മഹാഭാരതം മൂലം/വനപർവം/അധ്യായം215

മഹാഭാരതം മൂലം/വനപർവം
രചന:വ്യാസൻ
അധ്യായം215

1 [മാർക്]
     ഋഷയസ് തു മഹാഘോരാൻ ദൃഷ്ട്വോത്പാതാൻ പൃഥഗ്വിധാൻ
     അകുർവഞ് ശാന്തിം ഉദ്വിഗ്നാ ലോകാനാം മോക ഭാവനാഃ
2 നിവസന്തി വനേ യേ തു തസ്മിംശ് ചൈത്രരഥേ ജനാഃ
     തേ ഽബ്രുവന്ന് ഏഷ നോ ഽനർഥഃ പാവകേനാഹൃതോ മഹാൻ
     സംഗമ്യ ഷഡ്ഭിഃ പത്നീഭിഃ സപ്തർഷീണാം ഇതി സ്മ ഹ
3 അപരേ ഗരുഡീം ആഹുസ് ത്വയാനർഥോ ഽയം ആഹൃതഃ
     യൈർ ദൃഷ്ടാ സാ തദാ ദേവീ തസ്യാ രൂപേണ ഗച്ഛതീ
     ന തു തത് സ്വാഹയാ കർമകൃതം ജാനാതി വൈ ജനഃ
4 സുപർണീ തു വചോ ശ്രുത്വാ മമായം തനയസ് ത്വ് ഇതി
     ഉപഗമ്യ ശനൈഃ സ്കന്ദം ആഹാഹം ജനനീ തവ
5 അഥ സപ്തർഷയഃ ശ്രുത്വാ ജാതം പുത്രം മഹൗജസം
     തത്യജുഃ ഷട് തദാ പത്നീർ വിനാ ദേവീം അരുന്ധതീം
6 ഷഡ്ഭിർ ഏവ തദാ ജാതം ആഹുസ് തദ് വനവാസിനഃ
     സപ്തർഷീൻ ആഹ ച സ്വാഹാ മമ പുത്രോ ഽയം ഇത്യ് ഉത
     അഹം ജാനേ നൈതദ് ഏവം ഇതി രാജൻ പുനഃ പുനഃ
7 വിശ്വാമിത്രസ് തു കൃത്വേഷ്ടിം സപ്തർഷീണാം മഹാമുനിഃ
     പാവകം കാമസന്തപ്തം അദൃഷ്ടഃ പൃഷ്ഠതോ ഽന്വഗാത്
     തത് തേന നിഖിലം സർവം അവബുദ്ധം യഥാതഥം
8 വിശ്വാമിത്രസ് തു പ്രഥമം കുമാരം ശരണം ഗതഃ
     സ്തവം ദിവ്യം സമ്പ്രചക്രേ മഹാസേനസ്യ ചാപി സഃ
9 മംഗലാനി ച സർവാണി കൗമാരാണി ത്രയോദശ
     ജാതകർമാദികാസ് തസ്യ ക്രിയാശ് ചക്രേ മഹാമുനിഃ
10 ഷഡ് വക്ത്രസ്യ തു മാഹാത്മ്യം കുക്കുടസ്യ ച സാധനം
    ശക്ത്യാ ദേവ്യാഃ സാധനം ച തഥാ പാരിഷദാം അപി
11 വിശ്വാമിത്രശ് ചകാരൈതത് കർമ ലോകഹിതായ വൈ
    തസ്മാദ് ഋഷിഃ കുമാരസ്യ വിശ്വാമിത്രാഭവത് പ്രിയഃ
12 അന്വജാനാച് ച സ്വാഹായാ രൂപാന്യത്വം മഹാമുനിഃ
    അബ്രവീച് ച മുനീ സർവാൻ നാപരാധ്യന്തി വൈ സ്ത്രിയഃ
    ശ്രുത്വാ തു തത്ത്വതസ് തസ്മാത് തേ പത്നീഃ സർവതോ ഽത്യജൻ
13 സ്കന്ദം ശ്രുത്വാ തതോ ദേവാ വാസവം സഹിതാബ്രുവൻ
    അവിഷഹ്യ ബലം സ്കന്ദം ജഹി ശക്രാശു മാചിരം
14 യദി വാ ന നിഹൻസ്യ് ഏനം അദ്യേന്ദ്രോ ഽയം ഭവിഷ്യതി
    ത്രൈലോക്യം സംനിഗൃഹ്യാസ്മാംസ് ത്വാം ച ശക്ര മഹാബലഃ
15 സ താൻ ഉവാച വ്യഥിതോ ബാലോ ഽയം സുമഹാബലഃ
    സ്രഷ്ടാരം അപി ലോകാനാം യുധി വിക്രമ്യ നാശയേത്
16 സർവാസ് ത്വയാഭിഗച്ഛന്തു സ്കന്ദം ലോകസ്യ മാതരഃ
    കാമവീര്യാ ഘ്നന്തു ചൈനം തഥേത്യ് ഉക്ത്വാ ച താ യയുഃ
17 തം അപ്രതിബലം ദൃഷ്ട്വാ വിഷണ്ണവനദാസ് തു താഃ
    അശക്യോ ഽയം വിചിന്ത്യൈവം തം ഏവ ശരണം യയുഃ
18 ഊചുശ് ചാപി ത്വം അസ്മാകം പുത്രാസ്മാഭിർ ധൃതം ജഗത്
    അഭിനന്ദസ്വ നഃ സർവാഃ പ്രസ്നുതാഃ സ്നേഹവിക്ലവാഃ
19 താഃ സമ്പൂജ്യ മഹാസേനഃ കാമാംശ് ചാസാം പ്രദായ സഃ
    അപശ്യദ് അഗ്നിം ആയാന്തം പിതരം ബലിനാം ബലീ
20 സ തു സമ്പൂജിതസ് തേന സഹ മാതൃഗണേന ഹ
    പരിവാര്യ മഹാസേനം രക്ഷമാണഃ സ്ഥിതഃ സ്ഥിരം
21 സർവാസാം യാ തു മാതൄണാം നാരീ ക്രോധസമുദ്ഭവാ
    ധാത്രീ സാ പുത്രവത് സ്കന്ദം ശൂലഹസ്താഭ്യരക്ഷത
22 ലോഹിതസ്യോദധേഃ കന്യാ ക്രൂരാ ലോഹിതഭോജനാ
    പരിഷ്വജ്യ മഹാസേനം പുത്രവത് പര്യരക്ഷത
23 അഗ്നിർ ഭൂത്വാ നൈഗമേയശ് ഛാഗ വക്ത്രോ ബഹു പ്രജഃ
    രമയാം ആസ ശൈലസ്ഥം ബാലം ക്രീഡനകൈർ ഇവ