മഹാഭാരതം മൂലം/വനപർവം/അധ്യായം53

മഹാഭാരതം മൂലം/വനപർവം
രചന:വ്യാസൻ
അധ്യായം53

1 ബൃഹദശ്വ ഉവാച
     സാ നമസ്കൃത്യ ദേവേഭ്യഃ പ്രഹസ്യ നലം അബ്രവീത്
     പ്രണയസ്വ യഥാശ്രദ്ധം രാജൻ കിം കരവാണി തേ
2 അഹം ചൈവ ഹി യച് ചാന്യൻ മമാസ്തി വസു കിം ചന
     സർവം തത് തവ വിശ്രബ്ധം കുരു പ്രണയം ഈശ്വര
3 ഹംസാനാം വചനം യത് തത് തൻ മാം ദഹതി പാർഥിവ
     ത്വത്കൃതേ ഹി മയാ വീര രാജാനഃ സംനിപാതിതാഃ
4 യദി ചേദ് ഭജമാനാം മാം പ്രത്യാഖ്യാസ്യസി മാനദ
     വിഷം അഗ്നിം ജലം രജ്ജും ആസ്ഥാസ്യേ തവ കാരണാത്
5 ഏവം ഉക്തസ് തു വൈദർഭ്യാ നലസ് താം പ്രത്യുവാച ഹ
     തിഷ്ഠത്സു ലോകപാലേഷു കഥം മാനുഷം ഇച്ഛസി
6 യേഷാം അഹം ലോകകൃതാം ഈശ്വരാണാം മഹാത്മനാം
     ന പാദരജസാ തുല്യോ മനസ് തേ തേഷു വർതതാം
7 വിപ്രിയം ഹ്യ് ആചരൻ മർത്യോ ദേവാനാം മൃത്യും ഋച്ഛതി
     ത്രാഹി മാം അനവദ്യാംഗി വരയസ്വ സുരോത്തമാൻ
8 തതോ ബാഷ്പകലാം വാചം ദമയന്തീ ശുചിസ്മിതാ
     പ്രവ്യാഹരന്തീ ശനകൈർ നലം രാജാനം അബ്രവീത്
9 അസ്ത്യ് ഉപായോ മയാ ദൃഷ്ടോ നിരപായോ നരേശ്വര
     യേന ദോഷോ ന ഭവിതാ തവ രാജൻ കഥം ചന
10 ത്വം ചൈവ ഹി നരശ്രേഷ്ഠ ദേവാശ് ചാഗ്നിപുരോഗമാഃ
    ആയാന്തു സഹിതാഃ സർവേ മമ യത്ര സ്വയംവരഃ
11 തതോ ഽഹം ലോകപാലാനാം സംനിധൗ ത്വാം നരേശ്വര
    വരയിഷ്യേ നരവ്യാഘ്ര നൈവം ദോഷോ ഭവിഷ്യതി
12 ഏവം ഉക്തസ് തു വൈദർഭ്യാ നലോ രാജാ വിശാം പതേ
    ആജഗാമ പുനസ് തത്ര യത്ര ദേവാഃ സമാഗതാഃ
13 തം അപശ്യംസ് തഥായാന്തം ലോകപാലാഃ സഹേശ്വരാഃ
    ദൃഷ്ട്വാ ചൈനം തതോ ഽപൃച്ഛൻ വൃത്താന്തം സർവം ഏവ തത്
14 ദേവാ ഊചുഃ
    കച് ചിദ് ദൃഷ്ടാ ത്വയാ രാജൻ ദമയന്തീ ശുചിസ്മിതാ
    കിം അബ്രവീച് ച നഃ സർവാൻ വദ ഭൂമിപതേ ഽനഘ
15 നല ഉവാച
    ഭവദ്ഭിർ അഹം ആദിഷ്ടോ ദമയന്ത്യാ നിവേശനം
    പ്രവിഷ്ടഃ സുമഹാകക്ഷ്യം ദണ്ഡിഭിഃ സ്ഥവിരൈർ വൃതം
16 പ്രവിശന്തം ച മാം തത്ര ന കശ് ചിദ് ദൃഷ്ടവാൻ നരഃ
    ഋതേ താം പാർഥിവസുതാം ഭവതാം ഏവ തേജസാ
17 സഖ്യശ് ചാസ്യാ മയാ ദൃഷ്ടാസ് താഭിശ് ചാപ്യ് ഉപലക്ഷിതഃ
    വിസ്മിതാശ് ചാഭവൻ ദൃഷ്ട്വാ സർവാ മാം വിബുധേശ്വരാഃ
18 വർണ്യമാനേഷു ച മയാ ഭവത്സു രുചിരാനനാ
    മാം ഏവ ഗതസങ്കൽപാ വൃണീതേ സുരസത്തമാഃ
19 അബ്രവീച് ചൈവ മാം ബാലാ ആയാന്തു സഹിതാഃ സുരാഃ
    ത്വയാ സഹ നരശ്രേഷ്ഠ മമ യത്ര സ്വയംവരഃ
20 തേഷാം അഹം സംനിധൗ ത്വാം വരയിഷ്യേ നരോത്തമ
    ഏവം തവ മഹാബാഹോ ദോഷോ ന ഭവിതേതി ഹ
21 ഏതാവദ് ഏവ വിബുധാ യഥാവൃത്തം ഉദാഹൃതം
    മയാശേഷം പ്രമാണം തു ഭവന്തസ് ത്രിദശേശ്വരാഃ