മഹാഭാരതം മൂലം/ആദിപർവം/അധ്യായം61

←അധ്യായം60

മഹാഭാരതം മൂലം/ആദിപർവം രചന:വ്യാസൻ അധ്യായം 61

അധ്യായം62→

1 [ജ്]
     ദേവാനാം ദാനവാനാം ച യക്ഷാണാം അഥ രക്ഷസാം
     അന്യേഷാം ചൈവ ഭൂതാനാം സർവേഷാം ഭഗവന്ന് അഹം
 2 ശ്രോതും ഇച്ഛാമി തത്ത്വേന മാനുഷേഷു മഹാത്മനാം
     ജന്മ കർമ ച ഭൂതാനാം ഏതേഷാം അനുപൂർവശഃ
 3 [വ്]
     മാനുഷേഷു മനുഷ്യേന്ദ്ര സംഭൂതാ യേ ദിവൗകസഃ
     പ്രഥമം ദാനവാംശ് ചൈവ താംസ് തേ വക്ഷ്യാമി സർവശഃ
 4 വിപ്രചിത്തിർ ഇതി ഖ്യാതോ യ ആസീദ് ദാനവർഷഭഃ
     ജരാസന്ധ ഇതി ഖ്യാതഃ സ ആസീൻ മനുജർഷഭഃ
 5 ദിതേഃ പുത്രസ് തു യോ രാജൻ ഹിരണ്യകശിപുഃ സ്മൃതഃ
     സ ജജ്ഞേ മാനുഷേ ലോകേ ശിശുപാലോ നരർഷഭഃ
 6 സംഹ്രാദ ഇതി വിഖ്യാതഃ പ്രഹ്രാദസ്യാനുജസ് തു യഃ
     സ ശല്യ ഇതി വിഖ്യാതോ ജജ്ഞേ ബാഹ്ലീല പുംഗവഃ
 7 അനുഹ്രാദസ് തു തേജസ്വീ യോ ഽഭൂത് ഖ്യാതോ ജഘന്യജഃ
     ധൃഷ്ടകേതുർ ഇതി ഖ്യാതഃ സ ആസീൻ മനുജേശ്വരഃ
 8 യസ് തു രാജഞ് ശിബിർ നാമ ദൈതേയഃ പരികീർതിതഃ
     ദ്രുമ ഇത്യ് അഭിവിഖ്യാതഃ സ ആസീദ് ഭുവി പാർഥിവഃ
 9 ബാഷ്കലോ നാമ യസ് തേഷാം ആസീദ് അസുരസത്തമഃ
     ഭഗദത്ത ഇതി ഖ്യാതഃ സ ആസീൻ മനുജേശ്വരഃ
 10 അയഃ ശിരാ അശ്വശിരാ അയഃ ശങ്കുശ് ച വീര്യവാൻ
    തഥാ ഗഗനമൂർധാ ച വേഗവാംശ് ചാത്ര പഞ്ചമഃ
11 പഞ്ചൈതേ ജജ്ഞിരേ രാജൻ വീര്യവന്തോ മഹാസുരാഃ
    കേകയേഷു മഹാത്മാനഃ പാർഥിവർഷഭ സത്തമാഃ
12 കേതുമാൻ ഇതി വിഖ്യാതോ യസ് തതോ ഽന്യഃ പ്രതാപവാൻ
    അമിതൗജാ ഇതി ഖ്യാതഃ പൃഥിവ്യാം സോ ഽഭവന്ന് നൃപഃ
13 സ്വർഭാനുർ ഇതി വിഖ്യാതഃ ശ്രീമാൻ യസ് തു മഹാസുരഃ
    ഉഗ്രസേന ഇതി ഖ്യാത ഉഗ്ര കർമാ നരാധിപഃ
14 യസ് ത്വ് അശ്വ ഇതി വിഖ്യാതഃ ശ്രീമാൻ ആസീൻ മഹാസുരഃ
    അശോകോ നാമ രാജാസീൻ മഹാവീര്യപരാക്രമഃ
15 തസ്മാദ് അവരജോ യസ് തു രാജന്ന് അശ്വപതിഃ സ്മൃതഃ
    ദൈതേയഃ സോ ഽഭവദ് രാജാ ഹാർദിക്യോ മനുജർഷഭഃ
16 വൃഷപർവേതി വിഖ്യാതഃ ശ്രീമാൻ യസ് തു മഹാസുരഃ
