മഹാഭാരതം മൂലം/ആദിപർവം/അധ്യായം183
| ←അധ്യായം182 | മഹാഭാരതം മൂലം/ആദിപർവം രചന: അധ്യായം 183 |
അധ്യായം184→ |
1 [വൈ]
ഭ്രാതൃവചസ് തത് പ്രസമീക്ഷ്യ സർവേ; ജ്യേഷ്ഠസ്യ പാണ്ഡോസ് തനയാസ് തദാനീം
തം ഏവാർഥം ധ്യായമാനാ മനോഭിർ; ആസാം ചക്രുർ അഥ തത്രാമിതൗജാഃ
2 വൃഷ്ണിപ്രവീരസ് തു കുരുപ്രവീരാൻ; ആശങ്കമാനഃ സഹരൗഹിണേയഃ
ജഗാമ താം ഭാർഗവ കർമശാലാം; യത്രാസതേ തേ പുരുഷപ്രവീരാഃ
3 തത്രോപവിഷ്ടം പൃഥു ദീർഘബാഹും; ദദർശ കൃഷ്ണഃ സഹരൗഹിണേയഃ
അജാതശത്രും പരിവാര്യ താംശ് ച; ഉപോപവിഷ്ടാഞ് ജ്വലനപ്രകാശാൻ
4 തതോ ഽബ്രവീദ് വാസുദേവോ ഽഭിഗമ്യ; കുന്തീസുതം ധർമഭൃതാം വരിഷ്ടഹ്ം
കൃഷ്ണോ ഽഹം അസ്മീതി നിപീഡ്യ പാദൗ; യുധിഷ്ഠിരസ്യാജമീഢസ്യ രാജ്ഞഃ
5 തഥൈവ തസ്യാപ്യ് അനു രൗഹിണേയസ്; തൗ ചാപി ഹൃഷ്ടാഃ കുരവോ ഽഭ്യനന്ദൻ
പിതൃഷ്വസുശ് ചാപി യദുപ്രവീരാവ്; അഗൃഹ്ണതാം ഭാരതമുഖ്യപാദൗ
6 അജാതശത്രുശ് ച കുരുപ്രവീരഃ; പപ്രച്ഛ കൃഷ്ണം കുശലം നിവേദ്യ
കഥം വയം വാസുദേവ ത്വയേഹ; ഗൂഢാ വസന്തോ വിദിതാഃ സ്മ സർവേ
7 തം അബ്രവീദ് വാസുദേവഃ പ്രഹസ്യ; ഗൂഢോ ഽപ്യ് അഗ്നിർ ജ്ഞായത ഏവ രാജൻ
തം വിക്രമം പാണ്ഡവേയാനതീത്യ; കോ ഽന്യഃ കർതാ വിദ്യതേ മാനുഷേഷു
8 ദിഷ്ട്യാ തസ്മാത് പാവകാത് സമ്പ്രമുക്താ; യൂയം സർവേ പാണ്ഡവാഃ ശത്രുസാഹാഃ
ദിഷ്ട്യാ പാപോ ധൃതരാഷ്ട്രസ്യ പുത്രഃ; സഹാമാത്യോ ന സകാമോ ഽഭവിഷ്യത്
9 ഭദ്രം വോ ഽസ്തു നിഹിതം യദ് ഗുഹായാം; വിവർധധ്വം ജ്വലന ഇവേധ്യമാനഃ
മാ വോ വിദ്യുഃ പാർഥിവാഃ കേ ചനേഹ; യാസ്യാവഹേ ശിബിരായൈവ താവത്
സോ ഽനുജ്ഞാതഃ പാണ്ഡവേനാവ്യയ ശ്രീഃ; പ്രായാച് ഛീഘ്രം ബലദേവേന സാർധം