ശിവപുരാണം/രുദ്രാക്ഷമാഹാത്മ്യം

രുദ്രാക്ഷമാഹാത്മ്യം

• ഇനിക്കേട്ടുകൊണ്ടാലുമാനന്ദമോടെ
• മുനിശ്രോത്രിയന്മാർ ഭവാന്മാരശേഷം:
• ജനിക്കും മരിക്കും മനുഷ്യപ്രപഞ്ചം
• നിനയ്ക്കുന്നനേരം നമുക്കുണ്ടു ഭീതി
• മഹാഘോരസംസാരപാരം ലഭിക്കാൻ
• അഹോ കഷ്ടമാർക്കും മനസ്സില്ല പാർത്താൽ.
• മരിക്കുംവിധൗ ഭീതികൂടാതിരിക്കാൻ
• ധരിക്കേണമംഗേഷു രുദ്രാക്ഷദാമം
• ഇരിക്കുന്ന കാലം മഹാവ്യാധി നീങ്ങും
• മരിക്കും ദശായാം ഭയം ചെറ്റുമില്ല
• ഇനിജ്ജന്മദുഃഖങ്ങളുണ്ടാകയില്ലാ
• തനിച്ചോരു രുദ്രാക്ഷമംഗേ ധരിച്ചാൽ
• സഹസ്രം ധരിക്കും നരൻമാരെ നിത്യം
• സഹസ്രാക്ഷനുംകൂടെ വന്ദിക്കുമല്ലോ
• സഹസ്രം ധരിപ്പാനതിക്ലേശമെങ്കിൽ
• വഹിക്കുന്നവണ്ണം ലഭിക്കുന്നു ലോകേ.
• പതുപ്പത്തുമാറാറുമാം ബാഹുമൂലേ
• ഹിതം പന്തിരണ്ടിതു പാണിദ്വയാന്തേ
• ഉരസ്സിങ്കൽ നൂറ്റെട്ടു രുദ്രാക്ഷബീജം
• ശിരസ്സിങ്കലും നാല്പതാവശ്യമല്ലോ
• തഥാ കണ്ഠദേശത്തു മുപ്പത്തുരണ്ടും
• തഥാ കാതിലാറാറുമോരോന്നുമാം പോൽ
• ശിഖാഗ്രത്തിലേകം തദേവം ധരിച്ചാൽ
• സുഖാനന്ദമോക്ഷങ്ങളാരോഗ്യമുണ്ടാം
• സമസ്തം ലഭിക്കും ജയിക്കും നരന്മാരമന്ദ-
• പ്രമോദേന ജീവിച്ചിരിക്കുന്നനേരം
• ധരിക്കുന്ന രുദ്രാക്ഷമാലാന്തരാളേ
• നിരപ്പുള്ള രത്നങ്ങളും വെള്ളി പൊന്നും
• പളുങ്കെങ്കിലും കോർത്തുകൊണ്ടാസ്ഥയോടെ
• കളങ്കം വരായ് വാനലങ്കാരമംഗേ
• ധരിച്ചും ജപിച്ചും ഗിരീശസ്വരൂപം
• സ്മരിച്ചും വസിക്കുന്ന മർത്ത്യൻ മരിച്ചാൽ
• സദാനന്ദലോകേ സദാ വാണിരിക്കും
• മുദാ ശംഭുസായുജ്യസാമ്രാജ്യമോടെ.
• സരുദ്രാക്ഷമായി ജ്ജപിക്കുന്ന മന്ത്രം
• വരുത്തും ഫലത്തിന്നഹോ സംഖ്യയില്ലാ
• സരുദ്രാക്ഷനായുള്ള മർത്ത്യന്നു പാർത്താൽ
• ദരിദ്രത്വമായുളളതുണ്ടാകയില്ല
• അരുദ്രാക്ഷമായാലശുദ്ധം ശരീരം
• സരുദ്രാക്ഷമായാലവൻ രുദ്രതുല്യൻ
• ശുഭം ജഹ്നു കന്യാ ജലസ്നാനപുണ്യം
• ലഭിച്ചീടുമങ്ഗേഷു രുദ്രാക്ഷധാരിം.
• മുഖം നാലുമഞ്ചും പതിന്നാലുമൊന്നും
• സുഖം ദുർല്ലഭം പാരമേകാദശാസ്യം
• ധരിക്കാമിതെല്ലാമൊരിക്കാലുമാപ
• ത്തിരിക്കാ ധരിക്കുന്ന സൽപുരുഷങ്കൽ.
• യജിക്കുന്ന പുണ്യം നമിക്കുന്ന പുണ്യം
• ലഭിക്കുന്ന പുണ്യം ജപിക്കുന്ന പുണ്യം
• സമസ്തം ഫലം കോടികോടി പ്രസിദ്ധം
• ക്രമത്താൽ ധരിക്കുന്ന രുദ്രാക്ഷധാരി
• പുരാവൃത്തമൊന്നിന്നു ചൊല്ലീടുവൻ ഞാൻ
• നരന്മാർക്കു രുദ്രാക്ഷതത്ത്വം ഗ്രഹിപ്പാൻ :
• പുരാണോക്തമായുള്ള കാശ്മീരദേശേ
• പുരാ ഭദ്രസേനാഖ്യനുണ്ടായി ഭൂപൻ
• അവന്നുണ്ടു പുത്രൻ സുധർമ്മാഭിധാനൻ
• ശിവൻ തന്നിലൂന്നുന്ന ഭക്ത്യാ വിശേഷാൽ.
