മഹാഭാരതം മൂലം/ആദിപർവം/അധ്യായം83
| ←അധ്യായം82 | മഹാഭാരതം മൂലം/ആദിപർവം രചന: അധ്യായം 83 |
അധ്യായം84→ |
1 [ഈന്ദ്ര]
സർവാണി കർമാണി സമാപ്യ രാജൻ; ഗൃഹാൻ പരിത്യജ്യ വനം ഗതോ ഽസി
തത് ത്വാം പൃച്ഛാമി നഹുഷസ്യ പുത്ര; കേനാസി തുല്യസ് തപസാ യയാതേ
2 [യ്]
നാഹം ദേവമനുഷ്യേഷു ന ഗന്ധർവമഹർഷിഷു
ആത്മനസ് തപസാ തുല്യം കം ചിത് പശ്യാമി വാസവ
3 [ഈ]
യദാവമംസ്ഥാഃ സദൃശഃ ശ്രേയസശ് ച; പാപീയസശ് ചാവിദിത പ്രഭാവഃ
തസ്മാൽ ലോകാ അന്തവന്തസ് തവേമേ; ക്ഷീണേ പുണ്യേ പതിതാസ്യ് അദ്യ രാജൻ
4 [യ്]
സുരർഷിഗന്ധർവനരാവമാനാത്; ക്ഷയം ഗതാ മേ യദി ശക്ര ലോകാഃ
ഇച്ഛേയം വൈ സുരലോകാദ് വിഹീനഃ; സതാം മധ്യേ പതിതും ദേവരാജ
5 [ഈ]
സതാം സകാശേ പതിതാസി രാജംശ്; ച്യുതഃ പ്രതിഷ്ഠാം യത്ര ലബ്ധാസി ഭൂയഃ
ഏവം വിദിത്വാ തു പുനർ യയാതേ; ന തേ ഽവമാന്യാഃ സദൃശഃ ശ്രേയസശ് ച
6 [വ്]
തതഃ പ്രഹായാമര രാജജുഷ്ടാൻ; പുണ്യാംൽ ലോകാൻ പതമാനം യയാതിം
സമ്പ്രേക്ഷ്യ രാജർഷിവരോ ഽഷ്ടകസ് തം; ഉവാച സദ് ധർമവിധാനഗോപ്താ
7 കസ് ത്വം യുവാ വാസവതുല്യരൂപഃ; സ്വതേജസാ ദീപ്യമാനോ യഥാഗ്നിഃ
പതസ്യ് ഉദീർണാംബുധരാന്ധ കാരാത് ഖാത്; ഖേചരാണാം പ്രവരോ യഥാർകഃ
8 ദൃഷ്ട്വാ ച ത്വാം സൂര്യപഥാത് പതന്തം; വൈശ്വാനരാർക ദ്യുതിം അപ്രമേയം
കിം നു സ്വിദ് ഏതത് പതതീതി സർവേ; വിതർകയന്തഃ പരിമോഹിതാഃ സ്മഃ
9 ദൃഷ്ട്വാ ച ത്വാം വിഷ്ഠിതം ദേവമാർഗേ; ശക്രാർക വിഷ്ണുപ്രതിമ പ്രഭാവം
അഭ്യുദ്ഗതാസ് ത്വാം വയം അദ്യ സർവേ; തത്ത്വം പാതേ തവ ജിജ്ഞാസമാനാഃ
10 ന ചാപി ത്വാം ധൃഷ്ണുമഃ പ്രഷ്ടും അഗ്രേ; ന ച ത്വം അസ്മാൻ പൃച്ഛസി യേ വയം സ്മഃ
തത് ത്വാം പൃച്ഛാമഃ സ്പൃഹണീയ രൂപം; കസ്യ ത്വം വാ കിംനിമിത്തം ത്വം ആഗാഃ
11 ഭയം തു തേ വ്യേതു വിഷാദമോഹൗ; ത്യജാശു ദേവേന്ദ്ര സമാനരൂപ
ത്വാം വർതമാനം ഹി സതാം സകാശേ; നാലം പ്രസോഢും ബലഹാപി ശക്രഃ
12 സന്തഃ പ്രതിഷ്ഠാ ഹി സുഖച്യുതാനാം; സതാം സദൈവാമര രാജകൽപ
തേ സംഗതാഃ സ്ഥവര ജംഗമേശാഃ; പ്രതിഷ്ഠിതസ് ത്വം സദൃശേഷു സത്സു
13 പ്രഭുർ അഗ്നിഃ പ്രതപനേ ഭൂമിർ ആവപനേ പ്രഭുഃ
പ്രഭുഃ സൂര്യഃ പ്രകാശിത്വേ സതാം ചാഭ്യാഗതഃ പ്രഭുഃ