മഹാഭാരതം മൂലം/സഭാപർവം/അധ്യായം8

മഹാഭാരതം മൂലം/സഭാപർവം
രചന:വ്യാസൻ
അധ്യായം8

1 [ൻ]
     കഥയിഷ്യേ സഭാം ദിവ്യാം യുധിഷ്ഠിര നിബോധ താം
     വൈവസ്വതസ്യ യാം അർഥേ വിശ്വകർമാ ചകാര ഹ
2 തൈജസീ സാ സഭാ രാജൻ ബഭൂവ ശതയോജനാ
     വിസ്താരായാമ സമ്പന്നാ ഭൂയസീ ചാപി പാണ്ഡവ
3 അർകപ്രകാശാ ഭ്രാജിഷ്ണുഃ സർവതഃ കാമചാരിണീ
     നൈവാതിശീതാ നാത്യുഷ്ണാ മനസശ് ച പ്രഹർഷിണീ
4 ന ശോകോ ന ജരാ തസ്യാം ക്ഷുത്പിപാസേ ന ചാപ്രിയം
     ന ച ദൈന്യം ക്ലമോ വാപി പ്രതികൂലം ന ചാപ്യ് ഉത
5 സർവേ കാമാഃ സ്ഥിതാസ് തസ്യാം യേ ദിവ്യാ യേ ച മാനുഷാഃ
     രസവച് ച പ്രഭൂതം ച ഭക്ഷ്യഭോജ്യം അരിന്ദമ
6 പുണ്യഗന്ധാഃ സ്രജസ് തത്ര നിത്യപുഷ്പഫലദ്രുമാഃ
     രസവന്തി ച തോയാനി ശീതാന്യ് ഉഷ്ണാനി ചൈവ ഹ
7 തസ്യാം രാജർഷയഃ പുണ്യാസ് തഥാ ബ്രഹ്മർഷയോ ഽമലാഃ
     യമം വൈവസ്വതം താത പ്രഹൃഷ്ടാഃ പര്യുപാസതേ
8 യയാതിർ നഹുഷഃ പൂരുർ മാന്ധാതാ സോമകോ നൃഗഃ
     ത്രസദസ്യുശ് ച തുരയഃ കൃതവീര്യഃ ശ്രുതശ്രവാഃ
9 അരിപ്രണുത് സുസിംഹശ് ച കൃതവേഗഃ കൃതിർ നിമിഃ
     പ്രതർദനഃ ശിബിർ മത്സ്യഃ പൃഥ്വ് അക്ഷോ ഽഥ ബൃഹദ്രഥഃ
10 ഐഡോ മരുത്തഃ കുശികഃ സാങ്കാശ്യഃ സാങ്കൃതിർ ഭവഃ
    ചതുരശ്വഃ സദശ്വോർമിഃ കാർതവീര്യശ് ച പാർഥിവഃ
11 ഭരതസ് തഥാ സുരഥഃ സുനീഥോ നൈഷധോ നലഃ
    ദിവോദാസോ ഽഥ സുമനാ അംബരീഷോ ഭഗീരഥഃ
12 വ്യശ്വഃ സദശ്വോ വധ്ര്യ് അശ്വഃ പഞ്ച ഹസ്തഃ പൃഥുശ്രവാഃ
    രുഷദ്ഗുർ വൃഷസേനശ് ച ക്ഷുപശ് ച സുമഹാബലഃ
13 രുഷദ് അശ്വോ വസു മനാഃ പുരു കുത്സോ ധ്വജീ രഥീ
    ആർഷ്ടിഷേണോ ദിലീപശ് ച മഹാത്മാ ചാപ്യ് ഉശീനരഃ
14 ഔശീനരഃ പുണ്ഡരീകഃ ശര്യാതിഃ ശരഭഃ ശുചിഃ
    അംഗോ ഽരിഷ്ടശ് ച വേനശ് ച ദുഃഷന്തഃ സഞ്ജയോ ജയഃ
15 ഭാംഗാസ്വരിഃ സുനീഥശ് ച നിഷധോ ഽഥ ത്വിഷീ രഥഃ
    കരന്ധമോ ബാഹ്ലികശ് ച സുദ്യുമ്നോ ബലവാൻ മധുഃ
16 കപോത രോമാ തൃണകഃ സഹദേവാർജുനൗ തഥാ
    രാമോ ദാശരഥിശ് ചൈവ ലക്ഷ്മണോ ഽഥ പ്രതർദനഃ
17 അലർകഃ കക്ഷസേനശ് ച ഗയോ ഗൗരാശ്വ ഏവ ച
    ജാമദഗ്ന്യോ ഽഥ രാമോ ഽത്ര നാഭാഗ സഗരൗ തഥാ
18 ഭൂരി ദ്യുമ്നോ മഹാശ്വശ് ച പൃഥ്വ് അശ്വോ ജനകസ് തഥാ
    വൈന്യോ രാജാ വാരി ഷേണഃ പുരുജോ ജനമേജയഃ
19 ബ്രഹ്മദത്തസ് ത്രിഗർതശ് ച രാജോപരി ചരസ് തഥാ
