മഹാഭാരതം മൂലം/വിരാടപർവം/അധ്യായം24

മഹാഭാരതം മൂലം/വിരാടപർവം
രചന:വ്യാസൻ
അധ്യായം24

1 [വൈ]
     കീചകസ്യ തു ഘാതേന സാനുജസ്യ വിശാം പതേ
     അത്യാഹിതം ചിന്തയിത്വാ വ്യസ്മയന്ത പൃഥഗ്ജനാഃ
2 തസ്മിൻ പുരേ ജനപദേ സഞ്ജൽപോ ഽഭൂച് ച സർവശഃ
     ശൗര്യാദ് ധി വല്ലഭോ രാജ്ഞോ മഹാസത്ത്വശ് ച കീചകഃ
3 ആസീത് പ്രഹർതാ ച നൃണാം ദാരാമർശീ ച ദുർമതിഃ
     സ ഹതഃ ഖലു പാപാത്മാ ഗന്ധർവൈർ ദുഷ്ടപൂരുഷഃ
4 ഇത്യ് അജൽപൻ മഹാരാജൻ പരാനീക വിശാതനം
     ദേശേ ദേശേ മനുഷ്യാശ് ച കീചകം ദുഷ്പ്രധർഷണം
5 അഥ വൈ ധാർതരാഷ്ട്രേണ പ്രയുക്താ യ ബഹിശ്ചരാഃ
     മൃഗയിത്വാ ബഹൂൻ ഗ്രാമാൻ രാഷ്ട്രാണി നഗരാണി ച
6 സംവിധായ യഥാദിഷ്ടം യഥാ ദേശപ്രദർശനം
     കൃതചിന്താ ന്യവർതന്ത തേ ച മാഗ പുരം പ്രതി
7 തത്ര ദൃഷ്ട്വാ തു രാജാനം കൗരവ്യം ധൃതരാഷ്ട്ര ജം
     ദോർണ കർണ കൃപൈഃ സാർധം ഭീഷ്മേണ ച മഹാത്മനാ
8 സംഗതം ഭ്രാതൃഭിശ് ചാപി ത്രിഗർതൈശ് ച മഹാരഥൈഃ
     ദുര്യോധനം സഭാമധ്യേ ആസീനം ഇദം അബ്രുവൻ
9 കൃതോ ഽസ്മാഭിഃ പരോ യത്നസ് തേഷാം അന്വേഷണേ സദാ
     പാണ്ഡവാനാം മനുഷ്യേന്ദ്ര തസ്മിൻ മഹതി കാനനേ
10 നിർജനേ മൃഗസങ്കീർണേ നാനാദ്രുമലതാവൃതേ
    ലതാപ്രതാന ബഹുലേ നാനാഗുൽമസമാവൃതേ
11 ന ച വിദ്മോ ഗതാ യേന പാർഥാഃ സ്യുർ ദൃഢവിക്രമാഃ
    മാർഗമാണാഃ പദന്യാസം തേഷു തേഷു തഥാ തഥാ
12 ഗിരികൂടേഷു തുംഗേഷു നാനാജനപദേഷു ച
    ജനാകീർണേഷു ദേശേഷു ഖർവടേഷു പരേഷു ച
13 നരേന്ദ്ര ബഹുശോ ഽന്വിഷ്ടാ നൈവ വിദ്മശ് ച പാണ്ഡവാൻ
    അത്യന്തഭാവം നഷ്ടാസ് തേ ഭദ്രം തുഭ്യം നരർഷഭ
14 വർത്മാന്യ് അന്വിഷ്യമാണാസ് തു രഥാനാം രഥസത്തമ
    കം ചിത് കാലം മനുഷ്യേന്ദ്ര സൂതാനാം അനുഗാ വയം
15 മൃഗയിത്വാ യഥാന്യായം വിദിതാർഥാഃ സ്മ തത്ത്വതഃ
    പ്രാപ്താ ദ്വാരവതീം സൂതാ ഋതേ പാർഥൈഃ പരന്തപ
16 ന തത്ര പാണ്ഡവാ രാജൻ നാപി കൃഷ്ണാ പതിവ്രതാ
    സർവഥാ വിപ്രനഷ്ടാസ് തേ നമസ് തേ ഭരതർഷഭ
17 ന ഹി വിദ്മോ ഗതിം തേഷാം വാസം വാപി മഹാത്മനാം
    പാണ്ഡവാനാം പ്രവൃത്തിം വാ വിദ്മഃ കർമാപി വാ കൃതം
    സ നഃ ശാധി മനുഷ്യേന്ദ്ര അത ഊർധ്വം വിശാം പതേ
18 അന്വേഷണേ പാണ്ഡവാനാം ഭൂയഃ കിം കരവാമഹേ
    ഇമാം ച നഃ പ്രിയാം ഈക്ഷ വാചം ഭദ്രവതീം ശുഭാം
19 യേന ത്രിഗർത്താ നികൃതാ ബലേന മഹതാ നൃപ
    സൂതേന രാജ്ഞോ മത്സ്യസ്യ കീചകേന മഹാത്മനാ
20 സ ഹതഃ പതിതഃ ശേതേ ഗന്ധർവൈർ നിശി ഭാരത
    അദൃശ്യമാനൈർ ദുഷ്ടാത്മാ സഹ ഭ്രാതൃഭിർ അച്യുത
21 പ്രിയം ഏതദ് ഉപശ്രുത്യ ശത്രൂണാം തു പരാഭവം
    കൃതകൃത്യശ് ച കൗരവ്യ വിധത്സ്വ യദ് അനന്തരം