മഹാഭാരതം മൂലം/സഭാപർവം/അധ്യായം34

മഹാഭാരതം മൂലം/സഭാപർവം
രചന:വ്യാസൻ
അധ്യായം34

1 [ഷ്]
     നായം അർഹതി വാർഷ്ണേയസ് തിഷ്ഠത്സ്വ് ഇഹ മഹാത്മസു
     മഹീപതിഷു കൗരവ്യ രാജവത് പാർഥിവാർഹണം
2 നായം യുക്തഃ സമാചാരഃ പാണ്ഡവേഷു മഹാത്മസു
     യത് കാമാത് പുണ്ഡരീകാക്ഷം പാണ്ഡവാർചിതവാൻ അസി
3 ബാലാ യൂയം ന ജാനീധ്വം ധർമഃ സൂക്ഷ്മോ ഹി പാണ്ഡവാഃ
     അയം തത്രാഭ്യതിക്രാന്ത ആപഗേയോ ഽൽപദർശനഃ
4 ത്വാദൃശോ ധർമയുക്തോ ഹി കുർവാണഃ പ്രിയകാമ്യയാ
     ഭവത്യ് അഭ്യധികം ഭീഷ്മോ ലോകേഷ്വ് അവമതഃ സതാം
5 കഥം ഹ്യ് അരാജാ ദാശാർഹോ മധ്യേ സർവമഹീക്ഷിതാം
     അർഹണാം അർഹതി തഥാ യഥാ യുഷ്മാഭിർ അർചിതഃ
6 അഥ വാ മന്യസേ കൃഷ്ണം സ്ഥവിരം ഭരതർഷഭ
     വസുദേവേ സ്ഥിതേ വൃദ്ധേ കഥം അർഹതി തത് സുതഃ
7 അഥ വാ വാസുദേവോ ഽപി പ്രിയകാമോ ഽനുവൃത്തവാൻ
     ദ്രുപദേ തിഷ്ഠതി കഥം മാധവോ ഽർഹതി പൂജനം
8 ആചാര്യം മന്യസേ കൃഷ്ണം അഥ വാ കുരുപുംഗവ
     ദ്രോണേ തിഷ്ഠതി വാർഷ്ണേയം കസ്മാദ് അർചിതവാൻ അസി
9 ഋത്വിജം മന്യസേ കൃഷ്ണം അഥ വാ കുരുനന്ദന
     ദ്വൈപായനേ സ്ഥിതേ വിപ്രേ കഥം കൃഷ്ണോ ഽർചിതസ് ത്വയാ
10 നൈവ ഋത്വിൻ ന ചാചാര്യോ ന രാജാ മധുസൂദനഃ
    അർചിതശ് ച കുരുശ്രേഷ്ഠ കിം അന്യത് പ്രിയകാമ്യയാ
11 അഥ വാപ്യ് അർചനീയോ ഽയം യുഷ്മാകം മധുസൂദനഃ
    കിം രാജഭിർ ഇഹാനീതൈർ അവമാനായ ഭാരത
12 വയം തു ന ഭയാദ് അസ്യ കൗന്തേയസ്യ മഹാത്മനഃ
    പ്രയച്ഛാമഃ കരാൻ സർവേ ന ലോഭാൻ ന ച സാന്ത്വനാത്
13 അസ്യ ധർമപ്രവൃത്തസ്യ പാർഥിവ ത്വം ചികീർഷതഃ
    കരാൻ അസ്മൈ പ്രയച്ഛാമഃ സോ ഽയം അസ്മാൻ ന മന്യതേ
14 കിം അന്യദ് അവമാനാദ് ധി യദ് ഇമം രാജസംസദി
    അപ്രാപ്തലക്ഷണം കൃഷ്ണം അർഘ്യേണാർചിതവാൻ അസി
15 അകസ്മാദ് ധർമപുത്രസ്യ ധർമാത്മേതി യശോ ഗതം
    കോ ഹി ധർമച്യുതേ പൂജാം ഏവം യുക്താം പ്രയോജയേത്
    യോ ഽയം വൃഷ്ണികുലേ ജാതോ രാജാനം ഹതവാൻ പുരാ
16 അദ്യ ധർമാത്മതാ ചൈവ വ്യപകൃഷ്ടാ യുധിഷ്ഠിരാത്
    കൃപണത്വം നിവിഷ്ടം ച കൃഷ്ണേ ഽർഘ്യസ്യ നിവേദനാത്
17 യദി ഭീതാശ് ച കൗന്തേയാഃ കൃപണാശ് ച തപസ്വിനഃ
    നനു ത്വയാപി ബോദ്ധവ്യം യാം പൂജാം മാധവോ ഽർഹതി
18 അഥ വാ കൃപണൈർ ഏതാം ഉപനീതാം ജനാർദന
    പൂജാം അനർഹഃ കസ്മാത് ത്വം അഭ്യനുജ്ഞാതവാൻ അസി
19 അയുക്താം ആത്മനഃ പൂജാം ത്വം പുനർ ബഹു മന്യസേ
    ഹവിഷഃ പ്രാപ്യ നിഷ്യന്ദം പ്രാശിതും ശ്വേവ നിർജനേ
20 ന ത്വ് അയം പാർഥിവേന്ദ്രാണാം അവമാനഃ പ്രയുജ്യതേ
    ത്വാം ഏവ കുരവോ വ്യക്തം പ്രലംഭന്തേ ജനാർദന
21 ക്ലീബേ ദാരക്രിയാ യാദൃഗ് അന്ധേ വാ രൂപദർശനം
    അരാജ്ഞോ രാജവത് പൂജാ തഥാ തേ മധുസൂദന
22 ദൃഷ്ടോ യുധിഷ്ഠിരോ രാജാ ദൃഷ്ടോ ഭീഷ്മശ് ച യാദൃശഃ
    വാസുദേവോ ഽപ്യ് അയം ദൃഷ്ടഃ സർവം ഏതദ് യഥാതഥം
23 ഇത്യ് ഉക്ത്വാ ശിശുപാലസ് താൻ ഉത്ഥായ പരമാസനാത്
    നിര്യയൗ സദസസ് തസ്മാത് സഹിതോ രാജഭിസ് തദാ