മഹാഭാരതം മൂലം/ഭീഷ്മപർവം/അധ്യായം18

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം18

1 [സ്]
     തതോ മുഹൂർതാത് തുമുലഃ ശബ്ദോ ഹൃദയകമ്പനഃ
     അശ്രൂയത മഹാരാജ യോധാനാം പ്രയുയുത്സതാം
2 ശംഖദുന്ദുഭിനിർഘോഷൈർ വാരണാനാം ച ബൃംഹിതൈഃ
     രഥാനാം നേമിഘോഷൈശ് ച ദീര്യതീവ വസുന്ധരാ
3 ഹയാനാം ഹേഷമാണാനാം യോധാനാം തത്ര ഗർജതാം
     ക്ഷണേന ഖം ദിശശ് ചൈവ ശബ്ദേനാപൂരിതം തദാ
4 പുത്രാണാം തവ ദുർധർഷേ പാണ്ഡവാനാം തഥൈവ ച
     സമകമ്പന്ത സൈന്യാനി പരസ്പരസമാഗമേ
5 തത്ര നാഗാ രഥാശ് ചൈവ ജാംബൂനദവിഭൂഷിതാഃ
     ഭ്രാജമാനാ വ്യദൃശ്യന്ത മേഘാ ഇവ സ വിദ്യുതഃ
6 ധ്വജാ ബഹുവിധാകാരാസ് താവകാനാം നരാധിപ
     കാഞ്ചനാംഗദിനോ രേജുർ ജ്വലിതാ ഇവ പാവകാഃ
7 സ്വേഷാം ചൈവ പരേഷാം ച സമദൃശ്യന്ത ഭാരത
     മഹേന്ദ്ര കേതവഃ ശുഭ്രാ മഹേന്ദ്ര സദനേഷ്വ് ഇവ
8 കാഞ്ചനൈഃ കവചൈർ വീരാ ജ്വലനാർകസമപ്രഭൈഃ
     സംനദ്ധാഃ പ്രത്യദൃശ്യന്ത ഗ്രഹാഃ പ്രജ്വലിതാ ഇവ
9 ഉദ്യതൈർ ആയുധൈശ് ചിത്രൈസ് തലബദ്ധാഃ പതാകിനഃ
     ഋഷഭാക്ഷാ മഹേഷ്വാസാശ് ചമൂമുഖഗതാ ബഭുഃ
10 പൃഷ്ഠഗോപാസ് തു ഭീഷ്മസ്യ പുത്രാസ് തവ നരാധിപ
    ദുഃശാസനോ ദുർവിഷഹോ ദുർമുഖോ ദുഃസഹസ് തഥാ
11 വിവിംശതിശ് ചിത്രസേനോ വികർണശ് ച മഹാരഥഃ
    സത്യവ്രതഃ പുരുമിത്രോ ജയോ ഭൂരിശ്രവാഃ ശലഃ
12 രഥാ വിംശതിസാഹസ്രാസ് തഥൈഷാം അനുയായിനഃ
    അഭീഷാഹാഃ ശൂരസേനാഃ ശിബയോ ഽഥ വസാതയഃ
13 ശാല്വാ മത്സ്യാസ് തഥാംബഷ്ഠാസ് ത്രിഗർതാഃ കേകയാസ് തഥാ
    സൗവീരാഃ കിതവാഃ പ്രാച്യാഃ പ്രതീച്യോദീച്യമാലവാഃ
14 ദ്വാദശൈതേ ജനപദാഃ സർവേ ശൂരാസ് തനുത്യജഃ
    മഹതാ രഥവംശേന തേ ഽഭ്യരക്ഷൻ പിതാമഹം
15 അനീകം ദശസാഹസ്രം കുഞ്ജരാണാം തരസ്വിനാം
    മാഘദോ യേന നൃപതിസ് തദ്രഥാനീകം അന്വയാത്
16 രഥാനാം ചക്രരക്ഷാശ് ച പാദപ്രക്ഷാശ് ച ദന്തിനാം
    അഭൂവൻ വാഹിനീമധ്യേ ശതാനാം അയുതാനി ഷട്
17 പാദാതാശ് ചാഗ്രതോ ഽഗച്ഛൻ ധനുശ് ചർമാസി പാണയഃ
    അനേകശതസാഹസ്രാ നഖരപ്രാസയോധിനഃ
18 അക്ഷൗഹിണ്യോ ദശൈകാ ച തവ പുത്രസ്യ ഭാരത
    അദൃശ്യന്ത മഹാരാജ ഗംഗേവ യമുനാന്തരേ