• അവന്റെ വയസ്യൻ മഹാമന്ത്രിപുത്രൻ
• ശിവാരാധനേ തൽപരൻ താരകാഖ്യൻ
• മുദാ രണ്ടുപേരും ക്രമത്താൽ വളർന്നു
• തദാ തമ്മിലത്യന്തസൗഹാർദ്ദമോടെ.
• സമം വേദവേദാന്തശാസ്ത്രങ്ങളെല്ലാം
• അമന്ദപ്രകാശം ഗ്രഹിച്ചാരുദാരം
• വെളുക്കുന്ന നേരം കുളിക്കും നിതാന്തം
• വെളുപ്പുള്ള ഭസ്മം ശരീരേ ധരിക്കും
• അനേകപ്രകാരേണ രുദ്രാക്ഷമംഗേ
• ദിനാരംഭകാലേ ധരിച്ചാസ്ഥയോടെ
• ശിവക്ഷേത്ര പാർശ്വ വസിക്കും ന്യസിക്കും
• ശിവസ്തോത്രമന്ത്രം ജപിക്കും നമിക്കും
• ഗിരീശസ്വരൂപം നിരൂപിച്ചു ചിത്തേ
• നിരൂഢപ്രമോദം രമിക്കും നമിക്കും.
• പുരം പുക്കൊരിക്കൽ ഭുജിക്കും ഗമിക്കും
• സ്മരാരാതിദേവാലയേ ചെന്നിരിക്കും
• പുരാണങ്ങൾ വായിച്ചു നേരം കഴിക്കും
• നിരാതങ്കമാനന്ദമോടെ വസിക്കും.
• അവർക്കന്നു രത്നം ചരൽക്കല്ലുപോലെ
• സുവർണ്ണം തകർന്നോരു മാടോടുപോലെ
• പുരം പുല്ലുപോലെ, ധരാ കാടുപോലെ
• കുരംഗാക്ഷിമാരും മരപ്പാവപോലെ.
• കരേ കങ്കണം കുണ്ഡലം കർണ്ണദേശ
• ശിരസ്സിൽ കിരീടം മണിമാല മാറിൽ
• സമസ്തം ശിശുക്കൾക്കു രുദ്രാക്ഷജാലം
• സമത്വം മനക്കാമ്പിലുണ്ടാകമൂലം.
• മുദാ താപസാഗ്രേസരൻ വ്യാസതാതൻ
• തദാവാസമൻപോടെഴുന്നള്ളി വേഗാൽ.
• മുദാ സല്ക്കരിച്ചീടിനാൻ ഭദ്രസേനൻ
• പദാന്തേ വണങ്ങിപ്പറഞ്ഞാനി വണ്ണം:
• നമസ്തേ മുനിശ്രേഷ്ഠ! ദീനകബദ്ധോ!
• സമസ്തം മഹാപുണ്യരാശ! മഹാത്മൻ!
• സുധർമ്മാഖ്യനാകും മദീയാത്മജന്റെ
• വിധം കാൺക നീ രാജധർമ്മം ത്യജിച്ചാൻ;
• അമാത്യാത്മജൻ താരകൻ താനുമേവം
• മമാജ്ഞാവശത്താലഹോ രണ്ടുപേരും
• കുളിക്കുന്നു കാലേ ജപിക്കുന്നു മന്ത്രം
• വിളിക്കുന്നനേരം വരുന്നില ബാലൻ.
• ധരിക്കുന്നു ഭസ്മം സദാ കണ്ണടച്ച
• ങ്ങിരിക്കുന്നു രുദ്രാക്ഷ മംഗേ നിറച്ചു
• സുവർണ്ണത്തിലും വാഞ്ഛമൽ പുത്രനില്ല
• ഇവണ്ണം വരാനെന്തു ബന്ധം മുനീന്ദ്ര!
• അഹോ രണ്ടുപേർക്കും മനക്കാമ്പിലോർത്താൽ
• അഹോരാത്രമീ ക്ഷേത്രവാസം സുഖംപോൽ
• വെറും ഭസ്മവും തേച്ചു ദീക്ഷിച്ചിരിപ്പാൻ
• ചെറുപ്പത്തിലീവണ്ണമാവശ്യമുണ്ടോ?
• പറഞ്ഞാൽ കണക്കില്ല വല്ലാത്ത ശീലം
• കുറഞ്ഞോരുകാലം ക്ഷമിക്കെന്നുവെച്ചു.
