ശ്രീമദ് ഭാഗവതം (മൂലം) / ദശമഃ സ്കന്ധഃ (ഉത്തരാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 83
← സ്കന്ധം 10 ഉത്തരാർദ്ധം : അദ്ധ്യായം 82 | സ്കന്ധം 10 ഉത്തരാർദ്ധം : അദ്ധ്യായം 84 → |
ശ്രീമദ് ഭാഗവതം (മൂലം) / ദശമഃ സ്കന്ധഃ (പൂർവ്വാർദ്ധഃ) (സ്കന്ധം 10 ഉത്തരാർദ്ധം) / അദ്ധ്യായം 83 തിരുത്തുക
ശ്രീശുക ഉവാച
തഥാനുഗൃഹ്യ ഭഗവാൻ ഗോപീനാം സ ഗുരുർഗ്ഗതിഃ ।
യുധിഷ്ഠിരമഥാപൃച്ഛത് സർവ്വാംശ്ച സുഹൃദോഽവ്യയം ॥ 1 ॥
ത ഏവം ലോകനാഥേന പരിപൃഷ്ടാഃ സുസത്കൃതാഃ ।
പ്രത്യൂചുർഹൃഷ്ടമനസസ്തത്പാദേക്ഷാഹതാംഹസഃ ॥ 2 ॥
കുതോഽശിവം ത്വച്ചരണാംബുജാസവം
മഹൻമനസ്തോ മുഖനിഃസൃതം ക്വചിത് ।
പിബന്തി യേ കർണ്ണപുടൈരലം പ്രഭോ
ദേഹംഭൃതാം ദേഹകൃദസ്മൃതിച്ഛിദം ॥ 3 ॥
ഹിത്വാഽഽത്മധാമ വിധുതാത്മകൃതത്ര്യവസ്ഥ-
മാനന്ദസംപ്ളവമഖണ്ഡമകുണ്ഠബോധം ।
കാലോപസൃഷ്ടനിഗമാവന ആത്തയോഗ-
മായാകൃതിം പരമഹംസഗതിം നതാഃ സ്മഃ ॥ 4 ॥
ഋഷിരുവാച
ഇത്യുത്തമശ്ലോകശിഖാമണിം ജനേ-
ഷ്വഭിഷ്ടുവത്സ്വന്ധകകൌരവസ്ത്രിയഃ ।
സമേത്യ ഗോവിന്ദകഥാ മിഥോഽഗൃണം-
സ്ത്രിലോകഗീതാഃ ശൃണു വർണ്ണയാമി തേ ॥ 5 ॥
ദ്രൌപദ്യുവാച
ഹേ വൈദർഭ്യച്യുതോ ഭദ്രേ ഹേ ജാംബവതി കൌസലേ ।
ഹേ സത്യഭാമേ കാളിന്ദി ശൈബ്യേ രോഹിണി ലക്ഷ്മണേ ॥ 6 ॥
ഹേ കൃഷ്ണപത്ന്യ ഏതന്നോ ബ്രൂത വോ ഭഗവാൻ സ്വയം ।
ഉപയേമേ യഥാ ലോകമനുകുർവ്വൻ സ്വമായയാ ॥ 7 ॥
രുക്മിണ്യുവാച
ചൈദ്യായ മാർപ്പയിതുമുദ്യതകാർമുകേഷു
രാജസ്വജേയഭടശേഖരിതാങ്ഘ്രിരേണുഃ ।
നിന്യേ മൃഗേന്ദ്ര ഇവ ഭാഗമജാവിയൂഥാത്-
തച്ഛ്രീനികേതചരണോഽസ്തു മമാർച്ചനായ ॥ 8 ॥
സത്യഭാമോവാച
യോ മേ സനാഭിവധതപ്തഹൃദാ തതേന
ലിപ്താഭിശാപമപമാർഷ്ടുമുപാജഹാര ।
ജിത്വർക്ഷരാജമഥ രത്നമദാത്സ തേന
ഭീതഃ പിതാദിശത മാം പ്രഭവേഽപി ദത്താം ॥ 9 ॥
ജാംബവത്യുവാച
പ്രാജ്ഞായ ദേഹകൃദമും നിജനാഥദൈവം
സീതാപതിം ത്രിണവഹാന്യമുനാഭ്യയുദ്ധ്യത് ।
ജ്ഞാത്വാ പരീക്ഷിത ഉപാഹരദർഹണം മാം
പാദൌ പ്രഗൃഹ്യ മണിനാഹമമുഷ്യ ദാസീ ॥ 10 ॥
കാലിന്ദ്യുവാച
തപശ്ചരന്തീമാജ്ഞായ സ്വപാദസ്പർശനാശയാ ।
സഖ്യോപേത്യാഗ്രഹീത്പാണിം യോഽഹം തദ്ഗൃഹമാർജ്ജനീ ॥ 11 ॥
മിത്രവിന്ദോവാച
