മഹാഭാരതം മൂലം/വിരാടപർവം/അധ്യായം50
| ←അധ്യായം49 | മഹാഭാരതം മൂലം/വിരാടപർവം രചന: അധ്യായം50 |
അധ്യായം51→ |
1 [വൈ]
അപയാതേ തു രാധേയേ ദുര്യോധന പുരോഗമാഃ
അനീകേന യഥാ സ്വേന ശരൈർ ആർച്ഛന്ത പാണ്ഡവം
2 ബഹുധാ തസ്യ സൈന്യസ്യ വ്യൂഢസ്യാപതതഃ ശരൈഃ
അഭിയാനീയം ആജ്ഞായ വൈരാടിർ ഇദം അബ്രവീത്
3 ആസ്ഥായ രുചിരം ജിഷ്ണോ രഥം സാരഥിനാ മയാ
കതമദ് യാസ്യസേ ഽനീക മുക്തോ യാസ്യാമ്യ് അഹം ത്വയാ
4 [അർജ്]
ലോഹിതാക്ഷം അരിഷ്ടം യം വൈയാഘ്രം അനുപശ്യസി
നീലാം പതാകാം ആശ്രിത്യ രഥേ തിഷ്ഠന്തം ഉത്തര
5 കൃപസ്യൈതദ് രഥാനീകം പ്രാപയസ്വൈതദ് ഏവ മാം
ഏതസ്യ ദർശയിഷ്യാമി ശീഘ്രാസ്ത്രം ദൃഢധന്വിനഃ
6 കമണ്ഡലുർ ധ്വജേ യസ്യ ശാതകുംഭമയഃ ശുഭഃ
ആചാര്യ ഏഷ വൈ ദ്രോണഃ സർവശസ്ത്രഭൃതാം വരഃ
7 സുപ്രസന്നമനാ വീര കുരുഷ്വൈനം പ്രദക്ഷിണം
അത്രൈവ ചാവിരോധേന ഏഷ ധർമഃ സനാതനഃ
8 യദി മേ പ്രഥമം ദ്രോണഃ ശരീരേ പ്രഹരിഷ്യതി
തതോ ഽസ്യ പ്രഹരിഷ്യാമി നാസ്യ കോപോ ഭവിഷ്യതി
9 അസ്യാവിദൂരേ തു ധനുർ ധ്വജാഗ്രേ യസ്യ ദൃശ്യതേ
ആചാര്യസ്യൈഷ പുത്രോ വൈ അശ്വത്ഥാമാ മഹാരഥഃ
10 സദാ മമൈഷ മാന്യശ് ച സർവശസ്ത്രഭൃതാം അപി
ഏതസ്യ ത്വം രഥം പ്രാപ്യ നിവർതേഥാഃ പുനഃ പുനഃ
11 യ ഏഷ തു രഥാനീകേ സുവർണകവചാവൃതഃ
സേനാഗ്ര്യേണ തൃതീയേന വ്യവഹാര്യേണ തിഷ്ഠതി
12 യസ്യ നാഗോ ധ്വജാഗ്രേ വൈ ഹേമകേതന സംശ്രിതഃ
ധൃതരാഷ്ട്രാത്മജഃ ശ്രീമാൻ ഏഷ രാജാ സുയോധനഃ
13 ഏതസ്യാഭിമുഖം വീര രഥം പരരഥാരുജഃ
പ്രാപയസ്വൈഷ തേജോ ഽഭിപ്രമാഥീ യുദ്ധദുർമദഃ
14 ഏഷ ദ്രോണസ്യ ശിഷ്യാണാം ശീഘ്രാസ്ത്രഃ പ്രഥമോ മതഃ
ഏതസ്യ ദർശയിഷ്യാമി ശീഘ്രാസ്ത്രം വിപുലം ശരൈഃ
15 നാഗകക്ഷ്യാ തു രുചിരാ ധ്വജാഗ്രേ യസ്യ തിഷ്ഠതി
ഏഷ വൈകർതനഃ കർണോ വിദിതഃ പൂർവം ഏവ തേ
16 ഏതസ്യ രഥം ആസ്ഥായ രാധേയസ്യ ദുരാത്മനഃ
യത്തോ ഭവേഥാഃ സംഗ്രാമേ സ്പർധത്യ് ഏഷ മയാ സദാ
17 യസ് തു നീലാനുസാരേണ പഞ്ച താരേണ കേതുനാ
ഹസ്താവാപീ ബൃഹദ് ധന്വാ രഥേ തിഷ്ഠതി വീര്യവാൻ
18 യസ്യ താരാർക ചിത്രോ ഽസൗ രഥേ ധ്വജവരഃ സ്ഥിതഃ
യസ്യൈതത് പാണ്ഡുരം ഛത്രം വിമലം മൂർധ്നി തിഷ്ഠതി
19 മഹതോ രഥവംശസ്യ നാനാ ധ്വജപതാകിനഃ
ബലാഹകാഗ്രേ സൂര്യോ വാ യ ഏഷ പ്രമുഖേ സ്ഥിഥ
20 ഹൈമം ചന്ദ്രാർകസങ്കാശം കവചം യസ്യ ദൃശ്യതേ
ജാതരൂപശിരസ് ത്രാണസ് ത്രാസയന്ന് ഇവ മേ മനഃ
21 ഏഷ ശാന്തനവോ ഭീഷ്മഃ സർവേഷാം നഃ പിതാമഹഃ
രാജശ്രിയാവബദ്ധസ് തു ദുര്യോധന വശാനുഗഃ
22 പശ്ചാദ് ഏഷ പ്രയാതവ്യോ ന മേ വിഘ്നകരോ ഭവേത്
ഏതേന യുധ്യമാനസ്യ യത്തഃ സംയച്ഛ മേ ഹയാൻ
23 തതോ ഽഭ്യവഹദ് അവ്യഗ്രോ വൈരാടിഃ സവ്യസാചിനം
യത്രാതിഷ്ഠത് കൃപോ രാജൻ യോത്സ്യമാനോ ധനഞ്ജയം