• അലങ്കാരമെല്ലാം വിശേഷം നൃപന്മാർ
• ക്കലംഭാവമില്ലാത്ത കാലം ശിശുത്വം
• ഇതൊന്നും ഫലം ചെയ്യില്ലെന്നുറച്ചു
• ഹിതം നോക്കി നിൽക്കുന്നു ഞാനും മുനീന്ദ്ര!
• ഇവർക്കിങ്ങനെ ഭക്തി വിശ്വാസപൂർവം
• ശിവധ്യാനതാല്പര്യമുല്പന്നമാവാൻ
• അറിഞ്ഞീല ഞാൻ കാരണം ചാരുബുദ്ധേ!
• പറഞ്ഞാലുമെന്നോടു തത്ത്വം മുനീന്ദ്ര!
• മുനീന്ദ്രൻ പറഞ്ഞു: സഖേ! ഭദ്രസേന!
• മനോജ്ഞം ശിശുക്കൾക്കു ശീലം വിശുദ്ധം
• ഗ്രഹിച്ചാലുമിപ്പോളിവർക്കുള്ള ഭക്തി-
• ഗ്രഹത്തിന്നു മൂലം പറഞ്ഞീടുവൻ ഞാൻ
• ജനിച്ചു പുരാ നന്ദികഗ്രാമമദ്ധെ
• തനിച്ചോരു വേശ്യാംഗനാ ദേവദാസി
• മഹാനന്ദയെന്നുള്ള നാമം പ്രസിദ്ധം
• മഹാവേശ്യ വിശ്വത്തിലീവണ്ണമില്ലാ.
• മുഖം ചന്ദ്രതുല്യം മുലക്കുന്നു രണ്ടും
• സുഖം പൊന്മണിക്കുന്നു സംഭാവനീയം
• ഘനം കേശപാശം മനക്കാമ്പിളക്കാ.
• നനംഗന്റെ നീലക്കൊടിക്കൂറ പോലെ
• ഇളംപുഞ്ചിരിക്കൊഞ്ചലും കൺമയക്കും
• വിളങ്ങും മണികുണ്ഡലം ഗണ്ഡഭാഗേ
• നറും ചില്ലിവില്ലോടുമുല്ലാസഭാവം
• നിറം ചെമ്പകപ്പൂവിനൊപ്പം പിടിക്കും
• ചുരുക്കങ്ങൾ മദ്ധ്യേ പെരുക്കും നിതംബേ
• ചരിക്കുന്ന ഭംഗി കരിക്കും ലഭിക്കും
• കടക്കണ്ണിലുണ്ടായ കാഞ്ജാ സ്ത്രജാലം
• തൊടുക്കും മിടുക്കുള്ള കാമിക്കു നേരേ.
• അടുക്കുന്ന ശൃംഗാരവാന്മാരശേഷം
• കൊടുക്കുന്നു വിത്തം മടിക്കാതവണ്ണം
• പടിക്കൽ തുടങ്ങിപ്പടിഞ്ഞാറ്റയോളം
• കിടക്കുന്ന വിത്തത്തിനോ സംഖ്യയില്ലാ
• കിടക്കപ്പുരയ്ക്കുള്ളിലെക്കോപ്പുകണ്ടാ
• ലടക്കം വരാ വിത്തനാഥപ്രിയയ്ക്കും
• മണിക്കട്ടിലും മെത്തയും മേൽവിരിപ്പും
• മണിത്തൊങ്ങലും പട്ടു മേൽക്കട്ടിയും താൻ
• മണം പെയ്യുമയ്യായിരം പുഷ്പമാലാ
• ഗുണം ചേർന്ന വസ്തുക്കൾ കസ്തൂരിഗന്ധം
• അനംഗസ്വരൂപങ്ങളോടങ്ങുമിങ്ങും
• ജനത്തിന്റെ ചേതസ്സിളക്കും വിളക്കും
• മണിപ്പെട്ടകം പെട്ടി തട്ടും നിരക്കെ
• മണിപ്പൊൻകുടം ചെപ്പു കണ്ണാടി ദീപം
• വിളങ്ങുന്ന ഹാരം നിറഞ്ഞുള്ള കുംഭ
• ങ്ങളും ഭംഗിയോടെ കിളിക്കുടനേകം
• കളിക്കുങ്കുമപ്പാവ വെള്ളിക്കപോതം
• കളിക്കോകിലം ബാലലീലാചകോരം
• മഹാമൗക്തികം വിദ്രുമം പുഷ്യരാഗം
• മഹാനീലമിത്യാദി രത്നപ്രപഞ്ചം.
• മഹാനന്ദതന്റെ മഹാഭാഗ്യമോർത്താൽ
• മഹാലക്ഷ്മിപോലും മടങ്ങുംമഹീശ!
• വിടന്മാർകൊടുക്കുന്ന വിത്തത്തെവെപ്പാ
• നിടം പോര തൻവീട്ടിലഞ്ഞൂറുകെട്ടും
• അടങ്ങുന്ന ദ്രവ്യങ്ങളൊക്കെ ഗണിപ്പാൻ
• തുടങ്ങുന്ന ഭോഷൻ മടങ്ങും നര്രേന്ദ!
