മഹാഭാരതം മൂലം/ആദിപർവം/അധ്യായം37

മഹാഭാരതം മൂലം/ആദിപർവം
രചന:വ്യാസൻ
അധ്യായം 37

1 [ഷ്]
     ജരത്കാരുർ ഇതി പ്രോക്തം യത് ത്വയാ സൂതനന്ദന
     ഇച്ഛാമ്യ് ഏതദ് അഹം തസ്യ ഋഷേഃ ശ്രോതും മഹാത്മനഃ
2 കിം കാരണം ജരത്കാരോർ നാമൈതത് പ്രഥിതം ഭുവി
     ജരത്കാരു നിരുക്തം ത്വം യഥാവദ് വക്തും അർഹസി
3 [സ്]
     ജരേതി ക്ഷയം ആഹുർ വൈ ദാരുണം കാരു സഞ്ജ്ഞിതം
     ശരീരം കാരു തസ്യാസീത് തത് സ ധീമാഞ് ശനൈഃ ശനൈഃ
4 ക്ഷപയാം ആസ തീവ്രേണ തപസേത്യ് അത ഉച്യതേ
     ജരത്കാരുർ ഇതി ബ്രഹ്മൻ വാസുകേർ ഭഗിനീ തഥാ
5 ഏവം ഉക്തസ് തു ധർമാത്മാ ശൗനകഃ പ്രാഹസത് തദാ
     ഉഗ്രശ്രവസം ആമന്ത്ര്യ ഉപപന്നം ഇതി ബ്രുവൻ
6 [സ്]
     അഥ കാലസ്യ മഹതഃ സ മുനിഃ സംശിതവ്രതഃ
     തപസ്യ് അഭിരതോ ധീമാൻ ന ദാരാൻ അഭ്യകാങ്ക്ഷത
7 സ ഊർധ്വരേതാസ് തപസി പ്രസക്തഃ; സ്വാധ്യായവാൻ വീതഭയക്ലമഃ സൻ
     ചചാര സർവാം പൃഥിവീം മഹാത്മാ; ന ചാപി ദാരാൻ മനസാപ്യ് അകാങ്ക്ഷത്
8 തതോ ഽപരസ്മിൻ സമ്പ്രാപ്തേ കാലേ കസ്മിംശ് ചിദ് ഏവ തു
     പരിക്ഷിദ് ഇതി വിഖ്യാതോ രാജാ കൗരവവംശഭൃത്
9 യഥാ പാണ്ഡുർ മഹാബാഹുർ ധനുർധര വരോ ഭുവി
     ബഭൂവ മൃഗയാ ശീലഃ പുരാസ്യ പ്രപിതാമഹഃ
10 മൃഗാൻ വിധ്യൻ വഹാരാംശ് ച തരക്ഷൂൻ മഹിഷാംസ് തഥാ
    അന്യാംശ് ച വിവിധാൻ വന്യാംശ് ചചാര പൃഥിവീപതിഃ
11 സ കദാ ചിൻ മൃഗം വിദ്ധ്വാ ബാണേന നതപർവണാ
    പൃഷ്ഠതോ ധനുർ ആദായ സസാര ഗഹനേ വനേ
12 യഥാ ഹി ഭഗവാൻ രുദ്രോ വിദ്ധ്വാ യജ്ഞമൃഗം ദിവി
    അന്വഗച്ഛദ് ധനുഷ്പാണിഃ പര്യന്വേഷംസ് തതസ് തതഃ
13 ന ഹി തേന മൃഗോ വിദ്ധോ ജീവൻ ഗച്ഛതി വൈ വനം
    പൂർവരൂപം തു തൻ നൂനം ആസീത് സ്വർഗഗതിം പ്രതി
    പരിക്ഷിതസ് തസ്യ രാജ്ഞോ വിദ്ധോ യൻ നഷ്ടവാൻ മൃഗഃ
14 ദൂരം ചാപഹൃതസ് തേന മൃഗേണ സ മഹീപതിഃ
    പരിശ്രാന്തഃ പിപാസാർത ആസസാദ മുനിം വനേ
15 ഗവാം പ്രചാരേഷ്വ് ആസീനം വത്സാനാം മുഖനിഃസൃതം
    ഭൂയിഷ്ഠം ഉപയുഞ്ജാനം ഫേനം ആപിബതാം പയഃ
16 തം അഭിദ്രുത്യ വേഗേന സ രാജാ സംശിതവ്രതം
    അപൃച്ഛദ് ധനുർ ഉദ്യമ്യ തം മുനിം ക്ഷുച്ഛ്രമാന്വിതഃ
17 ഭോ ഭോ ബ്രഹ്മന്ന് അഹം രാജാ പരിക്ഷിദ് അഭിമന്യുജഃ
    മയാ വിദ്ധോ മൃഗോ നഷ്ടഃ കച് ചിത് ത്വം ദൃഷ്ടവാൻ അസി
18 സ മുനിസ് തസ്യ നോവാച കിം ചിൻ മൗന വ്രതേ സ്ഥിതഃ
    തസ്യ സ്കന്ധേ മൃതം സർപം ക്രുദ്ധോ രാജാ സമാസജത്
19 ധനുഷ്കോട്യാ സമുത്ക്ഷിപ്യ സ ചൈനം സമുദൈക്ഷത
    ന ച കിം ചിദ് ഉവാചൈനം ശുഭം വാ യദി വാശുഭം
20 സ രാജാ ക്രോധം ഉത്സൃജ്യ വ്യഥിതസ് തം തഥാഗതം
    ദൃഷ്ട്വാ ജഗാമ നഗരം ഋഷിസ് ത്വ് ആസ്തേ തഥൈവ സഃ
21 തരുണസ് തസ്യ പുത്രോ ഽഭൂത് തിഗ്മതേജാ മഹാതപാഃ
    ശൃംഗീ നാമ മഹാക്രോധോ ദുഷ്പ്രസാദോ മഹാവ്രതഃ
22 സ ദേവം പരം ഈശാനം സർവഭൂതഹിതേ രതം
    ബ്രഹ്മാണം ഉപതസ്ഥേ വൈ കാലേ കാലേ സുസംയതഃ
    സ തേന സമനുജ്ഞാതോ ബ്രഹ്മണാ ഗൃഹം ഈയിവാൻ
23 സഖ്യോക്തഃ ക്രീഡമാനേന സ തത്ര ഹസതാ കില
    സംരംഭീ കോപനോ ഽതീവ വിഷകൽപ ഋഷേഃ സുതഃ
    ഋഷിപുത്രേണ നർമാർഥം കൃശേന ദ്വിജസത്തമഃ
24 തേജസ്വിനസ് തവ പിതാ തഥൈവ ച തപസ്വിനഃ
    ശവം സ്കന്ധേന വഹതി മാ ശൃംഗിൻ ഗർവിതോ ഭവ
25 വ്യാഹരത്സ്വ് ഋഷിപുത്രേഷു മാ സ്മ കിം ചിദ് വചോ വദീഃ
    അസ്മദ്വിധേഷു സിദ്ധേഷു ബ്രഹ്മവിത്സു തപസ്വിഷു
26 ക്വ തേ പുരുഷമാനിത്വം ക്വ തേ വാചസ് തഥാവിധഃ
    ദർപജാഃ പിതരം യസ് ത്വം ദ്രഷ്ടാ ശവധരം തഥാ