മഹാഭാരതം മൂലം/വിരാടപർവം/അധ്യായം11
| ←അധ്യായം10 | മഹാഭാരതം മൂലം/വിരാടപർവം രചന: അധ്യായം11 |
അധ്യായം12→ |
1 [വൈ]
അഥാപരോ ഽദൃശ്യത പാണ്ഡവഃ പ്രഭുർ; വിരാട രാജ്ഞസ് തുരഗാൻ സമീക്ഷതഃ
തം ആപതന്തം ദദൃശേ പൃഥഗ്ജനോ; വിമുക്തം അഭ്രാദ് ഇവ സൂര്യമണ്ഡലം
2 സ വൈ ഹയാൻ ഐക്ഷത താംസ് തതസ് തതഃ; സമീക്ഷമാണം ച ദദർശ മത്സ്യരാജ്
തതോ ഽബ്രവീത് താൻ അനുഗാൻ അമിത്രഹാ; കുതോ ഽയം ആയാതി നരാമര പ്രഭഃ
3 അയം ഹയാൻ വീക്ഷതി മാമകാൻ ദൃഢം; ധ്രുവം ഹയജ്ഞോ ഭവിതാ വിചക്ഷണഃ
പ്രവേശ്യതാം ഏഷ സമീപം ആശു മേ; വിഭാതി വീരോ ഹി യഥാമരസ് തഥാ
4 അഭ്യേത്യ രാജാനം അമിത്രഹാബ്രവീജ്; ജയോ ഽസ്തു തേ പാർഥിവ ഭദ്രം അസ്തു തേ
ഹയേഷു യുക്തോ നൃപ സംമതഃ സദാ; തവാശ്വസൂതോ നിപുണോ ഭവാമ്യ് അഹം
5 [വിരാട]
ദദാമി യാനാനി ധനം നിവേശനം; മമാശ്വസൂതോ ഭവിതും ത്വം അർഹസി
കുതോ ഽസി കസ്യാസി കഥം ത്വം ആഗതഃ; പ്രബ്രൂഹി ശിൽപം തവ വിദ്യതേ ച യത്
6 [നകുല]
പഞ്ചാനാം പാണ്ഡുപുത്രാണാം ജ്യേഷ്ഠോ രാജാ യുധിഷ്ഠിരഃ
തേനാഹം അശ്വേഷു പുരാ പ്രകൃതഃ ശത്രുകർശന
7 അശ്വാനാം പ്രകൃതിം വേദ്മി വിനയം ചാപി സർവശഃ
ദുഷ്ടാനാം പ്രതിപത്തിം ച കൃത്സ്നം ചൈവ ചികിത്സിതം
8 ന കാതരം സ്യാൻ മമ ജാതു വാഹനം; ന മേ ഽസ്തി ദുഷ്ടാ വഡവാ കുതോ ഹയാഃ
ജനസ് തു മാം ആഹ സ ചാപി പാണ്ഡവോ; യുധിഷ്ഠിരോ ഗ്രന്ഥികം ഏവ നാമതഃ
9 [വിരാട]
യദ് അസ്തി കിം ചിൻ മമ വാജിവാഹനം; തദ് അസ്തു സർവം ത്വദധീനം അദ്യ വൈ
യേ ചാപി കേ ചിൻ മമ വാജിയോജകാസ്; ത്വദാശ്രയാഃ സാരഥയശ് ച സന്തു മേ
10 ഇദം തവേഷ്ടം യദി വൈ സുരോപമ; ബ്രവീഹി യത് തേ പ്രസമീക്ഷിതം വസു
ന തേ ഽനുരൂപം ഹയകർമ വിദ്യതേ; പ്രഭാസി രാജേവ ഹി സംമതോ മമ
11 യുധിഷ്ഠിരസ്യേവ ഹി ദർശനേന മേ; സമം തവേദം പ്രിയ ദർശ ദർശനം
കഥം തു ഭൃത്യൈഃ സ വിനാകൃതോ വനേ; വസത്യ് അനിന്ദ്യോ രമതേ ച പാണ്ഡവഃ
12 [വൈ]
തഥാ സ ഗന്ധർവവരോപമോ യുവാ; വിരാട രാജ്ഞാ മുദിതേന പൂജിതഃ
ന ചൈനം അന്യേ ഽപി വിദുഃ കഥം ചന; പ്രിയാഭിരാമം വിചരന്തം അന്തരാ
13 ഏവം ഹി മത്സ്യേ ന്യവസന്ത പാണ്ഡവാ; യഥാപ്രതിജ്ഞാഭിർ അമോഘദർശനാഃ
അജ്ഞാതചര്യാം വ്യചരൻ സമാഹിതാഃ; സമുദ്രനേമിപതയോ ഽതിദുഃഖിതാഃ