• ഇതിപ്രാഡയാം ദേവദാസിക്കു പാർത്താ-
• ലതിസ്ഫീതയാ ഭക്തിചന്ദ്രാർദ്ധമൗലൗ
• അനംഗാരിതന്റെ ചരിത്രങ്ങൾ കേട്ടാ
• ലനങ്ങാതിരിക്കും സ്മരിക്കും ധരിക്കും
• മമ സ്വാമിസാക്ഷാലുമാകാന്തനെന്നും
• മമത്വം മനസ്സിൽക്കനപ്പിച്ചു വാണാൾ
• മഹാബ്രാഹ്മണന്മാരിലത്യന്തഭക്ത്യാ
• മഹാദേവനാമം ജപിക്കുന്നദാസി
• മഹാഡംബരംപുണ്ടുകോപ്പിട്ടിരിക്കും
• മഹാനന്ദസാനന്ദമാസ്ഥാനരംഗേ
• ഇളക്കം മടക്കം പതക്കം കഴുത്തിൽ
• വിളക്കംപൊരുത്തുള്ള നല്ലുൾക്കഴിവും
• നിറംചേർന്ന മുൻകൈകളും കയ്യുരണ്ടും
• നിറച്ചിട്ടുറപ്പിച്ചകൈമോതിരങ്ങൾ
• മണിജ്വാലമിന്നുന്ന നൽപൊന്നരഞ്ഞാൺ
• അണിഞ്ഞും ചിലച്ചീടുമക്കാൽചിലമ്പും
• മണിക്കുണ്ഡലം കാതുരണ്ടും നിറച്ച-
• ങ്ങണിപ്പുങ്കുഴൽകെട്ടതും കാൽകവിഞ്ഞു
• നറും പിച്ചകം മുല്ല ചേമന്തിമാല
• നിറത്തോടുബന്ധിച്ചു കേശാന്തരാളെ
• വിളങ്ങുന്ന നെറ്റിത്തടേ നല്ലചാന്തും
• തെളിഞ്ഞുള്ള മന്ദസ്മിതേമുഗ്ദ്ധഭാവം
• ഇടമ്പെട്ടു നീണ്ടുള്ള കണ്ണഞ്ജനത്താ-
• ലുടൻ ഭംഗിചേർത്തംഗനാമൌലിമാല
• ഇളംപൂുവലംഗേ പ്രകാശിച്ചു വസ്ത്രം
• ഗളാന്തം പുതച്ചങ്ങുമുട്ടോടുകൂടി
• കളിത്തോഴിമാരോടു സാരസ്യമാടി-
• ക്കളിത്താമരപ്പുവനത്തിലിരിക്കും
• കിളിപ്പേടയോടങ്ങുചോദിച്ചു തത്തേ!
• കുളിച്ചീലയോ നീ ഭുജിച്ചീലയോ നീ?
• കളിക്കൊട്ടിലിൽചെന്നു കഞ്ജായതാക്ഷീ
• തളത്തിൽകരേറി സുഖിച്ചങ്ങിരുന്നു.
• കളിപ്പാൻ വളർത്തും കുരങ്ങിന്റെകണ്റേ
• വളച്ചാശുരുശ്രാക്ഷദാമങ്ങൾ കെട്ടി
• കളിക്കുക്കുടത്തേയുമവ്വണ്ണമാക്കി-
• ക്കുളിപ്പിച്ചു കൈകൊണ്ടു താളം പിടിച്ചും
• കളിക്കുക്കുടം മർക്കടം രണ്ടുമായി
• ക്കളിക്കുന്നതും കണ്ടിരിക്കും ചിരിക്കും
• മുദാ തോഴിമാരോടുമൊന്നിച്ചനേകം,
• പദം ഗീതവും രാഗവും ചൊല്ലുമ്പോൾ
• അതിൽ ക്കൗതുകം പൂണ്ടുടൻ കാമൂകന്മാ
• രതിപ്രേമകാമംകലർന്നങ്ങടുക്കും
• മഹാമർക്കടം കോഴിയും തോഴിമാരും
• മഹാനന്ദയും തങ്ങളിൽ കൂടിയാടും
• അഹോ വിസ്മയം കാമികൾക്കുത്സവം താ
• നഹസ്സിങ്കലെ ക്രീഡിതം നിത്യമേവം
• തദാപോന്നുവന്നാനൊരീശാനഭക്തൻ
• സദാം ശംഭുനാമം ജപിക്കുന്ന ധന്യൻ
• മഹാവൈശ്യനംഗേഷു രുദ്രാക്ഷധാരീ
• മഹാനന്ദമേവും ഗൃഹേ വന്നിരുന്നാൻ
• മണിസ്വർണ്ണപീഠംകൊടുത്തങ്ങിരുത്തി-
• പ്പണിച്ചോറ്റികൊണ്ടെന്നു വീശിത്തുടങ്ങി
• പനിച്ചാറുകൊണ്ടത്തളിച്ചാസ്ഥയോടെ
• തനിക്കായവണ്ണം സുഖിപ്പിച്ചുവേശ്യാ
• അവന്റേ വലംകയ്യിലെ കങ്കണം ക-
