മഹാഭാരതം മൂലം/സഭാപർവം/അധ്യായം56
| ←അധ്യായം55 | മഹാഭാരതം മൂലം/സഭാപർവം രചന: അധ്യായം56 |
അധ്യായം57→ |
1 [വി]
ദ്യൂതം മൂലം കലഹസ്യാനുപാതി; മിഥോ ഭേദായ മഹതേ വാ രണായ
യദ് ആസ്ഥിതോ ഽയം ധൃതരാഷ്ട്രസ്യ പുത്രോ; ദുര്യോധനഃ സൃജതേ വൈരം ഉഗ്രം
2 പ്രാതിപീയാഃ ശാന്തനവാ ഭൈമസേനാഃ സ ബാഹ്ലികാഃ
ദുര്യോധനാപരാധേന കൃച്ഛ്രം പ്രാപ്സ്യന്തി സർവശഃ
3 ദുര്യോധനോ മദേനൈവ ക്ഷേമം രാഷ്ട്രാദ് അപോഹതി
വിഷാണം ഗൗർ ഇവ മദാത് സ്വയം ആരുജതേ ബലാത്
4 യശ് ചിത്തം അന്വേതി പരസ്യ രാജൻ; വീരഃ കവിഃ സ്വാം അതിപത്യ ദൃഷ്ടിം
നാവം സമുദ്ര ഇവ ബാല നേത്രാം; ആരുഹ്യ ഘോരേ വ്യസനേ നിമജ്ജേത്
5 ദുര്യോധനോ ഗ്ലഹതേ പാണ്ഡവേന; പ്രിയായസേ ത്വം ജയതീതി തച് ച
അതിനർമാജ് ജായതേ സമ്പ്രഹാരോ; യതോ വിനാശഃ സമുപൈതി പുംസാം
6 ആകർഷസ് തേ ഽവാക്ഫലഃ കു പ്രണീതോ; ഹൃദി പ്രൗഢോ മന്ത്രപദഃ സമാധിഃ
യുധിഷ്ഠിരേണ സഫലഃ സംസ്തവോ ഽസ്തു; സാമ്നഃ സുരിക്തോ ഽരിമതേഃ സുധന്വാ
7 പ്രാതിപീയാഃ ശാന്തനവാശ് ച രാജൻ; കാവ്യാം വാചം ശൃണുത മാത്യഗാദ് വഃ
വൈശ്വാനരം പ്രജ്വലിതം സുഘോരം; അയുദ്ധേന പ്രശമയതോത്പതന്തം
8 യദാ മന്യും പാണ്ഡവോ ഽജാതശത്രുർ; ന സംയച്ഛേദ് അക്ഷമയാഭിഭൂതഃ
വൃകോദരഃ സവ്യസാചീ യമൗ ച; കോ ഽത്ര ദ്വീപഃ സ്യാത് തുമുലേ വസ് തദാനീം
9 മഹാരാജ പ്രഭവസ് ത്വം ധനാനാം; പുരാ ദ്യൂതാൻ മനസാ യാവദ് ഇച്ഛേഃ
ബഹു വിത്തം പാണ്ഡവാംശ് ചേജ് ജയേസ് ത്വം; കിം തേന സ്യാദ് വസു വിന്ദേഹ പാർഥാൻ
10 ജാനീമഹേ ദേവിതം സൗബലസ്യ; വേദ ദ്യൂതേ നികൃതിം പാർവതീയഃ
യതഃ പ്രാപ്തഃ ശകുനിസ് തത്ര യാതു; മായാ യോധീ ഭാരത പാർവതീയഃ