മഹാഭാരതം മൂലം/ആദിപർവം/അധ്യായം21
| ←അധ്യായം20 | മഹാഭാരതം മൂലം/ആദിപർവം രചന: അധ്യായം 21 |
അധ്യായം22→ |
1 [സൂ]
തതഃ കാമഗമഃ പക്ഷീ മഹാവീര്യോ മഹാബലഃ
മാതുർ അന്തികം ആഗച്ഛത് പരം തീരം മഹോദധേഃ
2 യത്ര സാ വിനതാ തസ്മിൻ പണിതേന പരാജിതാ
അതീവ ദുഃഖസന്തപ്താ ദാസീ ഭാവം ഉപാഗതാ
3 തതഃ കദാ ചിദ് വിനതാം പ്രവണാം പുത്ര സംനിധൗ
കാല ആഹൂയ വചനം കദ്രൂർ ഇദം അഭാഷത
4 നാഗാനാം ആലയം ഭദ്രേ സുരമ്യം രമണീയകം
സമുദ്രകുക്ഷാവ് ഏകാന്തേ തത്ര മാം വിനതേ വഹ
5 തതഃ സുപർണമാതാ താം അവഹത് സർപമാതരം
പന്നഗാൻ ഗരുഡശ് ചാപി മാതുർ വചനചോദിതഃ
6 സ സൂര്യസ്യാഭിതോ യാതി വൈനതേയോ വിഹംഗമഃ
സൂര്യരശ്മി പരീതാശ് ച മൂർച്ഛിതാഃ പന്നഗാഭവൻ
തദവസ്ഥാൻ സുതാൻ ദൃഷ്ട്വാ കദ്രൂഃ ശക്രം അഥാസ്തുവത്
7 നമസ് തേ ദേവദേവേശ നമസ് തേ ബലസൂദന
നമുചിഘ്ന നമസ് തേ ഽസ്തു സഹസ്രാക്ഷ ശചീപതേ
8 സർപാണാം സൂര്യതപ്താനാം വാരിണാ ത്വം പ്ലവോ ഭവ
ത്വം ഏവ പരമം ത്രാണം അസ്മാകം അമരോത്തമ
9 ഈശോ ഹ്യ് അസി പയഃ സ്രഷ്ടും ത്വം അനൽപം പുരന്ദര
ത്വം ഏവ മേഘസ് ത്വം വായുസ് ത്വം അഗ്നിർ വൈദ്യുതോ ഽംബരേ
10 ത്വം അഭ്രഘനവിക്ഷേപ്താ ത്വാം ഏവാഹുർ പുനർ ഘനം
ത്വം വജ്രം അതുലം ഘോരം ഘോഷവാംസ് ത്വം ബലാഹകഃ
11 സ്രഷ്ടാ ത്വം ഏവ ലോകാനാം സംഹർതാ ചാപരാജിതഃ
ത്വം ജ്യോതിഃ സർവഭൂതാനാം ത്വം ആദിത്യോ വിഭാവസുഃ
12 ത്വം മഹദ് ഭൂതം ആശ്ചര്യം ത്വം രാജാ ത്വം സുരോത്തമഃ
ത്വം വിഷ്ണുസ് ത്വം സഹസ്രാക്ഷസ് ത്വം ദേവസ് ത്വം പരായണം
13 ത്വം സർവം അമൃതം ദേവ ത്വം സോമഃ പരമാർചിതഃ
ത്വം മുഹൂർതസ് തിഥിശ് ച ത്വം ലവസ് ത്വം വൈ പുനഃ ക്ഷണ
14 ശുക്ലസ് ത്വം ബഹുലശ് ചൈവ കലാ കാഷ്ഠാ ത്രുടിസ് തഥാ
സംവത്സരർഷവോ മാസാ രജന്യശ് ച ദിനാനി ച
15 ത്വം ഉത്തമാ സഗിരി വനാ വസുന്ധരാ; സഭാസ്കരം വിതിമിരം അംബരം തഥാ
മഹോദധിഃ സതിമി തിമിംഗിലസ് തഥാ; മഹോർമിമാൻ ബഹു മകരോ ഝഷാലയഃ
16 മഹദ് യശസ് ത്വം ഇതി സദാഭിപൂജ്യസേ; മനീഷിഭിർ മുദിതമനാ മഹർഷിഭിഃ
അഭിഷ്ടുതഃ പിബസി ച സോമം അധ്വരേ; വഷട് കൃതാന്യ് അപി ച ഹവീംഷി ഭൂതയേ
17 ത്വം വിപ്രൈഃ സതതം ഇഹേജ്യസേ ഫലാർഥം; വേദാംഗേഷ്വ് അതുലബലൗഘ ഗീയസേ ച
ത്വദ് ധേതോർ യജന പരായണാ ദ്വിജേന്ദ്രാ; വേദാംഗാന്യ് അഭിഗമയന്തി സർവവേദൈഃ