• ണ്ടവൾക്കെത്ര മോഹം മനക്കാമ്പിലിപ്പോൾ
• വിളങ്ങുന്ന വൈരങ്ങളും പത്മരാഗ-
• ങ്ങളും മുത്തുരത്നങ്ങളുംചേർത്തുഭംഗ്യാ
• മഹാകാഞ്ചനാരബ്ധമാം കങ്കണത്തിൽ
• സ്പൃഹാലോലയാം നീലപത്മാക്ഷി ചൊന്നാൾ
• എടോ വൈശ്യരാജാ ഭവാൻ തൻകരത്തിൽ
• കിടക്കുന്ന പൊൻകങ്കണം സാധുസാധു
• ഇദം കങ്കണം മങ്കമാർക്കെങ്കിലിപ്പോൾ
• മനോജ്ഞം പ്രകാശംവിശേഷിച്ചുമുണ്ടാം
• പറഞ്ഞുതദാ സസ്മിതം വൈശ്യരാജൻ
• കുറഞ്ഞൊരുമോഹം നിനക്കുള്ളിലൂണ്ടോ
• പതിന്നാലുലക്ഷംവരാഹൻ പിടിക്കും
• പദാർത്ഥം മഹാകങ്കണം പങ്കജാക്ഷി
• ഇതിന്നുള്ളമൂല്യം തരാമെങ്കിലിപ്പോൾ
• ഇതങ്ങോട്ടുനൽകാമിനിക്കെന്തു ചേതം
• ചിരിച്ചൊന്നു മെല്ലെക്കടാക്ഷിച്ചു ചെന്നാൾ
• ഇരിക്കട്ടെ മൂല്യപ്രകാരങ്ങളെല്ലാം
• മഹാവേശ്യമാർക്കുള്ള ധർമ്മപ്രകാരം
• മഹാവൈശ്യനും നീ ധരിക്കുന്നതല്ലീ
• കടക്കണ്ണിലർത്ഥംജനിക്കുന്നു ഞങ്ങൾ
• ക്കൊടുക്കത്തു ദാരിദ്ര്യവും സംഭവിക്കും
• അടുക്കുന്നപോലെ ഭവാനോടിരക്കാം
• കൊടുക്കുംഭവാനെങ്കിൽ മേടിച്ചുകൊള്ളാം
• വഹിക്കുന്നപോലെ തരും ദ്രവ്യമെല്ലാം
• ദഹിക്കും നമുക്കെന്നു ബോധിച്ചുകൊൾക
• ഇരിക്കുന്നവിത്തം വ്യയംചെയ്തമർത്ത്യൻ
• സ്മരിക്കുന്നസൗഖ്യം ലഭിക്കുന്നുനിത്യം
• പരദ്രവ്യവും സൗഖ്യവുംകൂടി മേളി-
• ച്ചിരുന്നന്ത്യകാലത്തിരക്കുന്നു ഞങ്ങൾ
• അപേക്ഷിച്ചതെല്ലാം തരുന്നു നരന്മാ-
• രുപേക്ഷിച്ചിടുന്നുണ്ടു ഞാനൊട്ടുചെന്നാൽ
• അഹോയിജ്ജനത്തിന്നു മുന്നാം ദുരാപം
• മഹാസങ്കടം മങ്കമാരായ്‌ പിറന്നാൽ
• അഹം മുന്നഹോരാത്രമിച്ഛാനുകൂലം
• മഹാവീരനിൽ ഭാര്യായിട്ടിരിക്കാം
• ത്രിരാത്രം പരസ്ത്രീത്വമുണ്ടാകയില്ല
• തരാമെങ്കിലീവണ്ണമല്ലെങ്കിലസ്തു
• വണിക്കാശു ചൊന്നാനിതിൻവണ്ണമെന്നാൽ
• മണിക്കങ്കണം ഞാൻ തരുന്നുണ്ടു ഭദ്രേ!
• ഇതിന്നിന്നു സാക്ഷി ജഗത്സാക്ഷി സൂര്യൻ
• പതിന്നാലുലോകേശനാം ശംഭു താനും
• ഹൃദന്തേ കരംവെച്ചുചൊൽകെന്നു വൈശ്യൻ
• മുദാവേശ്യയും തൽപ്രകാരംപറഞ്ഞാൾ
• മഹാവൈശ്യനക്കങ്കണം സല്ക്കരിച്ചാൻ
• മഹാനന്ദമേടിച്ചു പാണൌ ധരിച്ചാൾ
• പറഞ്ഞു മഹാവൈശ്യനംഭോജനേത്രേ!
• കുറഞ്ഞൊരു വൈഷമ്യമുണ്ടെന്തുചെയ്യാം
• ഇദം രത്നലിംഗം മമ പ്രാണതുല്യം
• മദംഗേ വിളങ്ങുന്നുകണ്ടീലയോ നീ
• ശരീരത്തിലിപ്പോൾ ധരിക്കേണ്ടതല്ല
• പരിരംഭ സൗഖ്യത്തിനു ഹാനിയുണ്ടാം
• രതിക്രീഡനേരം ശരീരേധരിച്ചാൽ
• ഇതിന്നുള്ളശക്തിക്കുവൈകല്യമുണ്ടാം
• ഒരേടത്തുസൂക്ഷിച്ചുവെച്ചാലുമാര്യേ!