    ദീർഘപ്രജ്ഞ ഇതി ഖ്യാതഃ പൃഥിവ്യാം സോ ഽഭവൻ നൃപഃ
17 അജകസ് ത്വ് അനുജോ രാജൻ യ ആസീദ് വൃഷപർവണഃ
    സ മല്ല ഇതി വിഖ്യാതഃ പൃഥിവ്യാം അഭവൻ നൃപഃ
18 അശ്വഗ്രീവ ഇതി ഖ്യാതഃ സത്ത്വവാൻ യോ മഹാസുരഃ
    രോചമാന ഇതി ഖ്യാതഃ പൃഥിവ്യാം സോ ഽഭവൻ നൃപഃ
19 സൂക്ഷ്മസ് തു മതിമാൻ രാജൻ കീർതിമാൻ യഃ പ്രകീർതിതഃ
    ബൃഹന്ത ഇതി വിഖ്യാതഃ ക്ഷിതാവ് ആസീത് സ പാർഥിവഃ
20 തുഹുണ്ഡ ഇതി വിഖ്യാതോ യ ആസീദ് അസുരോത്തമഃ
    സേനാ ബിന്ദുർ ഇതി ഖ്യാതഃ സ ബഭൂവ നരാധിപഃ
21 ഇസൃപാ നാമ യസ് തേഷാം അസുരാണാം ബലാധികഃ
    പാപജിൻ നാമ രാജാസീദ് ഭുവി വിഖ്യാതവിക്രമഃ
22 ഏകചക്ര ഇതി ഖ്യാത ആസീദ് യസ് തു മഹാസുരഃ
    പ്രതിവിന്ധ്യ ഇതി ഖ്യാതോ ബഭൂവ പ്രഥിതഃ ക്ഷിതൗ
23 വിരൂപാക്ഷസ് തു ദൈതേയശ് ചിത്രയോധീ മഹാസുരഃ
    ചിത്രവർമേതി വിഖ്യാതഃ ക്ഷിതാവ് ആസീത് സ പാർഥിവഃ
24 ഹരസ് ത്വ് അരിഹരോ വീര ആസീദ് യോ ദാനവോത്തമഃ
    സുവാസ്തുർ ഇതി വിഖ്യാതഃ സ ജജ്ഞേ മനുജർഷഭഃ
25 അഹരസ് തു മഹാതേജാഃ ശത്രുപക്ഷ ക്ഷയം കരഃ
    ബാഹ്ലീകോ നാമ രാജാ സ ബഭൂവ പ്രഥിതഃ ക്ഷിതൗ
26 നിചന്ദ്രശ് ചന്ദ്ര വക്ത്രശ് ച യ ആസീദ് അസുരോത്തമഃ
    മുഞ്ജ കേശ ഇതി ഖ്യാതഃ ശ്രീമാൻ ആസീത് സ പാർഥിവഃ
27 നികുംഭസ് ത്വ് അജിതഃ സംഖ്യേ മഹാമതിർ അജായത
    ഭൂമൗ ഭൂമിപതിഃ ശ്രേഷ്ഠോ ദേവാധിപ ഇതി സ്മൃതഃ
28 ശരഭോ നാമ യസ് തേഷാം ദൈതേയാനാം മഹാസുരഃ
    പൗരവോ നാമ രാജർഷിഃ സ ബഭൂവ നരേഷ്വ് ഇഹ
29 ദ്വിതീയഃ ശലഭസ് തേഷാം അസുരാണാം ബഭൂവ യഃ
    പ്രഹ്രാദോ നാമ ബാഹ്ലീകഃ സ ബഭൂവ നരാധിപഃ
30 ചന്ദ്രസ് തു ദിതിജശ്രേഷ്ഠോ ലോകേ താരാധിപോപമഃ
    ഋഷികോ നാമ രാജർഷിർ ബഭൂവ നൃപസത്തമഃ
31 മൃതപാ ഇതി വിഖ്യാതോ യ ആസീദ് അസുരോത്തമഃ
    പശ്ചിമാനൂപകം വിദ്ധി തം നൃപം നൃപസത്തമ
32 ഗവിഷ്ഠസ് തു മഹാതേജാ യഃ പ്രഖ്യാതോ മഹാസുരഃ
    ദ്രുമസേന ഇതി ഖ്യാതഃ പൃഥിവ്യാം സോ ഽഭവൻ നൃപഃ
33 മയൂര ഇതി വിഖ്യാതഃ ശ്രീമാൻ യസ് തു മഹാസുരഃ
    സ വിശ്വ ഇതി വിഖ്യാതോ ബഭൂവ പൃഥിവീപതിഃ