    ഇന്ദ്ര ദ്യുമ്നോ ഭീമ ജാനുർ ഗയഃ പൃഷ്ഠോ നയോ ഽനഘ
20 പദ്മോ ഽഥ മുചുകുന്ദശ് ച ഭൂരി ദ്യുമ്നഃ പ്രസേനജിത്
    അരിഷ്ടനേമിഃ പ്രദ്യുമ്നഃ പൃഥഗ് അശ്വോ ഽജകസ് തഥാ
21 ശതം മത്സ്യാ നൃപതയഃ ശതം നീപാഃ ശതം ഹയാഃ
    ധൃതരാഷ്ട്രാശ് ചൈകശതം അശീതിർ ജനമേജയാഃ
22 ശതം ച ബ്രഹ്മദത്താനാം ഈരിണാം വൈരിണാം ശതം
    ശന്തനുശ് ചൈവ രാജർഷിഃ പാണ്ഡുശ് ചൈവ പിതാ തവ
23 ഉശദ് ഗവഃ ശതരഥോ ദേവരാജോ ജയദ്രഥഃ
    വൃഷാ ദർഭിശ് ച രാജർഷിർ ധാമ്നാ സഹ സമന്ത്രിണാ
24 അഥാപരേ സഹസ്രാണി യേ ഗതാഃ ശശബിന്ദവഃ
    ഇഷ്ട്വാശ്വമേധൈർ ബഹുഭിർ മഹദ്ഭിർ ഭൂരിദക്ഷിണൈഃ
25 ഏതേ രാജർഷയഃ പുണ്യാഃ കീർതിമന്തോ ബഹുശ്രുതാഃ
    തസ്യാം സഭായാം രാജർഷേ വൈവസ്വതം ഉപാസതേ
26 അഗസ്ത്യോ ഽഥ മതംഗശ് ച കാലോ മൃത്യുസ് തഥൈവ ച
    യജ്വാനശ് ചൈവ സിദ്ധാശ് ച യേ ച യോഗശരീരിണഃ
27 അഗ്നിഷ്വ് ആത്താശ് ച പിതരഃ ഫേനപാശ് ചോഷ്മപാശ് ച യേ
    സ്വധാവന്തോ ബർഹി ഷദോ മൂർതിമന്തസ് തഥാപരേ
28 കാലചക്രം ച സാക്ഷാച് ച ഭഗവാൻ ഹവ്യവാഹനഃ
    നരാ ദുഷ്കൃതകർമാണോ ദക്ഷിണായന മൃത്യവഃ
29 കാലസ്യ നയനേ യുക്താ യമസ്യ പുരുഷാശ് ച യേ
    തസ്യാം ശിംശപ പാലാശാസ് തഥാ കാശകുശാദയഃ
    ഉപാസതേ ധർമരാജം മൂർതിമന്തോ നിരാമയാഃ
30 ഏതേ ചാന്യേ ച ബഹവഃ പിതൃരാജ സഭാ സദഃ
    അശക്യാഃ പരിസംഖ്യാതും നാമഭിഃ കർമഭിസ് തഥാ
31 അസംബാധാ ഹി സാ പാർഥ രമ്യാ കാമഗമാ സഭാ
    ദീർഘകാലം തപസ് തപ്ത്വാ നിർമിതാ വിശ്വകർമണാ
32 പ്രഭാസന്തീ ജ്വലന്തീവ തേജസാ സ്വേന ഭാരത
    താം ഉഗ്രതപസോ യാന്തി സുവ്രതാഃ സത്യവാദിനഃ
33 ശാന്താഃ സംന്യാസിനഃ സിദ്ധാ പൂതാഃ പുണ്യേന കർമണാ
    സർവേ ഭാസ്വരദേഹാശ് ച സർവേ ച വിരജോഽംബരാഃ
34 ചിത്രാംഗദാശ് ചിത്രമാല്യാഃ സർവേ ജ്വലിതകുണ്ഡലാഃ
    സുകൃതൈഃ കർമഭിഃ പുണ്യൈഃ പരിബർഹൈർ വിഭൂഷിതാഃ
35 ഗന്ധർവാശ് ച മഹാത്മാനഃ ശതശശ് ചാപ്സരോഗണാഃ
    വാദിത്രം നൃത്തഗീതം ച ഹാസ്യം ലാസ്യം ച സർവശഃ
36 പുണ്യാശ് ച ഗന്ധാഃ ശബ്ദാശ് ച തസ്യാം പാർഥ സമന്തതഃ
    ദിവ്യാനി മാല്യാനി ച താം ഉപതിഷ്ഠന്തി സർവശഃ
37 ശതം ശതസഹസ്രാണി ധർമിണാം തം പ്രജേശ്വരം
    ഉപാസതേ മഹാത്മാനം രൂപയുക്താ മനസ്വിനഃ
38 ഈദൃശീ സാ സഭാ രാജൻ പിതൃരാജ്ഞോ മഹാത്മനഃ
    വരുണസ്യാപി വക്ഷ്യാമി സഭാം പുഷ്കര മാലിനീം