• സരോജാക്ഷിഞാൻ പിന്നെമേടിച്ചുകൊള്ളാം
• കൊടുത്താനിവണ്ണം പറഞ്ഞാശു വൈശ്യൻ
• മടിക്കാതെമേടിച്ചുലിംഗംകൃശാംഗി
• കളിത്തട്ടുമീതേ മണിസ്തംഭ ഭാഗ.
• ത്തൊളിച്ചങ്ങുസൂക്ഷിച്ചുതൻവീടുപുക്കാൾ
• തതോ വൈശ്യനും വേശ്യയുംചേർന്നുകൂടി
• കൃതാർത്ഥാനുകൂലം രസിച്ചങ്ങുവാണാർ
• കിടന്നർദ്ധരാത്രിക്കുറങ്ങുന്നനേരം
• കൊടുങ്കാറ്റടിച്ചങ്ങു കൂത്തമ്പലത്തിൽ
• പിടിച്ചഗ്നിനീളെപ്പരന്നാശു കത്തി-
• ത്തുടങ്ങി നടുങ്ങീനതാംഗീവണിക്കാർ
• കടന്നാശുചെന്നങ്ങു നോക്കുന്നനേരം
• പടർന്നഗ്നികത്തിജ്വലിക്കുന്നു സർവ്വം.
• മണിസ്തംഭമോരോന്നുപൊട്ടിത്തെറിച്ചും
• തുണിക്കെട്ടുവെന്തങ്ങു നീളേപരന്നും
• അണിത്തോരണംവാതിലുംകേളിരംഗം
• മണിക്കട്ടിലുംമെത്തയും ഭസ്മമായി!
• സുവർണ്ണം ദ്രവിച്ചുംമരപ്പാവവെന്തും
• ഇവണ്ണം ദഹിക്കുന്നകണ്ടംബുജാക്ഷി
• തെരിക്കെന്നു ചെന്നക്കളിക്കുക്കുടത്തെ
• ചിരം മർക്കടത്താനെയും വേർപെടുത്തു
• കുതിച്ചങ്ങുചാടി മഹാമർക്കടം താൻ
• പതുക്കെപ്പറന്നു മഹാകുക്കുടം താൻ
• മഹാനന്ദതാനും മഹാവൈശ്യനും നി-
• ന്നഹോ കഷ്ടമെന്നാകുലപ്പെട്ടുകേണാർ
• അതില്പെട്ടു പൊട്ടി ദ്രുതം രത്നലിംഗം
• പതിക്കുന്നതും കണ്ടു വൈശ്യേന്ദ്രനപ്പോൾ
• അതിക്ലേശമോടേ പറഞ്ഞാനഹോമേ
• മൃതിക്കുള്ളയോഗം ഭവിച്ചു മൃഗാക്ഷി
• മഹാരത്നലിംഗത്തെ വേർപെട്ടിരിപ്പാ-
• നഹം ശക്തനല്ലുത്തമപ്പെൺകിടാവേ
• എരിഞ്ഞങ്ങുകത്തുന്ന കൂത്തമ്പലത്തിൽ
• തെരിക്കെന്നു ചാടീട്ടു ഗാത്രം ത്യജിപ്പൻ
• ഇരിക്കുന്നതെന്തിന്നു ഞാൻ രത്നലിഗം
• കരിക്കുന്നതും കണ്ടുകല്ലല്ലെടോ നാം
• മരിക്കുന്നു ഞാനും മനോജ്ഞാംഗി നിന്നെ
• സ്മരിച്ചഞ്ങിരുന്നാൽകണക്കല്ല ബാലെ
• മമ പ്രാണനേക്കാളിലേറും മമത്വം
• കിമപൃത്ഭുതം ഹന്ത മേ രത്നലിംഗം
• മഹാവൈശ്യനിത്ഥം പറഞ്ഞാസ്ഥയോടെ
• മഹാഗ്നൗ പതിച്ചാശു ദേഹം ത്യജിച്ചാൻ
• മഹാനന്ദതാനും മഹാഖേദമോടെ
• മഹാബന്ധുവർഗ്ഗത്തെ നോക്കിപ്പറഞ്ഞാൾ...
• എനിക്കും മരിക്കാതിരിക്കാവതല്ലാ
• നിനയ്ക്കും വിധ വൈശ്യനെൻ നാഥനല്ലോ.
