ശ്രീ ബൃഹസ്പതി കവചം

ശ്രീ ബൃഹസ്പതി കവചം

അസ്യ ശ്രീബൃഹസ്പതി കവചസ്തോത്രമന്ത്രസ്യ ഈശ്വര ഋഷിഃ, അനുഷ്ടുപ് ഛന്ദഃ, ഗുരുർദേവത. ഗം ബീജം, ശ്രീം ശക്തിഃ, ക്ലീം കീലകം, ഗുരു പ്രീത്യർത്ഥം ജപേ വിനിയോഗഃ ॥

ധ്യാനം

അഭിഷ്ടഫലദം വന്ദേ സർവജ്ഞം സുരപൂജിതം । അക്ഷമാലാധരം ശാന്തം പ്രണമാമി ബൃഹസ്പതിം ॥

അഥ ബൃഹസ്പതി കവചം

ബൃഹസ്പതിഃ ശിരഃ പാതു ലലാടം പാതു മേ ഗുരുഃ । കർണ്ണൗ സുരഗുരുഃ പാതു നേത്രേമേഽഭീഷ്ടദായകഃ ॥ 1 ॥ ജിഹ്വാം പാതു സുരാചാര്യഃ നാസാം മേ വേദപാരഗഃ । മുഖം മേ പാതു സർവജ്ഞഃ കണ്ഠം മേ ദേവതാഗുരുഃ ॥ 2 ॥ ഭുജാവാംഗിരസഃ പാതു കരൗ പാതു ശുഭപ്രദഃ । സ്തനൗ മേ പാതു വാഗീശഃ കുക്ഷിം മേ ശുഭലക്ഷണഃ ॥ 3 ॥ നാഭിം ദേവഗുരുഃ പാതു മധ്യം പാതു സുഖപ്രദഃ । കടിം പാതു ജഗദ് വന്ദ്യഃ ഊരൂ മേ പാതു വാക്പതിഃ ॥ 4 ॥ ജാനുജങ്ഘേ സുരാചാര്യഃ പാദൌ വിശ്വാത്മകഃ സദാ । അന്യാനി യാനി ചാംഗാനി രക്ഷേന്മേ സർവതോ ഗുരുഃ ॥ 5 ॥

ഫലശ്രുതിഃ

ഇത്യേതത് കവചം ദിവ്യം ത്രിസന്ധ്യം യഃ പഠേന്നരഃ സർവ്വാൻ കാമാനവാപ്നോതി സർവ്വത്ര വിജയീ ഭവേത് ॥ ॥ ഇതി ശ്രീ ബ്രഹ്മയാമളോക്തം ബൃഹസ്പതി കവചം സമ്പൂർണ്ണം॥