മഹാഭാരതം മൂലം/ആദിപർവം/അധ്യായം54

മഹാഭാരതം മൂലം/ആദിപർവം
രചന:വ്യാസൻ
അധ്യായം 54

1 [സ്]
     ശ്രുത്വാ തു സർപസത്രായ ദീക്ഷിതം ജനമേജയം
     അഭ്യാഗച്ഛദ് ഋഷിർ വിദ്വാൻ കൃഷ്ണദ്വൈപായനസ് തദാ
2 ജനയാം ആസ യം കാലീ ശക്തേഃ പുത്രാത് പരാശരാത്
     കന്യൈവ യമുനാ ദ്വീപേ പാണ്ഡവാനാം പിതാമഹം
3 ജാതമാത്രശ് ച യഃ സദ്യ ഇഷ്ട്യാ ദേഹം അവീവൃധത്
     വേദാംശ് ചാധിജഗേ സാംഗാൻ സേതിഹാസാൻ മഹായശാഃ
4 യം നാതിതപസാ കശ് ചിൻ ന വേദാധ്യയനേന ച
     ന വ്രതൈർ നോപവാസൈശ് ച ന പ്രസൂത്യാ ന മന്യുനാ
5 വിവ്യാസൈകം ചതുർധാ യോ വേദം വേദ വിദാം വരഃ
     പരാവരജ്ഞോ ബ്രഹ്മർഷിഃ കവിഃ സത്യവ്രതഃ ശുചിഃ
6 യഃ പാണ്ഡും ധൃതരാഷ്ട്രം ച വിദുരം ചാപ്യ് അജീജനത്
     ശന്തനോഃ സന്തതിം തന്വൻ പുണ്യകീർതിർ മഹായശാഃ
7 ജനമേജയസ്യ രാജർഷേഃ സ തദ് യജ്ഞസദസ് തദാ
     വിവേശ ശിഷ്യൈഃ സഹിതോ വേദവേദാംഗപാരഗൈഃ
8 തത്ര രാജാനം ആസീനം ദദർശ ജനമേജയം
     വൃതം സദസ്യൈർ ബഹുഭിർ ദേവൈർ ഇവ പുരന്ദരം
9 തഥാ മൂധ്വാവസിക്തൈശ് ച നാനാജനപദേശ്വരൈഃ
     ഋത്വിഗ്ഭിർ ദേവകൽപൈശ് ച കുശലൈർ യജ്ഞസംസ്തരേ
10 ജനമേജയസ് തു രാജർഷിർ ദൃഷ്ട്വാ തം ഋഷിം ആഗതം
    സഗണോ ഽബ്യുദ്യയൗ തൂർണം പ്രീത്യാ ഭരതസത്തമഃ
11 കാഞ്ചനം വിഷ്ടരം തസ്മൈ സദസ്യാനുമതേ പ്രഭുഃ
    ആസനം കൽപയാം ആസ യഥാ ശക്രോ ബൃഹസ്പതേഃ
12 തത്രോപവിഷ്ടം വരദം ദേവർഷിഗണപൂജിതം
    പൂജയാം ആസ രാജേന്ദ്രഃ ശാസ്ത്രദൃഷ്ടേന കർമണാ
13 പാദ്യം ആചമനീയം ച അർഘ്യം ഗാം ച വിധാനതഃ
    പിതാമഹായ കൃഷ്ണായ തദ് അർഹായ ന്യവേദയത്
14 പ്രതിഗൃഹ്യ ച താം പൂജാം പാണ്ഡവാജ് ജനമേജയാത്
    ഗാം ചൈവ സമനുജ്ഞായ വ്യാസഃ പ്രീതോ ഽഭവത് തദാ
15 തഥാ സമ്പൂജയിത്വാ തം യത്നേന പ്രപിതാമഹം
    ഉപോപവിശ്യ പ്രീതാത്മാ പര്യപൃച്ഛദ് അനാമയം
16 ഭഗവാൻ അപി തം ദൃഷ്ട്വാ കുശലം പ്രതിവേദ്യ ച
    സദസ്യൈഃ പൂജിതഃ സർവൈഃ സദസ്യാൻ അഭ്യപൂജയത്
17 തതസ് തം സത്കൃതം സർവൈഃ സദസ്യൈർ ജനമേജയഃ
    ഇദം പശ്ചാദ് ദ്വിജശ്രേഷ്ഠം പര്യപൃച്ഛത് കൃതാഞ്ജലിഃ
18 കുരൂണാം പാണ്ഡവാനാം ച ഭവാൻ പ്രത്യക്ഷദർശിവാൻ
    തേഷാം ചരിതം ഇച്ഛാമി കഥ്യമാനം ത്വയാ ദ്വിജ
19 കഥം സമഭവദ് ഭേദസ് തേഷാം അക്ലിഷ്ടകർമണാം
    തച് ച യുദ്ധം കഥം വൃത്തം ഭൂതാന്ത കരണം മഹത്
20 പിതാമഹാനാം സർവേഷാം ദൈവേനാവിഷ്ട ചേതസാം
    കാർത്സ്ന്യേനൈതത് സമാചക്ഷ്വ ഭഗവൻ കുശലോ ഹ്യ് അസി
21 തസ്യ തദ് വചനം ശ്രുത്വാ കൃഷ്ണദ്വൈപായനസ് തദാ
    ശശാസ ശിഷ്യം ആസീനം വൈശമ്പായനം അന്തികേ
22 കുരൂണാം പാണ്ഡവാനാം ച യഥാ ഭേദോ ഽഭവത് പുരാ
    തദ് അസ്മൈ സർവം ആചക്ഷ്വ യൻ മത്തഃ ശ്രുതവാൻ അസി
23 ഗുരോർ വചനം ആജ്ഞായ സ തു വിപ്രർഷഭസ് തദാ
    ആചചക്ഷേ തതഃ സർവം ഇതിഹാസം പുരാതനം
24 തസ്മൈ രാജ്ഞേ സദസ്യേഭ്യഃ ക്ഷത്രിയേഭ്യശ് ച സർവശഃ
    ഭേദം രാജ്യവിനാശം ച കുരുപാണ്ഡവയോസ് തദാ