മഹാഭാരതം മൂലം/അശ്വമേധികപർവം/അധ്യായം40
| ←അധ്യായം39 | മഹാഭാരതം മൂലം/അശ്വമേധികപർവം രചന: അധ്യായം40 |
അധ്യായം41→ |
1 [ബ്ര്]
അവ്യക്താത് പൂർവം ഉത്പന്നോ മഹാൻ ആത്മാ മഹാമതിഃ
ആദിർ ഗുണാനാം സർവേഷാം പ്രഥമഃ സർഗ ഉച്യതേ
2 മഹാൻ ആത്മാ മതിർ വിഷ്ണുർ വിശ്വഃ ശംഭുശ് ച വീര്യവാൻ
ബുദ്ധിഃ പ്രജ്ഞോപലബ്ധിശ് ച തഥാ ഖ്യാതിർ ധൃതിഃ സ്മൃതിഃ
3 പര്യായ വാചകൈഃ ശബ്ദൈർ മഹാൻ ആത്മാ വിഭാവ്യതേ
തം ജാനൻ ബ്രാഹ്മണോ വിദ്വാൻ ന പ്രമോഹം നിഗച്ഛതി
4 സർവതഃ പാണിപാദശ് ച സർവതോ ഽക്ഷിശിരോമുഖഃ
സർവതഃ ശ്രുതിമാംൽ ലോകേ സർവം വ്യാപ്യ സ തിഷ്ഠതി
5 മഹാപ്രഭാർചിഃ പുരുഷഃ സർവസ്യ ഹൃദി നിശ്രിതഃ
അണിമാ ലഘിമാ പ്രാപ്തിർ ഈശാനോ ജ്യോതിർ അവ്യയഃ
6 തത്ര ബുദ്ധിമതാം ലോകാഃ സംന്യാസനിരതാശ് ച യേ
ധ്യാനിനോ നിത്യയോഗാശ് ച സത്യസന്ധാ ജിതേന്ദ്രിയാഃ
7 ജ്ഞാനവന്തശ് ച യേ കേ ചിദ് അലുബ്ധാ ജിതമന്യവഃ
പ്രസന്നമനസോ ധീരാ നിർമമാ നിരഹങ്കൃതാഃ
വിമുക്താഃ സർവ ഏവൈതേ മഹത്ത്വം ഉപയാന്തി വൈ
8 ആത്മനോ മഹതോ വേദ യഃ പുണ്യാം ഗതിം ഉത്തമാം
സ ധീരഃ സർവലോകേഷു ന മോഹം അധിഗച്ഛതി
വിഷ്ണുർ ഏവാദി സർഗേഷു സ്വയംഭൂർ ഭവതി പ്രഭുഃ
9 ഏവം ഹി യോ വേദ ഗുഹാ ശയം പ്രഭും; നരഃ പുരാണം പുരുഷം വിശ്വരൂപം
ഹിരണ്മയം ബുദ്ധിമതാം പരാം ഗതിം; സ ബുദ്ധിമാൻ ബുദ്ധിം അതീത്യ തിഷ്ഠതി