മഹാഭാരതം മൂലം/ഉദ്യോഗപർവം/അധ്യായം24
| ←അധ്യായം23 | മഹാഭാരതം മൂലം/ഉദ്യോഗപർവം രചന: അധ്യായം24 |
അധ്യായം25→ |
1 [സമ്ജയ]
യഥാർഹസേ പാണ്ഡവ തത് തഥൈവ; കുരൂൻ കുരുശ്രേഷ്ഠ ജനം ച പൃച്ഛസി
അനാമയാസ് താത മനസ്വിനസ് തേ; കുരുശ്രേഷ്ഠാൻ പൃച്ഛസി പാർഥ യാംസ് ത്വം
2 സന്ത്യ് ഏവ വൃദ്ധാഃ സാധവോ ധാർതരാഷ്ട്രേ; സന്ത്യ് ഏവ പാപാഃ പാണ്ഡവ തസ്യ വിദ്ധി
ദദ്യാദ് രിപോശ് ചാപി ഹി ധാർതരാഷ്ട്രഃ; കുതോ ദായാംൽ ലോപയേദ് ബ്രാഹ്മണാനാം
3 യദ് യുഷ്മാകം വർതതേ ഽസൗ ന ധർമ്യം; അദ്രുഗ്ധേഷു ദ്രുഗ്ധവത് തൻ ന സാധു
മിത്ര ധ്രുക് സ്യാദ് ധൃതരാഷ്ട്രഃ സപുത്രോ; യുഷ്മാൻ ദ്വിഷൻ സാധു വൃതാൻ അസാധുഃ
4 ന ചാനുജാനാതി ഭൃശം ച തപ്യതേ; ശോചത്യ് അന്തഃ സ്ഥവിരോ ഽജാതശത്രോ
ശൃണോതി ഹി ബ്രാഹ്മണാനാം സമേത്യ; മിത്രദ്രോഹഃ പാതകേഭ്യോ ഗരീയാൻ
5 സ്മരന്തി തുഭ്യം നരദേവം സംഗമേ; യുദ്ധേ ച ജിഷ്ണോശ് ച യുധാം പ്രണേതുഃ
സമുത്കൃഷ്ടേ ദുന്ദുഭിശംഖശബ്ദേ; ഗദാപാണിം ഭീമസേനം സ്മരന്തി
6 മാദ്രീ സുതൗ ചാപി രണാജിമധ്യേ; സർവാ ദിശഃ സമ്പതന്തൗ സ്മരന്തി
സേനാം വർഷന്തൗ ശരവർഷൈർ അജസ്രം; മഹാരഥൗ സമരേ ദുഷ്പ്രകമ്പ്യൗ
7 ന ത്വ് ഏവ മന്യേ പുരുഷസ്യ രാജന്ന്; അനാഗതം ജ്ഞായതേ യദ് ഭവിഷ്യം
ത്വം ചേദ് ഇമം സർവധർമോപപന്നഃ; പ്രാപ്തഃ ക്ലേശം പാണ്ഡവ കൃച്ഛ്രരൂപം
8 ത്വം ഏവൈതത് സർവം അതശ് ച ഭൂയഃ; സമീകുര്യാഃ പ്രജ്ഞയാജാത ശത്രോ
ന കാമാർഥം സന്ത്യജേയുർ ഹി ധർമം; പാണ്ഡോഃ സുതാഃ സർവ ഏവേന്ദ്ര കൽപാഃ
9 ത്വം ഏവൈതത് പ്രജ്ഞയാജാത ശത്രോ; ശമം കുര്യാ യേന ശർമാപ്നുയുസ് തേ
ധാർതരാഷ്ട്രാഃ പാണ്ഡവാഃ സൃഞ്ജയാശ് ച; യേ ചാപ്യ് അന്യേ പാർഥിവാഃ സംനിവിഷ്ടാഃ
10 യൻ മാബ്രവീദ് ധൃതരാഷ്ട്രോ നിശായാം; അജാതശത്രോ വചനം പിതാ തേ
സഹാമാത്യഃ സഹ പുത്രശ് ച രാജൻ; സമേത്യ താം വാചം ഇമാം നിബോധ