34 സുപർണ ഇതി വിഖ്യാതതസ്മാദ് അവരജസ് തു യഃ
    കാലകീർതിർ ഇതി ഖ്യാതഃ പൃഥിവ്യാം സോ ഽഭവൻ നൃപഃ
35 ചന്ദ്ര ഹന്തേതി യസ് തേഷാം കീർതിതഃ പ്രവരോ ഽസുരഃ
    ശുനകോ നാമ രാജർഷിഃ സ ബഭൂവ നരാധിപഃ
36 വിനാശനസ് തു ചന്ദ്രസ്യ യ ആഖ്യാതോ മഹാസുരഃ
    ജാനകിർ നാമ രാജർഷിഃ സ ബഭൂവ നരാധിപഃ
37 ദീർഘജിഹ്വസ് തു കൗരവ്യ യ ഉക്തോ ദാനവർഷഭഃ
    കാശിരാജ ഇതി ഖ്യാതഃ പൃഥിവ്യാം പൃഥിവീപതിഃ
38 ഗ്രഹം തു സുഷുവേ യം തം സിംഹീ ചന്ദ്രാർകമർദനം
    ക്രാഥ ഇത്യ് അഭിവിഖ്യാതഃ സോ ഽഭവൻ മനുജാധിപഃ
39 അനായുഷസ് തു പുത്രാണാം ചതുർണാം പ്രവരോ ഽസുരഃ
    വിക്ഷരോ നാമ തേജസ്വീ വസു മിത്രോ ഽഭവൻ നൃപഃ
40 ദ്വിതീയോ വിക്ഷരാദ്യസ് തു നരാധിപ മഹാസുരഃ
    പാംസുരാഷ്ട്രാധിപ ഇതി വിശ്രുതഃ സോ ഽഭവൻ നൃപഃ
41 ബലവീര ഇതി ഖ്യാതോ യസ് ത്വ് ആസീദ് അസുരോത്തമഃ
    പൗണ്ഡ്ര മത്സ്യക ഇത്യ് ഏവ സ ബഭൂവ നരാധിപഃ
42 വൃത്ര ഇത്യ് അഭിവിഖ്യാതോ യസ് തു രാജൻ മഹാസുരഃ
    മണിമാൻ നാമ രാജർഷിഃ സ ബഭൂവ നരാധിപഃ
43 ക്രോധഹന്തേതി യസ് തസ്യ ബഭൂവാവരജോ ഽസുരഃ
    ദണ്ഡ ഇത്യ് അഭിവിഖ്യാതഃ സ ആസീൻ നൃപതിഃ ക്ഷിതൗ
44 ക്രോധവർധന ഇത്യ് ഏവ യസ് ത്വ് അന്യഃ പരികീർതിതഃ
    ദണ്ഡധാര ഇതി ഖ്യാതഃ സോ ഽഭവൻ മനുജേശ്വരഃ
45 കാലകായാസ് തു യേ പുത്രാസ് തേഷാം അഷ്ടൗ നരാധിപാഃ
    ജജ്ഞിരേ രാജശാർദൂല ശാർദൂലസമവിക്രമാഃ
46 മഗധേഷു ജയത്സേനഃ ശ്രീമാൻ ആസീത് സ പാർഥിവഃ
    അഷ്ടാനാം പ്രവരസ് തേഷാം കാലേയാനാം മഹാസുരഃ
47 ദ്വിതീയസ് തു തതസ് തേഷാം ശ്രീമാൻ ഹരിഹയോപമഃ
    അപരാജിത ഇത്യ് ഏവ സ ബഭൂവ നരാധിപഃ
48 തൃതീയസ് തു മഹാരാജ മഹാബാഹുർ മഹാസുരഃ
    നിഷാദാധിപതിർ ജജ്ഞേ ഭുവി ഭീമപരാക്രമഃ
49 തേഷാം അന്യതമോ യസ് തു ചതുർഥഃ പരികീർതിതഃ
    ശ്രേണിമാൻ ഇതി വിഖ്യാതഃ ക്ഷിതൗ രാജർഷിസത്തമഃ
50 പഞ്ചമസ് തു ബഭൂവൈഷാം പ്രവരോ യോ മഹാസുരഃ
    മഹൗജാ ഇതി വിഖ്യാതോ ബഭൂവേഹ പരന്തപഃ
51 ഷഷ്ഠസ് തു മതിമാൻ യോ വൈ തേഷാം ആസീൻ മഹാസുരഃ
