മഹാഭാരതം മൂലം/ആദിപർവം/അധ്യായം79
| ←അധ്യായം78 | മഹാഭാരതം മൂലം/ആദിപർവം രചന: അധ്യായം 79 |
അധ്യായം80→ |
1 [വ്]
ജരാം പ്രാപ്യ യയാതിസ് തു സ്വപുരം പ്രാപ്യ ചൈവ ഹ
പുത്രം ജ്യേഷ്ഠം വരിഷ്ഠം ച യദും ഇത്യ് അബ്രവീദ് വചഃ
2 ജരാ വലീ ച മാം താത പലിതാനി ച പര്യഗുഃ
കാവ്യസ്യോശനസഃ ശാപാൻ ന ച തൃപ്തോ ഽസ്മി യൗവനേ
3 ത്വം യദോ പ്രതിപദ്യസ്വ പാപ്മാനം ജരയാ സഹ
യൗവനേന ത്വദീയേന ചരേയം വിഷയാൻ അഹം
4 പൂർണേ വർഷസഹസ്രേ തു പുനസ് തേ യൗവനം ത്വ് അഹം
ദത്ത്വാ സ്വം പ്രതിപത്സ്യാമി പാപ്മാനം ജരയാ സഹ
5 [യദു]
സിതശ്മശ്രുശിരാ ദീനോ ജരയാ ശിഥിലീ കൃതഃ
വലീ സന്തതഗാത്രശ് ച ദുർദർശോ ദുർബലഃ കൃശഃ
6 അശക്തഃ കാര്യകരണേ പരിഭൂതഃ സ യൗവനൈഃ
സഹോപജീവിഭിശ് ചൈവ താം ജരാം നാഭികാമയേ
7 [യ്]
യത് ത്വം മേ ഹൃദയാജ് ജാതോ വയഃ സ്വം ന പ്രയച്ഛസി
തസ്മാദ് അരാജ്യഭാക് താത പ്രജാ തേ വൈ ഭവിഷ്യതി
8 തുർവസോ പ്രതിപദ്യസ്വ പാപ്മാനം ജരയാ സഹ
യൗവനേന ചരേയം വൈ വിഷയാംസ് തവ പുത്രക
9 പൂർണേ വർഷസഹസ്രേ തു പുനർ ദാസ്യാമി യൗവനം
സ്വം ചൈവ പ്രതിപത്സ്യാമി പാപ്മാനം ജരയാ സഹ
10 [തു]
ന കാമയേ ജരാം താത കാമഭോഗ പ്രണാശിനീം
ബലരൂപാന്ത കരണീം ബുദ്ധിപ്രാണവിനാശിനീം
11 [യ്]
യത് ത്വം മേ ഹൃദയാജ് ജാതോ വയഃ സ്വം ന പ്രയച്ഛസി
തസ്മാത് പ്രജാ സമുച്ഛേദം തുർവസോ തവ യാസ്യതി
12 സങ്കീർണാചാര ധർമേഷു പ്രതിലോമ ചരേഷു ച
പിശിതാശിഷു ചാന്ത്യേഷു മൂഢ രാജാ ഭവിഷ്യസി
13 ഗുരു ദാരപ്രസക്തേഷു തിര്യഗ്യോനിഗതേഷു ച
പശുധർമിഷു പാപേഷു മ്ലേച്ഛേഷു പ്രഭവിഷ്യസി
14 [വ്]
ഏവം സ തുർവസം ശപ്ത്വാ യയാതിഃ സുതം ആത്മനഃ
ശർമിഷ്ഠായാഃ സുതം ദ്രുഹ്യും ഇദം വചനം അബ്രവീത്
15 ദ്രുഹ്യോ ത്വം പ്രതിപദ്യസ്വ വർണരൂപവിനാശിനീം
ജരാം വർഷസഹസ്രം മേ യൗവനം സ്വം ദദസ്വ ച
