മഹാഭാരതം മൂലം/ഉദ്യോഗപർവം/അധ്യായം169

മഹാഭാരതം മൂലം/ഉദ്യോഗപർവം
രചന:വ്യാസൻ
അധ്യായം169

1 [ഭീസ്മ]
     രോചമാനോ മഹാരാജ പാണ്ഡവാനാം മഹാരഥഃ
     യോത്സ്യതേ ഽമരവത് സംഖ്യേ പരസൈന്യേഷു ഭാരത
2 പുരുജിത് കുന്തിഭോജശ് ച മഹേഷ്വാസോ മഹാബലഃ
     മാതുലോ ഭീമസേനസ്യ സ ച മേ ഽതിരഥോ മതഃ
3 ഏഷ വീരോ മഹേഷ്വാസഃ കൃതീ ച നിപുണശ് ച ഹ
     ചിത്രയോധീ ച ശക്തശ് ച മതോ മേ രഥപുംഗവഃ
4 സ യോത്സ്യതി ഹി വിക്രമ്യ മഘവാൻ ഇവ ദാനവൈഃ
     യോധാശ് ചാസ്യ പരിഖ്യാതാഃ സർവേ യുദ്ധവിശാരദാഃ
5 ഭാഗിനേയ കൃതേ വീരഃ സ കരിഷ്യതി സംഗരേ
     സുമഹത് കർമ പാണ്ഡൂനാം സ്ഥിതഃ പ്രിയഹിതേ നൃപഃ
6 ഭൈമസേനിർ മഹാരാജ ഹൈഡിംബോ രാക്ഷസേശ്വരഃ
     മതോ മേ ബഹു മായാവീ രഥയൂഥപ യൂഥപഃ
7 യോത്സ്യതേ സമരേ താത മായാഭിഃ സമരപ്രിയഃ
     യേ ചാസ്യ രാക്ഷസാഃ ശൂരാഃ സചിവാ വശവർതിനഃ
8 ഏതേ ചാന്യേ ച ബഹവോ നാനാജനപദേശ്വരാഃ
     സമേതാഃ പാണ്ഡവസ്യാർഥേ വാസുദേവ പുരോഗമാഃ
9 ഏതേ പ്രാധാന്യതോ രാജൻ പാണ്ഡവസ്യ മഹാത്മനഃ
     രഥാശ് ചാതിരഥാശ് ചൈവ യേ ചാപ്യ് അർധരഥാ മതാഃ
10 നേഷ്യന്തി സമരേ സേനാം ഭീമാം യൗധിഷ്ഠിരീം നൃപ
    മഹേന്ദ്രേണേവ വീരേണ പാല്യമാനാം കിരീടിനാ
11 തൈർ അഹം സമരേ വീര ത്വാം ആയദ്ഭിർ ജയൈഷിഭിഃ
    യോത്സ്യാമി ജയം ആകാങ്ക്ഷന്ന് അഥ വാ നിധനം രണേ
12 പാർഥം ച വാസുദേവം ച ചക്രഗാണ്ഡീവധാരിണൗ
    സന്ധ്യാഗതാവ് ഇവാർകേന്ദൂ സമേഷ്യേ പുരുഷോത്തമൗ
13 യേ ചൈവ തേ രഥോദാരാഃ പാണ്ഡുപുത്രസ്യ സൈനികാഃ
    സഹ സൈന്യാൻ അഹം താംശ് ച പ്രതീയാം രണമൂർധനി
14 ഏതേ രഥാശ് ചാതിരഥാശ് ച തുഭ്യം; യഥാ പ്രധാനം നൃപ കീർതിതാ മയാ
    തഥാ രാജന്ന് അർധരഥാശ് ച കേ ചിത്; തഥൈവ തേഷാം അപി കൗരവേന്ദ്ര
15 അർജുനം വാസുദേവം ച യേ ചാന്യേ തത്ര പാർഥിവാഃ
    സർവാൻ ആവാരയിഷ്യാമി യാവദ് ദ്രക്ഷ്യാമി ഭാരത
16 പാഞ്ചാല്യം തു മഹാബാഹോ നാഹം ഹന്യാം ശിഖണ്ഡിനം
    ഉദ്യതേഷും അഭിപ്രേക്ഷ്യ പ്രതിയുധ്യന്തം ആഹവേ
17 ലോകസ് തദ് വേദ യദ് അഹം പിതുഃ പ്രിയചികീർഷയാ
    പ്രാപ്തം രാജ്യം പരിത്യജ്യ ബ്രഹ്മചര്യേ ധൃതവ്രതഃ
18 ചിത്രാംഗദം കൗരവാണാം അഹം രാജ്യേ ഽഭ്യഷേചയം
    വിചിത്രവീര്യം ച ശിശും യൗവരാജ്യേ ഽഭ്യഷേചയം
19 ദേവവ്രതത്വം വിഖ്യാപ്യ പൃഥിവ്യാം സർവരാജസു
    നൈവ ഹന്യാം സ്ത്രിയം ജാതു ന സ്ത്രീപൂർവം കഥം ചന
20 സ ഹി സ്ത്രീപൂർവകോ രാജഞ് ശിഖണ്ഡീ യദി തേ ശ്രുതഃ
    കന്യാ ഭൂത്വാ പുമാഞ് ജാതോ ന യോത്സ്യേ തേന ഭാരത
21 സർവാംസ് ത്വ് അന്യാൻ ഹനിഷ്യാമി പാർഥിവാൻ ഭരതർഷഭ
    യാൻ സമേഷ്യാമി സമരേ ന തു കുന്തീസുതാൻ നൃപ