മഹാഭാരതം മൂലം/ആദിപർവം/അധ്യായം62
| ←അധ്യായം61 | മഹാഭാരതം മൂലം/ആദിപർവം രചന: അധ്യായം 62 |
അധ്യായം63→ |
1 [ജ്]
ത്വത്തഃ ശ്രുതം ഇദം ബ്രഹ്മൻ ദേവദാനവരക്ഷസാം
അംശാവതരണം സമ്യഗ് ഗന്ധർവാപ്സരസാം തഥാ
2 ഇമം തു ഭൂയ ഇച്ഛാമി കുരൂണാം വംശം ആദിതഃ
കഥ്യമാനം ത്വയാ വിപ്ര വിപ്രർഷിഗണസംനിധൗ
3 [വ്]
പൗരവാണാം വംശകരോ ദുഃഷന്തോ നാമ വീര്യവാൻ
പൃഥിവ്യാശ് ചതുരന്തായാ ഗോപ്താ ഭരതസത്തമ
4 ചതുർഭാഗം ഭുവഃ കൃത്സ്നം സ ഭുങ്ക്തേ മനുജേശ്വരഃ
സമുദ്രാവരണാംശ് ചാപി ദേശാൻ സ സമിതിഞ്ജയഃ
5 ആമ്ലേച്ഛാടവികാൻ സർവാൻ സ ഭുങ്ക്തേ രിപുമർദനഃ
രത്നാകര സമുദ്രാന്താംശ് ചാതുർവർണ്യജനാവൃതാൻ
6 ന വർണസങ്കരകരോ നാകൃഷ്യ കരകൃജ് ജനഃ
ന പാപകൃത് കശ് ചിദ് ആസീത് തസ്മിൻ രാജനി ശാസതി
7 ധർമ്യാം രതിം സേവമാനാ ധർമാർഥാവ് അഭിപേദിരേ
തദാ നരാ നരവ്യാഘ്ര തസ്മിഞ് ജനപദേശ്വരേ
8 നാസീച് ചോരഭയം താത ന ക്ഷുധാ ഭയം അണ്വ് അപി
നാസീദ് വ്യാധിഭയം ചാപി തസ്മിഞ് ജനപദേശ്വരേ
9 സ്വൈർ ധർമൈ രേമിരേ വർണാ ദൈവേ കർമണി നിഃസ്പൃഹാഃ
തം ആശ്രിത്യ മഹീപാലം ആസംശ് ചൈവാകുതോ ഭയാഃ
10 കാലവർഷീ ച പർജന്യഃ സസ്യാനി ഫലവന്തി ച
സർവരത്നസമൃദ്ധാ ച മഹീ വസുമതീ തദാ
11 സ ചാദ്ഭുതമഹാവീര്യോ വജ്രസംഹനനോ യുവാ
ഉദ്യമ്യ മന്ദരം ദോർഭ്യാം ഹരേത് സവനകാനനം
12 ധനുഷ്യ് അഥ ഗദായുദ്ധേ ത്സരുപ്രഹരണേഷു ച
നാഗപൃഷ്ഠേ ഽശ്വപൃഷ്ഠേ ച ബഭൂവ പരിനിഷ്ഠിതഃ
13 ബലേ വിഷ്ണുസമശ് ചാസീത് തേജസാ ഭാസ്കരോപമഃ
അക്ഷുബ്ധത്വേ ഽർണവ സമഃ സഹിഷ്ണുത്വേ ധരാ സമഃ
14 സംമതഃ സ മഹീപാലഃ പ്രസന്നപുരരാഷ്ട്രവാൻ
ഭൂയോ ധർമപരൈർ ഭാവൈർ വിദിതം ജനം ആവസത്