യോ മാം സ്വയംവര ഉപേത്യ വിജിത്യ ഭൂപാൻ
നിന്യേ ശ്വയൂഥഗമിവാത്മബലിം ദ്വിപാരിഃ ।
ഭ്രാതൄംശ്ചമേഽപകുരുതഃ സ്വപുരം ശ്രിയൌകഃ
തസ്യാസ്തു മേഽനുഭവമങ്ഘ്ര്യവനേജനത്വം ॥ 12 ॥
സത്യോവാച
സപ്തോക്ഷണോഽതിബലവീര്യസുതീക്ഷ്ണശൃംഗാൻ
പിത്രാ കൃതാൻ ക്ഷിതിപവീര്യപരീക്ഷണായ ।
താൻ വീരദുർമ്മദഹനസ്തരസാ നിഗൃഹ്യ
ക്രീഡൻ ബബന്ധ ഹ യഥാ ശിശവോഽജതോകാൻ ॥ 13 ॥
യ ഇത്ഥം വീര്യശുൽകാം മാം ദാസീഭിശ്ചതുരംഗിണീം ।
പഥി നിർജ്ജിത്യ രാജന്യാൻ നിന്യേ തദ്ദാസ്യമസ്തു മേ ॥ 14 ॥
ഭദ്രോവാച
പിതാ മേ മാതുലേയായ സ്വയമാഹൂയ ദത്തവാൻ ।
കൃഷ്ണേ കൃഷ്ണായ തച്ചിത്താമക്ഷൌഹിണ്യാ സഖീജനൈഃ ॥ 15 ॥
അസ്യ മേ പാദസംസ്പർശോ ഭവേജ്ജൻമനി ജൻമനി ।
കർമ്മഭിർഭ്രാമ്യമാണായാ യേന തച്ഛ്രേയ ആത്മനഃ ॥ 16 ॥
ലക്ഷ്മണോവാച
മമാപി രാജ്ഞ്യച്യുതജൻമകർമ്മ
ശ്രുത്വാ മുഹുർന്നാരദഗീതമാസ ഹ ।
ചിത്തം മുകുന്ദേ കില പദ്മഹസ്തയാ
വൃതഃ സുസമ്മൃശ്യ വിഹായ ലോകപാൻ ॥ 17 ॥
ജ്ഞാത്വാ മമ മതം സാധ്വി പിതാ ദുഹിതൃവത്സലഃ ।
ബൃഹത്സേന ഇതി ഖ്യാതസ്തത്രോപായമചീകരത് ॥ 18 ॥
യഥാ സ്വയംവരേ രാജ്ഞി മത്സ്യഃ പാർത്ഥേപ്സയാ കൃതഃ ।
അയം തു ബഹിരാച്ഛന്നോ ദൃശ്യതേ സ ജലേ പരം ॥ 19 ॥
ശ്രുത്വൈതത്സർവ്വതോ ഭൂപാ ആയയുർമ്മത്പിതുഃ പുരം ।
സർവ്വാസ്ത്രശസ്ത്രതത്ത്വജ്ഞാഃ സോപാധ്യായാഃ സഹസ്രശഃ ॥ 20 ॥
പിത്രാ സമ്പൂജിതാഃ സർവ്വേ യഥാവീര്യം യഥാവയഃ ।
ആദദുഃ സശരം ചാപം വേദ്ധും പർഷദി മദ്ധിയഃ ॥ 21 ॥
ആദായ വ്യസൃജൻ കേചിത് സജ്യം കർത്തുമനീശ്വരാഃ ।
ആകോടി ജ്യാം സമുത്കൃഷ്യ പേതുരേകേഽമുനാ ഹതാഃ ॥ 22 ॥
സജ്യം കൃത്വാ പരേ വീരാ മാഗധാംബഷ്ഠചേദിപാഃ ।
ഭീമോ ദുര്യോധനഃ കർണ്ണോ നാവിദംസ്തദവസ്ഥിതിം ॥ 23 ॥
മത്സ്യാഭാസം ജലേ വീക്ഷ്യ ജ്ഞാത്വാ ച തദവസ്ഥിതിം ।
പാർത്ഥോ യത്തോഽസൃജദ്ബാണം നാച്ഛിനത്പസ്പൃശേ പരം ॥ 24 ॥
രാജന്യേഷു നിവൃത്തേഷു ഭഗ്നമാനേഷു മാനിഷു ।
ഭഗവാൻ ധനുരാദായ സജ്യം കൃത്വാഥ ലീലയാ ॥ 25 ॥
തസ്മിൻ സന്ധായ വിശിഖം മത്സ്യം വീക്ഷ്യ സകൃജ്ജലേ ।
ഛിത്ത്വേഷുണാപാതയത്തം സൂര്യേ ചാഭിജിതി സ്ഥിതേ ॥ 26 ॥
ദിവി ദുന്ദുഭയോ നേദുർജ്ജയശബ്ദയുതാ ഭുവി ।
ദേവാശ്ച കുസുമാസാരാൻ മുമുചുർഹർഷവിഹ്വലാഃ ॥ 27 ॥
