മഹാഭാരതം മൂലം/ഉദ്യോഗപർവം/അധ്യായം159
| ←അധ്യായം158 | മഹാഭാരതം മൂലം/ഉദ്യോഗപർവം രചന: അധ്യായം159 |
അധ്യായം160→ |
1 [സ്]
ഉലൂകസ് ത്വ് അർജുനം ഭൂയോ യഥോക്തം വാക്യം അബ്രവീത്
ആശീവിഷം ഇവ ക്രുദ്ധം തുദൻ വാക്യശലാകയാ
2 തസ്യ തദ് വചനം ശ്രുത്വാ രുഷിതാഃ പാണ്ഡവാ ഭൃശം
പ്രാഗ് ഏവ ഭൃശസങ്ക്രുദ്ധാഃ കൈതവ്യേന പ്രധർഷിതാഃ
3 നാസനേഷ്വ് അവതിഷ്ഠന്ത ബഹൂംശ് ചൈവ വിചിക്ഷിപുഃ
ആശീവിഷാ ഇവ ക്രുദ്ധാ വീക്ഷാം ചക്രുഃ പരസ്പരം
4 അവാക്ശിരാ ഭീമസേനഃ സമുദൈക്ഷത കേശവം
നേത്രാഭ്യാം ലോഹിതാന്താഭ്യാം ആശീവിഷ ഇവ ശ്വസൻ
5 ആർതം വാതാത്മജം ദൃഷ്ട്വാ ക്രോധേനാഭിഹതം ഭൃശം
ഉത്സ്മയന്ന് ഇവ ദാശാർഹഃ കൈതവ്യം പ്രത്യഭാഷത
6 പ്രയാഹി ശീഘ്രം കൈതവ്യ ബ്രൂയാശ് ചൈവ സുയോധനം
ശ്രുതം വാക്യം ഗൃഹീതോ ഽർഥോ മതം യത് തേ തഥാസ്തു തത്
7 മദ്വചശ് ചാപി ഭൂയസ് തേ വക്തവ്യഃ സ സുയോധനഃ
ശ്വ ഇദാനീം പ്രദൃശ്യേഥാഃ പുരുഷോ ഭവ ദുർമതേ
8 മന്യസേ യച് ച മൂഢ ത്വം ന യോത്സ്യതി ജനാർദനഃ
സാരഥ്യേന വൃതഃ പാർഥൈർ ഇതി ത്വം ന ബിഭേഷി ച
9 ജഘന്യകാലം അപ്യ് ഏതദ് ഭവേദ് യത് സർവപാർഥിവാൻ
നിർദഹേയം അഹം ക്രോധാത് കൃണാനീവ ഹുതാശനഃ
10 യുധിഷ്ഠിര നിയോഗാത് തു ഫൽഗുനസ്യ മഹാത്മനഃ
കരിഷ്യേ യുധ്യമാനസ്യ സാരഥ്യം വിദിതാത്മനഃ
11 യദ്യ് ഉത്പതസി ലോകാംസ് ത്രീൻ യദ്യ് ആവിശസി ഭൂതലം
തത്ര തത്രാർജുന രഥം പ്രഭാതേ ദ്രക്ഷ്യസേ ഽഗ്രതഃ
12 യച് ചാപി ഭീമസേനസ്യ മന്യസേ മോഘഗർജിതം
ദുഃശാസനസ്യ രുധിരം പീതം ഇത്യ് അവധാര്യതാം
13 ന ത്വാം സമീക്ഷതേ പാർഥോ നാപി രാജാ യുധിഷ്ഠിരഃ
ന ഭീമസേനോ ന യമൗ പ്രതികൂലപ്രഭാഷിണം