മഹാഭാരതം മൂലം/ഭീഷ്മപർവം/അധ്യായം64

മഹാഭാരതം മൂലം/ഭീഷ്മപർവം
രചന:വ്യാസൻ
അധ്യായം64

1 [ഭ്സ്]
     ശൃണു ചേദം മഹാരാജ ബ്രഹ്മഭൂതസ്തവം മമ
     ബ്രഹ്മർഷിഭിശ് ച ദേവൈശ് ച യഃ പുരാ കഥിതോ ഭുവി
2 സാധ്യാനാം അപി ദേവാനാം ദേവദേവേശ്വരഃ പ്രഭുഃ
     ലോകഭാവന ഭാവജ്ഞ ഇതി ത്വാം നാരദോ ഽബ്രവീത്
     ഭൂതം ഭവ്യം ഭവിഷ്യം ച മാർകണ്ഡേയോ ഽഭ്യുവാച ഹ
3 യജ്ഞാനാം ചൈവ യജ്ഞം ത്വാം തപശ് ച തപസാം അപി
     ദേവാനാം അപി ദേവം ച ത്വാം ആഹ ഭഗവാൻ ഭൃഗുഃ
     പുരാണേ ഭൈരവം രൂപം വിഷ്ണോ ഭൂതപതേ തി വൈ
4 വാസുദേവോ വസൂനാം ത്വം ശക്രം സ്ഥാപയിതാ തഥാ
     ദേവദേവോ ഽസി ദേവാനാം ഇതി ദ്വൈപായനോ ഽബ്രവീത്
5 പൂർവേ പ്രജാ നിസർഗേഷു ദക്ഷം ആഹുഃ പ്രജാപതിം
     സ്രഷ്ടാരം സർവഭൂതാനാം അംഗിരാസ് ത്വാം തതോ ഽബ്രവീത്
6 അവ്യക്തം തേ ശരീരോത്ഥം വ്യക്തം തേ മനസി സ്ഥിതം
     ദേവാ വാക് സംഭവാശ് ചേതി ദേവലസ് ത്വ് അസിതോ ഽബ്രവീത്
7 ശിരസാ തേ ദിവം വ്യാപ്തം ബാഹുഭ്യാം പൃഥിവീ ധൃതാ
     ജഠരം തേ ത്രയോ ലോകാഃ പുരുഷോ ഽസി സനാതനഃ
8 ഏവം ത്വാം അഭിജാനന്തി തപസാ ഭവിതാ നരാഃ
     ആത്മദർശനതൃപ്താനാം ഋഷീണാം ചാപി സത്തമഃ
9 രാജർഷീണാം ഉദാരാണാം ആഹവേഷ്വ് അനിവർതിനാം
     സർവധർമപ്രധാനാനാം ത്വം ഗതിർ മധുസൂദന
10 ഏഷ തേ വിസ്തരസ് താത സങ്ക്ഷേപശ് ച പ്രകീർതിതഃ
    കേശവസ്യ യഥാതത്ത്വം സുപ്രീതോ ഭവ കേശവേ
11 [സ്]
    പുണ്യം ശ്രുത്വൈതദ് ആഖ്യാനം മഹാരാജ സുതസ് തവ
    കേശവം ബഹു മേനേ സ പാണ്ഡവാംശ് ച മഹാരഥാൻ
12 തം അബ്രവീൻ മഹാരാജ ഭീഷ്മഃ ശാന്തനവഃ പുനഃ
    മാഹാത്മ്യം തേ ശ്രുതം രാജൻ കേശവസ്യ മഹാത്മനഃ
13 നരസ്യ ച യഥാതത്ത്വം യൻ മാം ത്വം പരിപൃച്ഛസി
    യദർഥം നൃഷു സംഭൂതൗ നരനാരായണാവ് ഉഭൗ
14 അവധ്യൗ ച യഥാ വീരൗ സംയുഗേഷ്വ് അപരാജിതൗ
    യഥാ ച പാണ്ഡവാ രാജന്ന് അഗമ്യാ യുധി കസ്യ ചിത്
15 പ്രീതിമാൻ ഹി ദൃഢം കൃഷ്ണഃ പാണ്ഡവേഷു യശസ്വിഷു
    തസ്മാദ് ബ്രവീമി രാജേന്ദ്ര ശമോ ഭവതു പാണ്ഡവൈഃ
16 പൃഥിവീം ഭുങ്ക്ഷ്വ സഹിതോ ഭ്രാതൃഭിർ ബലിഭിർ വശീ
    നരനാരായണൗ ദേവാവ് അവജ്ഞായ നശിഷ്യസി
17 ഏവം ഉക്ത്വാ തവ പിതാ തൂഷ്ണീം ആസീദ് വിശാം പതേ
    വ്യസർജയച് ച രാജാനം ശയനം ച വിവേശ ഹ
18 രാജാപി ശിബിരം പ്രായാത് പ്രണിപത്യ മഹാത്മനേ
    ശിശ്യേ ച ശയനേ ശുഭ്രേ താം രാത്രിം ഭരതർഷഭ