മഹാഭാരതം മൂലം/സഭാപർവം/അധ്യായം3
| ←അധ്യായം2 | മഹാഭാരതം മൂലം/സഭാപർവം രചന: അധ്യായം3 |
അധ്യായം4→ |
1 [വ്]
അഥാബ്രവീൻ മയഃ പാർഥം അർജുനം ജയതാം വരം
ആപൃച്ഛേ ത്വാം ഗമിഷ്യാമി ക്ഷിപ്രം ഏഷ്യാമി ചാപ്യ് അഹം
2 ഉത്തരേണ തു കൈലാസം മൈനാകം പർവതം പ്രതി
യക്ഷ്യമാണേഷു സർവേഷു ദാനവേഷു തദാ മയാ
കൃതം മണിമയം ഭാണ്ഡം രമ്യം ബിന്ദുസരഃ പ്രതി
3 സഭായാം സത്യസന്ധസ്യ യദ് ആസീദ് വൃഷപർവണഃ
ആഗമിഷ്യാമി തദ്ഗൃഹ്യ യദി തിഷ്ഠതി ഭാരത
4 തതഃ സഭാം കരിഷ്യാമി പാണ്ഡവായ യശോ വിനേ
മനഃ പ്രഹ്ലാദിനീം ചിത്രാം സർവരത്ര വിഭൂഷിതാം
5 അസ്തി ബിന്ദുസരസ്യ് ഏവ ഗദാ ശ്രേഷ്ഠാ കുരൂദ്വഹ
നിഹിതാ യൗവനാശ്വേന രാജ്ഞാ ഹത്വാ രണേ രിപൂൻ
സുവർണബിന്ദുഭിശ് ചിത്രാ ഗുർവീ ഭാരസഹാ ദൃഢാ
6 സാ വൈ ശതസഹസ്രസ്യ സംമിതാ സർവഘാതിനീ
അനുരൂപാ ച ഭീമസ്യ ഗാണ്ഡീവം ഭവതോ യഥാ
7 വാരുണശ് ച മഹാശംഖോ ദേവദത്തഃ സുഘോഷവാൻ
സർവം ഏതത് പ്രദാസ്യാമി ഭവതേ നാത്ര സംശയഃ
ഇത്യ് ഉക്ത്വാ സോ ഽസുരഃ പാർഥം പ്രാഗ് ഉദീചീം അഗാദ് ദിശം
8 ഉത്തരേണ തു കൈലാസം മൈനാകം പർവതം പ്രതി
ഹിരണ്യശൃംഗോ ഭഗവാൻ മഹാമണിമയോ ഗിരിഃ
9 രമ്യം ബിന്ദുസരോ നാമ യത്ര രാജാ ഭഗീരഥഃ
ദൃഷ്ട്വാ ഭാഗീരഥീം ഗംഗാം ഉവാസ ബഹുലാഃ സമാഃ
10 യത്രേഷ്ട്വാ സർവഭൂതാനാം ഈശ്വരേണ മഹാത്മനാ
ആഹൃതാഃ ക്രതവോ മുഖ്യാഃ ശതം ഭരതസത്തമ
11 യത്ര യൂപാ മണിമയാശ് ചിത്യാശ് ചാപി ഹിരൻ മയാഃ
ശോഭാർഥം വിഹിതാസ് തത്ര ന തു ദൃഷ്ടാന്തതഃ കൃതാഃ
12 യത്രേഷ്ട്വാ സ ഗതഃ സിദ്ധിം സഹസ്രാക്ഷഃ ശചീപതിഃ
യത്ര ഭൂതപതിഃ സൃഷ്ട്വാ സർവലോകാൻ സനാതനഃ
ഉപാസ്യതേ തിഗ്മതേജാ വൃതോ ഭൂതൈഃ സഹസ്രശഃ
13 നരനാരായണൗ ബ്രഹ്മാ യമഃ സ്ഥാണുശ് ച പഞ്ചമഃ
ഉപാസതേ യത്ര സത്രം സഹസ്രയുഗപര്യയേ
14 യത്രേഷ്ടം വാസുദേവേന സർവൈർ വർഷസഹസ്രകൈഃ
ശ്രദ്ദധാനേന സതതം ശിഷ്ടസമ്പ്രതിപത്തയേ
15 സുവർണമാലിനോ യൂപാശ് ചിത്യാശ് ചാപ്യ് അതി ഭാസ്വരാഃ
ദദൗ യത്ര സഹസ്രാണി പ്രയുതാനി ച കേശവഃ
16 തത്ര ഗത്വാ സ ജഗ്രാഹ ഗദാം ശംഖം ച ഭാരത
സ്ഫാടികം ച സഭാ ദ്രവ്യം യദ് ആസീദ് വൃഷപർവണഃ