• ത്രിരാത്രം ഭവൽഭാര്യ ഞാനെന്നുചൊന്നേൻ
• ത്രിരാത്രം കഴിഞ്ഞീല കാന്തൻമരിച്ചു
• അധർമ്മം ഭവിക്കും നമുക്കിങ്ങിരിക്കാം
• അധർമ്മത്തിനെക്കാൾ പരം ജീവനാശം
• കലുശ്രേഷ്ഠനാകുന്ന കാന്തൻ മരിച്ചാൽ
• കുലസ്ത്രീജനങ്ങൾക്കു ജീവിക്കനിന്ദ്യം
• കുലസ്ത്രീത്വമുണ്ടോ നമുക്കെന്ന്‌ ശങ്ക-
• കുലത്വം ഭവാന്മാർക്കുമുണ്ടാകാം വേണ്ട.
• പരസ്ത്രീത്വമുണ്ടെങ്കിലും സത്യവാക്കി-
• ന്നൊരിക്കാലുമിങ്ങില്ലഭംഗം ധരിപ്പിൻ!
• ഒരുത്തന്റെ പാർശ്വേ വസിക്കും വിധൌ മ-
• റ്റൊരുത്തങ്കലാർദ്രത്വമാകാ നമുക്കും.
• അതല്ലോ പരസ്ത്രീജനങ്ങൾക്കു ധർമ്മം
• മതം സർവ്വശാസ്ത്രത്തിലും സിദ്ധമേതൽ
• അതിന്നന്യഥാത്വം വരുത്തുന്നവേശ്യ.-
• യ്ക്കതിക്രൂരപാപങ്ങളും സംഭവിക്കും.
• അഹോ മാമകം കഷ്ടമത്യന്തദോഷം
• സുസത്യ വ്രതം ഞാൻ തൃജിച്ചീടുമോതാൻ
• മഹാദേവനും സൂര്യനും സാക്ഷിയെന്നും
• മഹാവൈശ്യനെന്നോടു ചൊന്നാൻ മഹാത്മാ.
• അഹോ കഷ്ടമെന്തിന്നിരിക്കുന്നു ഞാനി
• മഹാവഹ്നിതന്നിൽ പതിഷ്യാമി വേഗാൽ
• പരദ്രവ്യമോരോന്നു തട്ടിപ്പറിച്ചി-
• ട്ടൊരിക്കൽ ദരിദ്രത്വമുണ്ടാമിരുന്നാൽ
• ഒരുത്തന്നുവേണ്ടിശ്ശൂരീരം തൃജിച്ചാ-
• ലൊരല്പം ദുരാപത്തിനിക്കില്ല താനും
• മുദാ ഞാനിനിപ്പാർവ്വതീ വല്ലഭന്റെ
• പദാന്തേ നിതാന്തം ലയിക്കേണമിപ്പോൾ
• മഹാനന്ദതാനിത്ഥമാനന്ദമോടെ
• മഹാബ്രാഹ്മണന്മാരെയെല്ലാം വരുത്തി
• തനിക്കുള്ള സമ്പത്തനേകം സമർപ്പി -
• ച്ചനന്തപ്രമോദം കുളിച്ചാസ്ഥയോടെ
• തതോമൃഷ്ടമാമഷ്ടിയും നിർവ്വഹിച്ചു
• ഹിതത്തോടു താംബൂലപഗാദിയോഗം
• മുദാചർവ്വണംചെയ്തു കുമ്പിട്ടനക്ടം
• പദാന്തമഹാദാനമോരോന്നുചെയ്തു
• ജലിക്കുന്നവഹ്നൗ വലംവച്ചു വേഗാൽ
• തുലോ ദിക്കടുത്താശു ചാടും ദശായാം
• ദ്രുതം തത്ര കാണായിതേണാങ്കചൂഢം
• സ്മിതംപൂണ്ടു തൻ പാണിപത്മം പിടിച്ചു
• എടോ പങ്കജാക്ഷിശിരോരത്നമാലേ
• കഠോരനലേ ചാടൊലാ ചാടൊലാ നീ
• നിനക്കുള്ള ഭക്തിപ്രഭാവം ഗ്രഹിപ്പാൻ
• വണിക്കായിനിന്നേ പരിക്ഷിച്ചുഞാനും
• പരസ്ത്രീജനങ്ങൾക്കു കൗടില്യമേറും
• പരദ്രവ്യമോഹേനവഞ്ചിക്കുമേറ്റം
• മനസിന്നുകാഠിന്യമത്യന്തമുണ്ടാം
• തനിക്കുള്ള കാന്തങ്കലും കൂറുമില്ലാ
• അതിൽകുടുമോ പേടമാൻകണ്ണി നിയും
• ചതിച്ചീടുമോ? വിശ്വസിച്ചാലിതെല്ലാം
• ഗ്രഹിക്കേണമെന്നിട്ടു വന്നേനഹം കേൾ
• ദഹിക്കേണ്ടെടോ ദേഹമാനന്ദശീലേ!
• തരുന്നുണ്ടു വേണ്ടുന്ന കാമങ്ങളെല്ലാം
• വരം വേണ്ട തതർത്ഥിച്ചു കൊൾകാ ശുഭദ്രേ!
• നമസ്കാരപൂർവ്വം മഹാനന്ദ ചൊന്നാൾ
• മമ സ്വാമിയാം ദേവ ചന്ദ്രാർദ്ധമൌലേ!
