മഹാഭാരതം മൂലം/ഉദ്യോഗപർവം/അധ്യായം55
| ←അധ്യായം54 | മഹാഭാരതം മൂലം/ഉദ്യോഗപർവം രചന: അധ്യായം55 |
അധ്യായം56→ |
1 [ദുർ]
അക്ഷൗഹിണീഃ സപ്ത ലബ്ധ്വാ രാജഭിഃ സഹ സഞ്ജയ
കിം സ്വിദ് ഇച്ഛതി കൗന്തേയോ യുദ്ധപ്രേപ്സുർ യുധിഷ്ഠിരഃ
2 അതീവ മുദിതോ രാജൻ യുദ്ധപ്രേപ്സുർ യുധിഷ്ഠിരഃ
ഭീമസേനാർജുനൗ ചോഭൗ യമാവ് അപി ന ബിഭ്യതഃ
3 രഥം തു ദിവ്യം കൗന്തേയഃ സർവാ വിഭ്രാജയൻ ദിശഃ
മന്ത്രം ജിജ്ഞാസമാനഃ സൻ ബീഭത്സുഃ സമയോജയത്
4 തം അപശ്യാമ സംനദ്ധം മേഘം വിദ്യുത്പ്രഭം യഥാ
സ മന്ത്രാൻ സമഭിധ്യായ ഹൃഷ്യമാണോ ഽഭ്യഭാഷത
5 പൂർവരൂപം ഇദം പശ്യ വയം ജേഷ്യാമ സഞ്ജയ
ബീഭത്സുർ മാം യഥോവാച തഥാവൈമ്യ് അഹം അപ്യ് ഉത
6 [ദുർ]
പ്രശംസസ്യ് അഭിനന്ദംസ് താൻ പാർഥാൻ അക്ഷപരാജിതാൻ
അർജുനസ്യ രഥേ ബ്രൂഹി കഥം അശ്വാഃ കഥം ധ്വജഃ
7 ഭൗവനഃ സഹ ശക്രേണ ബഹു ചിത്രം വിശാം പതേ
രൂപാണി കൽപയാം ആസ ത്വഷ്ടാ ധാത്രാ സഹാഭിഭോ
8 ധ്വജേ ഹി തസ്മിൻ രൂപാണി ചക്രുസ് തേ ദേവ മായയാ
മഹാധനാനി ദിവ്യാനി മഹാന്തി ച ലഘൂനി ച
9 സർവാ ദിശോ യോജനമാത്രം അന്തരം; സ തിര്യഗ് ഊർധ്വം ച രുരോധ വൈ ധ്വജഃ
ന സംസജ്ജേത് തരുഭിഃ സംവൃതോ ഽപി; തഥാ ഹി മായാവിഹിതാ ഭൗവനേന
10 യഥാകാശേ ശക്രധനുഃപ്രകാശതേ; ന ചൈകവർണം ന ച വിദ്മ കിം നു തത്
തഥാ ധ്വജോ വിഹിതോ ഭൗവനേന; ബഹ്വ് ആകാരം ദൃശ്യതേ രൂപം അസ്യ
11 യഥാഗ്നിധൂമോ ദിവം ഏതി രുദ്ധ്വാ; വർണാൻ ബിഭ്രത് തൈജസം തച് ഛരീരം
തഥാ ധ്വജോ വിഹിതോ ഭൗവനേന; ന ചേദ് ഭാരോ ഭവിതാ നോത രോധഃ
12 ശ്വേതാസ് തസ്മിൻ വാതവേഗാഃ സദശ്വാ; ദിവ്യാ യുക്താശ് ചിത്രരഥേന ദത്താഃ
ശതം യത് തത് പൂര്യതേ നിത്യകാലം; ഹതം ഹതം ദത്തവരം പുരസ്താത്
13 തഥാ രാജ്ഞോ ദന്തവർണാ ബൃഹന്തോ; രഥേ യുക്താ ഭാന്തി തദ് വീര്യതുല്യാഃ
ഋശ്യ പ്രഖ്യാ ഭീമസേനസ്യ വാഹാ; രണേ വായോസ് തുല്യവേഗാ ബഭൂവുഃ
14 കൽമാഷാംഗാസ് തിത്തിരി ചിത്രപൃഷ്ഠാ; ഭ്രാത്രാ ദത്താഃ പ്രീയതാ ഫൽഗുനേന
ഭ്രാതുർ വീരസ്യ സ്വൈസ് തുരംഗൈർ വിശിഷ്ടാ; മുദാ യുക്താഃ സഹദേവം വഹന്തി
15 മാദ്രീപുത്രം നകുലം ത്വ് ആജമീഢം; മഹേന്ദ്രദത്താ ഹരയോ വാജിമുഖ്യാഃ
സമാ വായോർ ബലവന്തസ് തരസ്വിനോ; വഹന്തി വീരം വൃത്ര ശത്രും യഥേന്ദ്രം
16 തുല്യാശ് ചൈഭിർ വയസാ വിക്രമേണ; ജവേന ചൈവാപ്രതിരൂപാഃ സദശ്വാഃ
സൗഭദ്രാദീൻ ദ്രൗപദേയാൻ കുമാരാൻ; വഹന്ത്യ് അശ്വാ ദേവദത്താ ബൃഹന്തഃ