16 പൂർണേ വർഷസഹസ്രേ തു പ്രതിദാസ്യാമി യൗവനം
സ്വം ചാദാസ്യാമി ഭൂയോ ഽഹം പാപ്മാനം ജരയാ സഹ
17 [ദ്രു]
ന ഗജം ന രഥം നാശ്വം ജീർണോ ഭുങ്ക്തേ ന ച സ്ത്രിയം
വാഗ് ഭംഗശ് ചാസ്യ ഭവതി തജ് ജരാം നാഭികാമയേ
18 [യ്]
യത് ത്വം മേ ഹൃദയാജ് ജാതോ വയഃ സ്വം ന പ്രയച്ഛസി
തസ്മാദ് ദ്രുഹ്യോ പ്രിയഃ കാമോ ന തേ സമ്പത്സ്യതേ ക്വ ചിത്
19 ഉഡുപ പ്ലവ സന്താരോ യത്ര നിത്യം ഭവിഷ്യതി
അരാജാ ഭോജശംബ്ദം ത്വം തത്രാവാപ്സ്യസി സാന്വയഃ
20 അനോ ത്വം പ്രതിപദ്യസ്വ പാപ്മാനം ജരയാ സഹ
ഏകം വർഷസഹസ്രം തു ചരേയം യൗവനേന തേ
21 [ആനു]
ജീർണഃ ശിശുവദ് ആദത്തേ ഽകാലേ ഽന്നം അശുചിർ യഥാ
ന ജുഹോതി ച കാലേ ഽഗ്നിം താം ജരാം നാഭികാമയേ
22 [യ്]
യത് ത്വം മേ ഹൃദയാജ് ജാതോ വയഃ സ്വം ന പ്രയച്ഛസി
ജരാ ദോഷസ് ത്വയോക്തോ ഽയം തസ്മാത് ത്വം പ്രതിപത്സ്യസേ
23 പ്രജാശ് ച യൗവനപ്രാപ്താ വിനശിഷ്യന്ത്യ് അനോ തവ
അഗ്നിപ്രസ്കന്ദന പരസ് ത്വം ചാപ്യ് ഏവം ഭവിഷ്യസി
24 പുരോ ത്വം മേ പ്രിയഃ പുത്രസ് ത്വം വരീയാൻ ഭവിഷ്യസി
ജരാ വലീ ച മേ താത പലിതാനി ച പര്യഗുഃ
കാവ്യസ്യോശനസഃ ശാപാൻ ന ച തൃപ്തോ ഽസ്മി യൗവനേ
25 പുരോ ത്വം പ്രതിപദ്യസ്വ പാപ്മാനം ജരയാ സഹ
കം ചിത് കാലം ചരേയം വൈ വിഷയാൻ വയസാ തവ
26 പൂർണേ വർഷസഹസ്രേ തു പ്രതിദാസ്യാമി യൗവനം
സ്വം ചൈവ പ്രതിപത്സ്യാമി പാപ്മാനം ജരയാ സഹ
27 [വ്]
ഏവം ഉക്തഃ പ്രത്യുവാച പൂരുഃ പിതരം അഞ്ജസാ
യഥാത്ഥ മാം മഹാരാജ തത് കരിഷ്യാമി തേ വചഃ
28 പ്രതിപത്സ്യാമി തേ രാജൻ പാപ്മാനം ജരയാ സഹ
ഗൃഹാണ യൗവനം മത്തശ് ചര കാമാൻ യഥേപ്സിതാൻ
29 ജരയാഹം പ്രതിച്ഛന്നോ വയോ രൂപധരസ് തവ
യൗവനം ഭവതേ ദത്ത്വാ ചരിഷ്യാമി യഥാത്ഥ മാം
30 [യ്]
പൂരോ പ്രീതോ ഽസ്മി തേ വത്സ പ്രീതശ് ചേദം ദദാമി തേ
സർവകാമസമൃദ്ധാ തേ പ്രജാ രാജ്യേ ഭവിഷ്യതി