• എനിക്കിപ്പോളൊന്നിങ്കലും വാഞ്ഛയില്ലാ
• ജനിക്കേണമെന്നില്ലോരേടത്തുമോർത്താൽ
• ഭവൽപാദശുശ്രുഷയുംചെയ്തു നിത്യം
• ഭവൽപാദമുലേവസിച്ചീടുമോ ഞാൻ
• എനിക്കുള്ള ബന്ധുക്കളും ഞാനുമെല്ലാം
• ഇനിത്വത്സകാശേ വസിക്കായ് വരേണം
• ഇനിജ്ജന്മമെന്നുള്ള ദുഃഖം നിനച്ചാ
• ലനിക്കെത്രയും ഭീതി ശീതാംശുമൗലേ
• നമസ്തേ മഹാദേവ! കാരുണ്യമുർത്തെ
• നമസ്തേ വിഭോ; പാർവ്വതീ ജീവനാഥ്
• ജടാ ചന്ദ്രനും തുമ്പയും ചാമ്പലെല്ലു൦
• നിടിലാഗ്നിയും സർപ്പകർണ്ണാവതംസ
• കുരംഗം കുഠാരം കരേടങ്കശുലം
• സ്ഫുരന്നാഗഹാരം ഫണികാഞ്ചിജാലം
• പുലിത്തോലൂടുത്തൊരു ചാരുപ്രദേശം
• ചലം ഭോഗിമഞ്ജീരപാദാരവിന്ദം
• ഇദം താവകം ദേവകേശാദിപാദ൦
• ഹൃദന്തേവിളങ്ങേണമെല്ലായ്പൊഴും മേ
• ഉപാന്തേ തവ പ്രേയസി ശൈലകന്യാ
• മുപാസിപ്പതിന്നും വരം ദേഹി ശംഭോ।
• കൃപാംഭോനിധേ! ദേവഖട്വാംഗനാഥ।
• കപാലിൻ മഹാദേവശംഭോ॥ നമസ്തേ
• ഇതി പ്രൗഢ ഭക്ത്യാ സ്തുതിക്കും ദശായാം
• അതിപ്രീതനാം പാർവ്വതീസാർവ്വഭൌമൻ
• മഹാ നന്ദയെ സ്സാദരം തേരിലേറ്റി
• സഹായങ്ങളെക്കൂടവേ കൂട്ടിനന്നായ്‌
• മഹാദേവദേവൻ ഗമിച്ചദ്രിരാജൻ
• മഹാനന്ദലോകേ വസിപ്പിച്ചുമോദാൽ
• തദാമർക്കടം രണ്ടുമിപ്പോൾ
• തവാ വാസദേശേ ജനിച്ചു നരേന്ദ്രാ
• മഹാമർക്കടൻവന്നു നിൻ പുത്രഭാവേ
• മഹാഭാഗ്യവാനഞ്ജസാ സംഭവിച്ചു
• മഹാകുക്കുടം വന്നുടൻ മാനവേന്ദ്ര
• മഹാമന്ത്രി തൻ പുത്രനായും ജനിച്ചു
• തദാ ചാരുരുദ്രാക്ഷമംഗേ ധരിച്ചി-
• ട്ടി ദാനീമവർക്കീശഭക്തിക്കു ബന്ധം
• ഇനിജ്ജന്മമില്ലിക്കുമാരർക്കു മേലിൽ
• ജനിക്ലേശമീശൻ വരുത്തീടുമോ താൻ
• അനന്തഫലം ഹന്ത രുദ്രാക്ഷമംഗേ
• മനസ്സോടു കൂടാതെ ചേർത്തീടിനാലും
• മനസ്സോടുകൂടിദ്ധരിക്കും നരന്മാർ-
• ക്കിനിജ്ജന്മമില്ലെന്നുകില്ലില്ലരാജൻ
• മുനിവ്യാസതാതൻ പറഞ്ഞാശുപോയി
• മനുഷ്യാധിരാജൻ പ്രസാദിച്ചുവാണാൻ
• ചെവിക്കൊണ്ടു രുദ്രാക്ഷമാഹാത്മ്യമേവം
• ശ്രവിക്കുന്നവർക്കും ഭവിക്കുന്നുമോക്ഷം
• മനക്കോട്ടുവാഴും മഹാമാനശാലി
• മനക്കാമ്പിലേറ്റം കൃപാവാരിരാശി
• ഇനിക്കാശ്രയം ബാലരാമാഭിധാനൻ
• നിനയ്ക്കുന്നതെല്ലാം വരുത്താൻ കരുത്തൻ
• കലാവിദ്യകൾ ക്കേക മാധാരഭൂതൻ
• കുലാചാരഭേദം ഗ്രഹിക്കുന്നു വിദ്വാൻ
• മനക്രോഡ നാഥാനുജൻ ബാലരാമൻ
• മനോജ്ഞസ്വരൂപൻ ജയിക്കേണമേറ്റം

ശിവപുരാണം രുദ്രക്ഷ മാഹാത്മ്യം സമാപ്തം