മഹാഭാരതം മൂലം/ഭീഷ്മപർവം/അധ്യായം100

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം100

1 [സ്]
     അർജുനസ് തു നരവ്യാഘ്ര സുശർമപ്രമുഖാൻ നൃപാൻ
     അനയത് പ്രേതരാജസ്യ ഭവനം സായകൈഃ ശിതൈഃ
2 സുശർമാപി തതോ ബാണൈഃ പാർഥം വിവ്യാധ സംയുഗേ
     വാസുദേവം ച സപ്തത്യാ പാർഥം ച നവഭിഃ പുനഃ
3 താൻ നിവാര്യ ശരൗഘേണ ശക്രസൂനുർ മഹാരഥഃ
     സുശർമണോ രണേ യോധാൻ പ്രാഹിണോദ് യമസാദനം
4 തേ വധ്യമാനാഃ പാർഥേന കാലേനേവ യുഗക്ഷയേ
     വ്യദ്രവന്ത രണേ രാജൻ ഭയേ ജാതേ മഹാരഥാഃ
5 ഉത്സൃജ്യ തുരഗാൻ കേ ചിദ് രഥാൻ കേ ചിച് ച മാരിഷ
     ഗജാൻ അന്യേ സമുത്സൃജ്യ പ്രാദ്രവന്ത ദിശോ ദശ
6 അപരേ തുദ്യമാനാസ് തു വാജിനാര രഥാ രണാത്
     ത്വരയാ പരയാ യുക്താഃ പ്രാദ്രവന്ത വിശാം പതേ
7 പാദാതാശ് ചാപി ശസ്ത്രാണി സമുത്സൃജ്യ മഹാരണേ
     നിരപേക്ഷാ വ്യധാവന്ത തേന തേന സ്മ ഭാരത
8 വാര്യമാണാഃ സ്മ ബഹുശസ് ത്രൈഗർതേന സുശർമണാ
     തഥാന്യൈഃ പാർഥിവശ്രേഷ്ഠൈർ ന വ്യതിഷ്ഠന്ത സംയുഗേ
9 തദ് ബലം പ്രദ്രുതം ദൃഷ്ട്വാ പുത്രോ ദുര്യോധനസ് തവ
     പുരസ്കൃത്യ രണേ ഭീഷ്മം സർവസൈന്യപുരസ്കൃതം
10 സർവോദ്യോഗേന മഹതാ ധനഞ്ജയം ഉപാദ്രവത്
    ത്രിഗർതാധിപതേർ അർഥേ ജീവിതസ്യ വിശാം പതേ
11 സ ഏകഃ സമരേ തസ്ഥൗ കിരൻ ബഹുവിധാഞ് ശരാൻ
    ഭ്രാതൃഭിഃ സഹിതഃ സർവൈഃ ശേഷാ വിപ്രദ്രുതാ നരാഃ
12 തഥൈവ പണ്ഡവാ രാജൻ സർവോദ്യോഗേന ദംശിതാഃ
    പ്രയയുഃ ഫൽഗുനാർഥായ യത്ര ഭീഷ്മോ വ്യവസ്ഥിതഃ
13 ജാനന്തോ ഽപി രണേ ശൗര്യം ഘോരം ഗാണ്ഡീവധന്വനഃ
    ഹാഹാകാരകൃതോത്സാഹാ ഭീഷ്മം ജഗ്മുഃ സമന്തതഃ
14 തതസ് താലധ്വജഃ ശൂരഃ പാണ്ഡവാനാം അനീകിനീം
    ഛാദയാം ആസ സമരേ ശരൈഃ സംനതപർവഭിഃ
15 ഏകീഭൂതാസ് തതഃ സർവേ കുരവഃ പാണ്ഡവൈഃ സഹ
    അയുധ്യന്ത മഹാരാജ മധ്യം പ്രാപ്തേ ദിവാകരേ
16 സാത്യകിഃ കൃതവർമാണം വിദ്ധ്വാ പഞ്ചഭിർ ആയസൈഃ
    അതിഷ്ഠദ് ആഹവേ ശൂരഃ കിരൻ ബാണാൻ സഹസ്രശഃ
17 തഥൈവ ദ്രുപദോ രാജാ ദ്രോണം വിദ്ധ്വാ ശിതൈഃ ശരൈഃ
    പുനർ വിവ്യാധ സപ്തത്യാ സാരഥിം ചാസ്യ സപ്തഭിഃ
18 ഭീമസേനസ് തു രാജാനം ബാഹ്ലികം പ്രപിതാമഹം
    വിദ്ധ്വാനദൻ മഹാനാദം ശാർദൂല ഇവ കാനനേ