    അഭീരുർ ഇതി വിഖ്യാതഃ ക്ഷിതൗ രാജർഷിസത്തമഃ
52 സമുദ്രസേനശ് ച നൃപസ് തേഷാം ഏവാഭവദ് ഗുണാൻ
    വിശ്രുതഃ സാഗരാന്തായാം ക്ഷിതൗ ധർമാർഥതത്ത്വവിത്
53 ബൃഹന്ന് നാമാഷ്ടമസ് തേഷാം കാലേയാനാം പരന്തപഃ
    ബഭൂവ രാജൻ ധർമാത്മാ സർവഭൂതഹിതേ രതഃ
54 ഗണഃ ക്രോധവശോ നാമ യസ് തേ രാജൻ പ്രകീർതിതഃ
    തതഃ സഞ്ജജ്ഞിരേ വീരാഃ ക്ഷിതാവ് ഇഹ നരാധിപാഃ
55 നന്ദികഃ കർണവേഷ്ടശ് ച സിദ്ധാർഥാഃ കീടകസ് തഥാ
    സുവീരശ് ച സുബാഹുശ് ച മഹാവീരോ ഽഥ ബാഹ്ലികഃ
56 ക്രോധോ വിചിത്യഃ സുരസഃ ശ്രീമാൻ നീലശ് ച ഭൂമിപഃ
    വീര ധാമാ ച കൗരവ്യ ഭൂമിപാലശ് ച നാമതഃ
57 ദന്തവക്ത്രശ് ച നാമാസീദ് ദുർജയശ് ചൈവ നാമതഃ
    രുക്മീ ച നൃപശാർദൂലോ രാജാ ച ജനമേജയഃ
58 ആഷാഢോ വായുവേഗശ് ച ഭൂമിതേജാസ് തഥൈവ ച
    ഏകലവ്യഃ സുമിത്രശ് ച വാടധാനോ ഽഥ ഗോമുഖഃ
59 കാരൂഷകാശ് ച രാജാനഃ ക്ഷേമധൂർതിസ് തഥൈവ ച
    ശ്രുതായുർ ഉദ്ധവശ് ചൈവ ബൃഹത്സേനസ് തഥൈവ ച
60 ക്ഷേമോഗ്ര തീർഥഃ കുഹരഃ കലിംഗേഷു നരാധിപഃ
    മതിമാംശ് ച മനുഷ്യേന്ദ്ര ഈശ്വരശ് ചേതി വിശ്രുതഃ
61 ഗണാത് ക്രോധവശാദ് ഏവം രാജപൂഗോ ഽഭവത് ക്ഷിതൗ
    ജാതഃ പുരാ മഹാരാജ മഹാകീർതിർ മഹാബലഃ
62 യസ് ത്വ് ആസീദ് ദേവകോ നാമ ദേവരാജസമദ്യുതിഃ
    സ ഗന്ധർവപതിർ മുഖ്യഃ ക്ഷിതൗ ജജ്ഞേ നരാധിപഃ
63 ബൃഹസ്പതേർ ബൃഹത് കീർതേർ ദേവർഷേർ വിദ്ധി ഭാരത
    അംശാദ് ദ്രോണം സമുത്പന്നം ഭാരദ്വാജം അയോനിജം
64 ധന്വിനാം നൃപശാർദൂല യഃ സ സർവാസ്ത്രവിത്തമഃ
    ബൃഹത് കീർതിർ മഹാതേജാഃ സഞ്ജജ്ഞേ മനുജേഷ്വ് ഇഹ
65 ധനുർവേദേ ച വേദേ ച യം തം വേദവിദോ വിദുഃ
    വരിഷ്ഠം ഇന്ദ്രകർമാണം ദ്രോണം സ്വകുലവർധനം
66 മഹാദേവാന്തകാഭ്യാം ച കാമാത് ക്രോധാച് ച ഭാരത
    ഏകത്വം ഉപപന്നാനാം ജജ്ഞേ ശൂരഃ പരന്തപഃ
67 അശ്വത്ഥാമാ മഹാവീര്യഃ ശത്രുപക്ഷ ക്ഷയം കരഃ
    വീരഃ കമലപത്രാക്ഷഃ ക്ഷിതാവ് ആസീൻ നരാധിപ
68 ജജ്ഞിരേ വസവസ് ത്വ് അഷ്ടൗ ഗംഗായാം ശന്തനോഃ സുതാഃ
    വസിഷ്ഠസ്യ ച ശാപേന നിയോഗാദ് വാസവസ്യ ച
