മഹാഭാരതം മൂലം/വനപർവം/അധ്യായം210

മഹാഭാരതം മൂലം/വനപർവം
രചന:വ്യാസൻ
അധ്യായം210

1 [മാർക്]
     കാശ്യപോ ഹ്യ് അഥ വാസിഷ്ഠഃ പ്രാണശ് ച പ്രാണപുത്രകഃ
     അഗ്നിർ ആംഗിരസശ് ചൈവ ച്യവനസ് ത്രിഷു വർചകഃ
2 അചരന്ത തപസ് തീവ്രം പുത്രാർഥേ ബഹു വാർഷികം
     പുത്രം ലഭേമ ധർമിഷ്ഠം യശസാ ബ്രഹ്മണാ സമം
3 മഹാവ്യാഹൃതിഭിർ ധ്യാതഃ പഞ്ചഭിസ് തൈസ് തദാ ത്വ് അഥ
     ജജ്ഞേ തേജോമയോ ഽർചിഷ്മാൻ പഞ്ച വർണഃ പ്രഭാവനഃ
4 സമിദ്ധോ ഽഗ്നിഃ ശിരസ് തസ്യ ബാഹൂ സൂര്യനിഭൗ തഥാ
     ത്വങ് നേത്രേ ച സുവർണാഭേ കൃഷ്ണേ ജംഘേ ച ഭാരത
5 പഞ്ച വർണഃ സ തപസാ കൃതസ് തൈഃ പഞ്ചഭിർ ജനൈഃ
     പാഞ്ചജന്യഃ ശ്രുതോ വേദേ പഞ്ച വംശകരസ് തു സഃ
6 ദശവർഷസഹസ്രാണി തപസ് തപ്ത്വാ മഹാതപാഃ
     ജനയത് പാവകം ഘോരം പിതൄണാം സ പ്രജാഃ സൃജൻ
7 ബൃഹദ്രഥന്തരം മൂർധ്നോ വക്ത്രാച് ച തരസാ ഹരൗ
     ശിവം നാഭ്യാം ബലാദ് ഇന്ദ്രം വായ്വഗ്നീ പ്രാണതോ ഽസൃജത്
8 ബാഹുഭ്യാം അനുദാത്തൗ ച വിശ്വേ ഭൂതാനി ചൈവ ഹ
     ഏതാൻ സൃഷ്ട്വാ തതഃ പഞ്ച പിതൄണാം അസൃജത് സുതാൻ
9 ബൃഹദൂർജസ്യ പ്രണിധിഃ കാശ്യപസ്യ ബൃഹത്തരഃ
     ഭാനുർ അംഗിരസോ വീരഃ പുത്രോ വർചസ്യ സൗഭരഃ
10 പ്രാണസ്യ ചാനുദാത്തശ് ച വ്യാഖ്യാതാഃ പഞ്ച വംശജാഃ
    ദേവാൻ യജ്ഞമുഷശ് ചാന്യാൻ സൃജൻ പഞ്ചദശോത്തരാൻ
11 അഭീമം അതിഭീമം ച ഭീമം ഭീമബലാബലം
    ഏതാൻ യജ്ഞമുഷഃ പഞ്ച ദേവാൻ അഭ്യസൃജത് തപഃ
12 സുമിത്രം മിത്രവന്തം ച മിത്രജ്ഞം മിത്രവർധനം
    മിത്ര ധർമാണം ഇത്യ് ഏതാൻ ദേവാൻ അഭ്യസൃജത് തപഃ
13 സുരപ്രവീരം വീരം ച സുകേശം ച സുവർചസം
    സുരാണാം അപി ഹന്താരം പഞ്ചൈതാൻ അസൃജത് തപഃ
14 ത്രിവിധം സംസ്ഥിതാ ഹ്യ് ഏതേ പഞ്ച പഞ്ച പൃഥക് പൃഥക്
    മുഷ്ണന്ത്യ് അത്ര സ്ഥിതാ ഹ്യ് ഏതേ സ്വർഗതോ യജ്ഞയാജിനഃ
15 തേഷാം ഇഷ്ടം ഹരന്ത്യ് ഏതേ നിഘ്നന്തി ച മഹദ് ഭുവി
    സ്പർധയാ ഹവ്യവാഹാനാം നിഘ്നന്ത്യ് ഏതേ ഹരന്തി ച
16 ഹവിർ വേദ്യാം തദ് ആദാനം കുശലൈഃ സമ്പ്രവർതിതം
    തദ് ഏതേ നോപസർപന്തി യത്ര ചാഗ്നിഃ സ്ഥിതോ ഭവേത്
17 ചിതോ ഽഗ്നിർ ഉദ്വഹൻ യജ്ഞം പക്ഷാഭ്യാം താൻ പ്രബാധതേ
    മന്ത്രൈഃ പ്രശമിതാ ഹ്യ് ഏതേ നേഷ്ടം മുഷ്ണന്തി യജ്ഞിയം
18 ബൃഹദുക്ഥ തപസ്യൈവ പുത്രോ ഭൂമിം ഉപാശ്രിതഃ
    അഗ്നിഹോത്രേ ഹൂയമാനേ പൃഥിവ്യാം സദ്ഭിർ ഇജ്യതേ
19 രഥന്തരശ് ച തപസഃ പുത്രാഗ്നിഃ പരിപഠ്യതേ
    മിത്ര വിന്ദായ വൈ തസ്യ ഹവിർ അധ്വര്യവോ വിദുഃ
    മുമുദേ പരമപ്രീതഃ സഹ പുത്രൈർ മഹായശാഃ