തദ് രംഗമാവിശമഹം കലനൂപുരാഭ്യാം
പദ്ഭ്യാം പ്രഗൃഹ്യ കനകോജ്വലരത്നമാലാം ।
നൂത്നേ നിവീയ പരിധായ ച കൌശികാഗ്ര്യേ
സവ്രീഡഹാസവദനാ കബരീധൃതസ്രക് ॥ 28 ॥
ഉന്നീയ വക്ത്രമുരുകുന്തളകുണ്ഡലത്വിഡ്-
ഗണ്ഡസ്ഥലം ശിശിരഹാസകടാക്ഷമോക്ഷൈഃ ।
രാജ്ഞോ നിരീക്ഷ്യ പരിതഃ ശനകൈർമ്മുരാരേ-
രംസേഽനുരക്തഹൃദയാ നിദധേ സ്വമാലാം ॥ 29 ॥
താവൻമൃദംഗപടഹാഃ ശംഖഭേര്യാനകാദയഃ ।
നിനേദുർന്നടനർത്തക്യോ നനൃതുർഗ്ഗയകാ ജഗുഃ ॥ 30 ॥
ഏവം വൃതേ ഭഗവതി മയേശേ നൃപയൂഥപാഃ ।
ന സേഹിരേ യാജ്ഞസേനി സ്പർദ്ധന്തോ ഹൃച്ഛയാതുരാഃ ॥ 31 ॥
മാം താവദ് രഥമാരോപ്യ ഹയരത്നചതുഷ്ടയം ।
ശാർങ്ഗമുദ്യമ്യ സന്നദ്ധസ്തസ്ഥാവാജൌ ചതുർഭുജഃ ॥ 32 ॥
ദാരുകശ്ചോദയാമാസ കാഞ്ചനോപസ്കരം രഥം ।
മിഷതാം ഭൂഭുജാം രാജ്ഞി മൃഗാണാം മൃഗരാഡിവ ॥ 33 ॥
തേഽന്വസജ്ജന്ത രാജന്യാ നിഷേദ്ധും പഥി കേചന ।
സംയത്താ ഉദ്ധൃതേഷ്വാസാ ഗ്രാമസിംഹാ യഥാ ഹരിം ॥ 34 ॥
തേ ശാർങ്ഗച്യുതബാണൌഘൈഃ കൃത്തബാഹ്വങ്ഘ്രികന്ധരാഃ ।
നിപേതുഃ പ്രധനേ കേചിദേകേ സന്ത്യജ്യ ദുദ്രുവുഃ ॥ 35 ॥
തതഃ പുരീം യദുപതിരത്യലങ്കൃതാം
രവിച്ഛദധ്വജപടചിത്രതോരണാം ।
കുശസ്ഥലീം ദിവി ഭുവി ചാഭിസംസ്തുതാം
സമാവിശത്തരണിരിവ സ്വകേതനം ॥ 36 ॥
പിതാ മേ പൂജയാമാസ സുഹൃത്സംബന്ധിബാന്ധവാൻ ।
മഹാർഹവാസോഽലങ്കാരൈഃ ശയ്യാസനപരിച്ഛദൈഃ ॥ 37 ॥
ദാസീഭിഃ സർവ്വസമ്പദ്ഭിർഭടേഭരഥവാജിഭിഃ ।
ആയുധാനി മഹാർഹാണി ദദൌ പൂർണ്ണസ്യ ഭക്തിതഃ ॥ 38 ॥
ആത്മാരാമസ്യ തസ്യേമാ വയം വൈ ഗൃഹദാസികാഃ ।
സർവ്വസംഗനിവൃത്ത്യാദ്ധാ തപസാ ച ബഭൂവിമ ॥ 39 ॥
മഹിഷ്യ ഊചുഃ
ഭൌമം നിഹത്യ സഗണം യുധി തേന രുദ്ധാ
ജ്ഞാത്വാഥ നഃ ക്ഷിതിജയേ ജിതരാജകന്യാഃ ।
നിർമ്മുച്യ സംസൃതിവിമോക്ഷമനുസ്മരന്തീഃ
പാദാംബുജം പരിണിനായ യ ആപ്തകാമഃ ॥ 40 ॥
ന വയം സാധ്വി സാമ്രാജ്യം സ്വാരാജ്യം ഭൌജ്യമപ്യുത ।
വൈരാജ്യം പാരമേഷ്ഠ്യം ച ആനന്ത്യം വാ ഹരേഃ പദം ॥ 41 ॥
കാമയാമഹ ഏതസ്യ ശ്രീമത്പാദരജഃ ശ്രിയഃ ।
കുചകുങ്കുമഗന്ധാഢ്യം മൂർദ്ധ്നാ വോഢും ഗദാഭൃതഃ ॥ 42 ॥
വ്രജസ്ത്രിയോ യദ്വാഞ്ഛന്തി പുലിന്ദ്യസ്തൃണവീരുധഃ ।
ഗാവശ്ചാരയതോ ഗോപാഃ പാദസ്പർശം മഹാത്മനഃ ॥ 43 ॥