69 തേഷാം അവരജോ ഭീഷ്മഃ കുരൂണാം അഭയങ്കരഃ
    മതിമാൻ വേദവിദ് വാഗ്മീ ശത്രുപക്ഷ ക്ഷയം കരഃ
70 ജാമദഗ്ന്യേന രാമേണ യഃ സ സർവവിദാം വരഃ
    അയുധ്യത മഹാതേജാ ഭാർഗവേണ മഹാത്മനാ
71 യസ് തു രാജൻ കൃപോ നാമ ബ്രഹ്മർഷിർ അഭവത് ക്ഷിതൗ
    രുദ്രാണാം തം ഗണാദ് വിദ്ധി സംഭൂതം അതിപൗരുഷം
72 ശകുനിർ നാമ യസ് ത്വ് ആസീദ് രാജാ ലോകേ മഹാരഥഃ
    ദ്വാപരം വിദ്ധി തം രാജൻ സംഭൂതം അരിമർദനം
73 സാത്യകിഃ സത്യസന്ധസ് തു യോ ഽസൗ വൃഷ്ണികുലോദ്വഹഃ
    പക്ഷാത് സ ജജ്ഞേ മരുതാം ദേവാനാം അരിമർദനഃ
74 ദ്രുപദശ് ചാപി രാജർഷിസ് തത ഏവാഭവദ് ഗണാത്
    മാനുഷേ നൃപ ലോകേ ഽസ്മിൻ സർവശസ്ത്രഭൃതാം വരഃ
75 തതശ് ച കൃതവർമാണം വിദ്ധി രാജഞ് ജനാധിപം
    ജാതം അപ്രതികർമാണം ക്ഷത്രിയർഷഭ സത്തമം
76 മരുതാം തു ഗണാദ് വിദ്ധി സഞ്ജാതം അരിമർദനം
    വിരാടം നാമ രാജർഷിം പരരാഷ്ട്ര പ്രതാപനം
77 അരിഷ്ടായാസ് തു യഃ പുത്രോ ഹംസ ഇത്യ് അഭിവിശ്രുതഃ
    സ ഗന്ധർവപതിർ ജജ്ഞേ കുരുവംശവിവർധനഃ
78 ധൃതരാഷ്ട്ര ഇതി ഖ്യാതഃ കൃഷ്ണദ്വൈപായനാദ് അപി
    ദീർഘബാഹുർ മഹാതേജാഃ പ്രജ്ഞാ ചക്ഷുർ നരാധിപഃ
    മാതുർ ദോഷാദ് ഋഷേഃ കോപാദ് അന്ധ ഏവ വ്യജായത
79 അത്രേസ് തു സുമഹാഭാഗം പുത്രം പുത്രവതാം വരം
    വിദുരം വിദ്ധി ലോകേ ഽസ്മിഞ് ജാതം ബുദ്ധിമതാം വരം
80 കലേർ അംശാത് തു സഞ്ജജ്ഞേ ഭുവി ദുര്യോധനോ നൃപഃ
    ദുർബുദ്ധിർ ദുർമതിശ് ചൈവ കുരൂണാം അയശഃ കരഃ
81 ജഗതോ യഃ സ സർവസ്യ വിദ്വിഷ്ടഃ കലിപൂരുഷഃ
    യഃ സർവാം ഘാതയാം ആസ പൃഥിവീം പുരുഷാധമഃ
    യേന വൈരം സമുദ്ദീപ്തം ഭൂതാന്ത കരണം മഹത്
82 പൗലസ്ത്യാ ഭ്രാതരഃ സർവേ ജജ്ഞിരേ മനുജേഷ്വ് ഇഹ
    ശതം ദുഃശാസനാദീനാം സർവേഷാം ക്രൂരകർമണാം
83 ദുർമുഖോ ദുഃസഹശ് ചൈവ യേ ചാന്യേ നാനുശബ്ദിതാഃ
    ദുര്യോധന സഹായാസ് തേ പൗലസ്ത്യാ ഭരതർഷഭ
84 ധർമസ്യാംശം തു രാജാനം വിദ്ധി രാജൻ യുധിഷ്ഠിരം
    ഭീമസേനം തു വാതസ്യ ദേവരാജസ്യ ചാർജുനം
85 അശ്വിനോസ് തു തഥൈവാംശൗ രൂപേണാപ്രതിമൗ ഭുവി
