മഹാഭാരതം മൂലം/ആദിപർവം/അധ്യായം6
| ←അധ്യായം5 | മഹാഭാരതം മൂലം/ആദിപർവം രചന: അധ്യായം 6 |
അധ്യായം7→ |
1 [സ്]
അഗ്നേർ അഥ വചഃ ശ്രുത്വാ തദ് രക്ഷഃ പ്രജഹാര താം
ബ്രഹ്മൻ വരാഹരൂപേണ മനോമാരുതരംഹസാ
2 തതഃ സ ഗർഭോ നിവസൻ കുക്ഷൗ ഭൃഗുകുലോദ്വഹ
രോഷാൻ മാതുശ് ച്യുതഃ കുക്ഷേശ് ച്യവനസ് തേന സോ ഽഭവത്
3 തം ദൃഷ്ട്വാ മാതുർ ഉദരാച് ച്യുതം ആദിത്യവർചസം
തദ് രക്ഷോ ഭസ്മസാദ് ഭൂതം പപാത പരിമുച്യ താം
4 സാ തം ആദായ സുശ്രോണീ സസാര ഭൃഗുനന്ദനം
ച്യവനം ഭാർഗവം ബ്രഹ്മൻ പുലോമാ ദുഃഖമൂർച്ഛിതാ
5 താം ദദർശ സ്വയം ബ്രഹ്മാ സർവലോകപിതാമഹഃ
രുദതീം ബാഷ്പപൂർണാക്ഷീം ഭൃഗോർ ഭാര്യാം അനിന്ദിതാം
സാന്ത്വയാം ആസ ഭഗവാൻ വധൂം ബ്രഹ്മാ പിതാമഹഃ
6 അശ്രുബിന്ദൂദ്ഭവാ തസ്യാഃ പ്രാവർതത മഹാനദീ
അനുവർതതീ സൃതിം തസ്യാ ഭൃഗോഃ പത്ന്യാ യശസ്വിനഃ
7 തസ്യാ മാർഗം സൃതവതീം ദൃഷ്ട്വാ തു സരിതം തദാ
നാമ തസ്യാസ് തദാ നദ്യാശ് ചക്രേ ലോകപിതാമഹഃ
വധൂ സരേതി ഭഗവാംശ് ച്യവനസ്യാശ്രമം പ്രതി
8 സ ഏവം ച്യവനോ ജജ്ഞേ ഭൃഗോഃ പുത്രഃ പ്രതാപവാൻ
തം ദദർശ പിതാ തത്ര ച്യവനം താം ച ഭാമിനീം
9 സ പുലോമാം തതോ ഭാര്യാം പപ്രച്ഛ കുപിതോ ഭൃഗുഃ
കേനാസി രക്ഷസേ തസ്മൈ കഥിതേഹ ജിഹീർഷവേ
ന ഹി ത്വാം വേദ തദ് രക്ഷോ മദ് ഭാര്യാം ചാരുഹാസിനീം
10 തത്ത്വം ആഖ്യാഹി തം ഹ്യ് അദ്യ ശപ്തും ഇച്ഛാമ്യ് അഹം രുഷാ
ബിഭേതി കോ ന ശാപാൻ മേ കസ്യ ചായം വ്യതിക്രമഃ
11 [പ്]
അഗ്നിനാ ഭഗവാംസ് തസ്മൈ രക്ഷസേ ഽഹം നിവേദിതാ
തതോ മാം അനയദ് രക്ഷഃ ക്രോശന്തീം കുരരീം ഇവ
12 സാഹം തവ സുതസ്യാസ്യ തേജസാ പരിമോക്ഷിതാ
ഭസ്മീഭൂതം ച തദ് രക്ഷോ മാം ഉത്സൃജ്യ പപാത വൈ
13 [സൂത]
ഇതി ശ്രുത്വാ പുലോമായാ ഭൃഗുഃ പരമമന്യുമാൻ
ശശാപാഗ്നിം അഭിക്രുദ്ധഃ സർവഭക്ഷോ ഭവിഷ്യസി