വർധതേ ചാന്നം തേന ഭോജയതേ ദ്വിജാൻ
7 ഭുക്തവത്സു ച വിപ്രേഷു ഭോജയിത്വാനുജാൻ അപി
ശേഷം വിഘസ സഞ്ജ്ഞം തു പശ്ചാദ് ഭുങ്ക്തേ യുധിഷ്ഠിരഃ
യുധിഷ്ഠിരം ഭോജയിത്വാ ശേഷം അശ്നാതി പാർഷതീ
8 ഏവം ദിവാകരാത് പ്രാപ്യ ദിവാകരസമദ്യുതിഃ
കാമാൻ മനോ ഽഭിലഷിതാൻ ബ്രാഹ്മണേഭ്യോ ദദൗ പ്രഭുഃ
9 പുരോഹിത പുരോഗാശ് ച തിഥി നക്ഷത്രപർവസു
യജ്ഞിയാർഥഃ പ്രവർതന്തേ വിധിമന്ത്രപ്രമാണതഃ
10 തതഃ കൃതസ്വസ്ത്യയനാ ധൗമ്യേന സഹ പാണ്ഡവാഃ
ദ്വിജസംഘൈഃ പരിവൃതാഃ പ്രയയുഃ കാമ്യകം വനം