19 ആർജുനിശ് ചിത്രസേനേന വിദ്ധോ ബഹുഭിർ ആശുഗൈഃ
    ചിത്രസേനം ത്രിഭിർ ബാണൈർ വിവ്യാധ ഹൃദയേ ഭൃശം
20 സമാഗതൗ തൗ തു രണേ മഹാമാത്രൗ വ്യരോചതാം
    യഥാ ദിവി മഹാഘോരൗ രാജൻ ബുധ ശനൈശ്ചരൗ
21 തസ്യാശ്വാംശ് ചതുരോ ഹത്വാ സൂതം ച നവഭിഃ ശരൈഃ
    നനാദ ബലവൻ നാദം സൗഭദ്രഃ പരവീരഹാ
22 ഹതാശ്വാത് തു രഥാത് തൂർണം അവപ്ലുത്യ മഹാരഥഃ
    ആരുരോഹ രഥം തൂർണം ദുർമുഖസ്യ വിശാം പതേ
23 ദ്രോണശ് ച ദ്രുപദം വിദ്ധ്വാ ശരൈഃ സംനതപർവഭിഃ
    സാരഥിം ചാസ്യ വിവ്യാധ ത്വരമാണഃ പരാക്രമീ
24 പീഡ്യമാനസ് തതോ രാജാ ദ്രുപദോ വാഹിനീമുഖേ
    അപായാജ് ജവനൈർ അശ്വൈഃ പൂർവവൈരം അനുസ്മരൻ
25 ഭീമസേനസ് തു രാജാനം മുഹൂരാദ് ഇവ ബാഹ്ലികം
    വ്യശ്വ സൂത രഥം ചക്രേ സർവസൈന്യസ്യ പശ്യതഃ
26 സ സംഭ്രമോ മഹാരാജ സംശയം പരമം ഗതഃ
    അവപ്ലുത്യ തതോ വാഹാദ് ബാഹ്ലികഃ പുരുഷോത്തമഃ
    ആരുരോഹ രഥം തൂർണം ലക്ഷ്മണസ്യ മഹാരഥഃ
27 സാത്യകിഃ കൃതവർമാണം വാരയിത്വാ മഹാരഥഃ
    ശാരൈർ ബഹുവിധൈ രാജന്ന് ആസസാദ പിതാമഹം
28 സ വിദ്ധ്വാ ഭാരതം ഷഷ്ട്യാ നിശിതൈർ ലോമവാഹിഭിഃ
    നനർതേവ രഥോപസ്ഥേ വിധുന്വാനോ മഹദ് ധനുഃ
29 തസ്യായസീം മഹാശക്തിം ചിക്ഷേപാഥ പിതാമഹഃ
    ഹേമചിത്രാം മഹാവേഗാം നാഗകന്യോപമാം ശുഭാം
30 താം ആപതന്തീം സഹസാ മൃത്യുകൽപാം സുതേജനാം
    ധ്വംസയാം ആസ വാർഷ്ണേയോ ലാഘവേന മഹായശാഃ
31 അനാസാദ്യ തു വാർഷ്ണേയം ശക്തിഃ പരമദാരുണാ
    ന്യപതദ് ധരണീ പൃഷ്ഠേ മഹോൽകേവ ഗതപ്രഭാ
32 വാർഷ്ണേയസ് തു തതോ രാജൻ സ്വാം ശക്തിം ഘോരദർശനാം
    വേഗവദ് ഗൃഹ്യ ചിക്ഷേപ പിതാമഹ രഥം പ്രതി
33 വാർഷ്ണേയ ഭുജവേഗേന പ്രണുന്നാ സാ മഹാഹവേ
    അഭിദുദ്രാവ വേഗേന കാലരാത്രിർ യഥാ നരം
34 താം ആപതന്തീം സഹസാ ദ്വിധാ ചിച്ഛേദ ഭാരത
    ക്ഷുരപ്രാഭ്യാം സുതീക്ഷ്ണാഭ്യാം സാന്വകീര്യത ഭൂതലേ
35 ഛിത്ത്വാ തു ശക്തിം ഗാംഗേയഃ സാത്യകിം നവഭിഃ ശരൈഃ
    ആജഘാനോരസി ക്രുദ്ധഃ പ്രഹസഞ് ശത്രുകർശനഃ
36 തതഃ സരഥനാഗാശ്വാഃ പാണ്ഡവാഃ പാണ്ഡുപൂർവജ
    പരിവവ്രൂ രണേ ഭീഷ്മം മാധവത്രാണകാരണാത്
37 തതഃ പ്രവവൃതേ യുദ്ധം തുമുലം ലോമഹർഷണം
    പാണ്ഡവാനാം കുരൂണാം ച സമരേ വിജയൈഷിണാം