    നകുലഃ സഹദേവശ് ച സർവലോകമനോഹരൗ
86 യഃ സുവർചേതി വിഖ്യാതഃ സോമപുത്രഃ പ്രതാപവാൻ
    അഭിമന്യുർ ബൃഹത് കീർതിർ അർജുനസ്യ സുതോ ഽഭവത്
87 അഗ്നേർ അംശം തു വിദ്ധി ത്വം ധൃഷ്ടദ്യുമ്നം മഹാരഥം
    ശിഖണ്ഡിനം അഥോ രാജൻ സ്ത്രീപുംസം വിദ്ധി രാക്ഷസം
88 ദ്രൗപദേയാശ് ച യേ പഞ്ച ബഭൂവുർ ഭരതർഷഭ
    വിശ്വേ ദേവഗണാൻ രാജംസ് താൻ വിദ്ധി ഭരതർഷഭ
89 ആമുക്തകവചഃ കർണോ യസ് തു ജജ്ഞേ മഹാരഥഃ
    ദിവാകരസ്യ തം വിദ്ധി ദേവസ്യാംശം അനുത്തമം
90 യസ് തു നാരായണോ നാമ ദേവദേവഃ സനാതനഃ
    തസ്യാംശോ മാനുഷേഷ്വ് ആസീദ് വാസുദേവഃ പ്രതാപവാൻ
91 ശേഷസ്യാംശസ് തു നാഗസ്യ ബലദേവോ മഹാബലഃ
    സനത്കുമാരം പ്രദ്യുമ്നം വിദ്ധി രാജൻ മഹൗജസം
92 ഏവം അന്യേ മനുഷ്യേന്ദ്ര ബഹവോ ഽംശാ ദിവൗകസാം
    ജജ്ഞിരേ വസുദേവസ്യ കുലേ കുലവിവർധനാഃ
93 ഗണസ് ത്വ് അപ്സരസാം യോ വൈ മയാ രാജൻ പ്രകീർതിതഃ
    തസ്യ ഭാഗഃ ക്ഷിതൗ ജജ്ഞേ നിയോഗാദ് വാസവസ്യ ച
94 താനി ഷോഡശ ദേവീനാം സഹസ്രാണി നരാധിപ
    ബഭൂവുർ മാനുഷേ ലോകേ നാരായണ പരിഗ്രഹഃ
95 ശ്രിയസ് തു ഭാഗഃ സഞ്ജജ്ഞേ രത്യർഥം പൃഥിവീതലേ
    ദ്രുപദസ്യ കുലേ കന്യാ വേദിമധ്യാദ് അനിന്ദിതാ
96 നാതിഹ്രസ്വാ ന മഹതീ നീലോത്പലസുഗന്ധിനീ
    പദ്മായതാക്ഷീ സുശ്രോണീ അസിതായത മൂർധജാ
97 സർവലക്ഷണസമ്പന്നാ വൈഡൂര്യ മണിസംനിഭാ
    പഞ്ചാനാം പുരുഷേന്ദ്രാണാം ചിത്തപ്രമഥിനീ രഹഃ
98 സിദ്ദിർ ധൃതിശ് ച യേ ദേവ്യൗ പഞ്ചാനാം മാതരൗ തു തേ
    കുന്തീ മാദ്രീ ച ജജ്ഞാതേ മതിസ് തു സുബലാത്മജാ
99 ഇതി ദേവാസുരാണാം തേ ഗന്ധർവാപ്സരസാം തഥാ
    അംശാവതരണം രാജൻ രക്ഷസാനാം ച കീർതിതം
100 യേ പൃഥിവ്യാം സമുദ്ഭൂതാ രാജാനോ യുദ്ധദുർമദാഃ
   മഹാത്മാനോ യദൂനാം ച യേ ജാതാ വിപുലേ കുലേ
101 ധന്യം യശസ്യം പുത്രീയം ആയുഷ്യം വിജയാവഹം
   ഇദം അംശാവതരണം ശ്രോതവ്യം അനസൂയതാ
102 അംശാവതരണം ശ്രുത്വാ ദേവഗന്ധർവരക്ഷസാം
   പ്രഭവാപ്യയവിത് പ്രാജ്ഞോ ന കൃച്ഛ്രേഷ്വ് അവസീദതി