കിങ്കരൈഃ സഹ രക്ഷോഭിർ അഗൃഹ്ണാത് സർവം ഏവ തത്
17 തദ് ആഹൃത്യ തു താം ചക്രേ സോ ഽസുരോ ഽപ്രതിമാം സഭാം
വിശ്രുതാം ത്രിഷു ലോകേഷു ദിവ്യാം മണിമയീം ശുഭാം
18 ഗദാം ച ഭീമസേനായ പ്രവരാം പ്രദദൗ തദാ
ദേവദത്തം ച പാർഥായ ദദൗ ശംഖം അനുത്തമം
19 സഭാ തു സാ മഹാരാജ ശാതകുംഭമയ ദ്രുമാ
ദശ കിഷ്കു സഹസ്രാണി സമന്താദ് ആയതാഭവത്
20 യഥാ വഹ്നേർ യഥാർകസ്യ സോമസ്യ ച യഥൈവ സാ
ഭ്രാജമാനാ തഥാ ദിവ്യാ ബഭാര പരമം വപുഃ
21 പ്രതിഘ്നതീവ പ്രഭയാ പ്രഭാം അർകസ്യ ഭാസ്വരാം
പ്രബഭൗ ജ്വലമാനേവ ദിവ്യാ ദിവ്യേന വർചസാ
22 നഗമേഘപ്രതീകാശാ ദിവം ആവൃത്യ വിഷ്ഠിതാ
ആയതാ വിപുലാ ശ്ലക്ഷ്ണാ വിപാപ്മാ വിഗതക്ലമാ
23 ഉത്തമദ്രവ്യസമ്പന്നാ മണിപ്രാകാരമാലിനീ
ബഹുരത്നാ ബഹുധനാ സുകൃതാ വിശ്വകർമണാ
24 ന ദാശാർഹീ സുധർമാ വാ ബ്രഹ്മണോ വാപി താദൃശീ
ആസീദ് രൂപേണ സമ്പന്നാ യാം ചക്രേ ഽപ്രതിമാം മയഃ
25 താം സ്മ തത്ര മയേനോക്താ രക്ഷന്തി ച വഹന്തി ച
സഭാം അഷ്ടൗ സഹസ്രാണി കിങ്കരാ നാമ രാക്ഷസാഃ
26 അന്തരിക്ഷചരാ ഘോരാ മഹാകായാ മഹാബലാഃ
രക്താക്ഷാഃ പിംഗലാക്ഷാശ് ച ശുക്തികർണാഃ പ്രഹാരിണഃ
27 തസ്യാം സഭായാം നലിനീം ചകാരാപ്രതിമാം മയഃ
വൈഡൂര്യ പത്രവിതതാം മണിനാല മയാംബുജാം
28 പദ്മസൗഗന്ധിക വതീം നാനാദ്വിജ ഗണായുതാം
പുഷ്പിതൈഃ പങ്കജൈശ് ചിത്രാം കൂർമമത്സ്യൈശ് ച ശോഭിതാം
29 സൂപതീർഥാം അകലുഷാം സർവർതുസലിലാം ശുഭാം
മാരുതേനൈവ ചോദ്ധൂതൈർ മുക്താ ബിന്ദുഭിർ ആചിതാം
30 മണിരത്നചിതാം താം തു കേ ചിദ് അഭ്യേത്യ പാർഥിവാഃ
ദൃഷ്ട്വാപി നാഭ്യജാനന്ത തേ ഽജ്ഞാനാത് പ്രപതന്ത്യ് ഉത
31 താം സഭാം അഭിതോ നിത്യം പുഷ്പവന്തോ മഹാദ്രുമാഃ
ആസൻ നാനാവിധാ നീലാഃ ശീതച് ഛായാ മനോരമാഃ
32 കാനനാനി സുഗന്ധീനി പുഷ്കരിണ്യശ് ച സർവശഃ
ഹംസകാരണ്ഡവ യുതാശ് ചക്രവാകോപശോഭിതാഃ
33 ജലജാനാം ച മാല്യാനാം സ്ഥലജാനാം ച സർവശഃ
മാരുതോ ഗന്ധം ആദായ പാണ്ഡവാൻ സ്മ നിഷേവതേ
34 ഈദൃശീം താം സഭാം കൃത്വാ മാസൈഃ പരി ചതുർദശൈഃ
നിഷ്ഠിതാം ധർമരാജായ മയോ രാജ്ഞേ ന്യവേദയത്