മഹാഭാരതം മൂലം/വനപർവം/അധ്യായം216
| ←അധ്യായം215 | മഹാഭാരതം മൂലം/വനപർവം രചന: അധ്യായം216 |
അധ്യായം217→ |
1 [മാർക്]
ഗ്രഹാഃ സോപഗ്രഹാശ് ചൈവ ഋഷയോ മാതരസ് തഥാ
ഹുതാശനമുഖാശ് ചാപി ദീപ്താഃ പാരിഷദാം ഗണാഃ
2 ഏതേ ചാന്യേ ച ബഹവോ ഘോരാസ് ത്രിദിവവാസിനഃ
പരിവാര്യ മഹാസേനം സ്ഥിതാ മാതൃഗണൈഃ സഹ
3 സന്ദിഗ്ധം വിജയം ദൃഷ്ട്വാ വിജയേപ്സുഃ സുരേശ്വരഃ
ആരുഹ്യൈരാവത സ്കന്ധം പ്രയയൗ ദൈവതൈഃ സഹ
വിജിഘാംസുർ മഹാസേനം ഇന്ദ്രസ് തൂർണതരം യയൗ
4 ഉഗ്രം തച് ച മഹാവേഗം ദേവാനീകം മഹാപ്രഭം
വിചിത്രധ്വജസംനാഹം നാനാ വാഹന കാർമുകം
പ്രവരാംബര സംവീതം ശ്രിയാ ജുഷ്ടം അലങ്കൃതം
5 വിജിഘാംസും തദ് ആയാന്തം കുമാരഃ ശക്രം അഭ്യയാത്
വിനദൻ പഥി ശക്രസ് തു ദ്രുതം യാതി മഹാബലഃ
സംഹർഷയൻ ദേവസേനാം ജിഘാംസുഃ പാവകാത്മജം
6 സമ്പൂജ്യമാനസ് ത്രിദശൈസ് തഥൈവ പരമർഷിഭിഃ
സമീപം ഉപസമ്പ്രാപ്തഃ കാർത്തികേയസ്യ വാസവഃ
7 സിംഹനാദം തതശ് ചക്രേ ദേവേശഃ സഹിതഃ സുരൈഃ
ഗുഹോ ഽപി ശബ്ദം തം ശ്രുത്വാ വ്യനദത് സാഗരോ യഥാ
8 തസ്യ ശബ്ദേന മഹതാ സമുദ്ധൂതോദധി പ്രഭം
ബഭ്രാമ തത്ര തത്രൈവ ദേവസൈന്യം അചേതനം
9 ജിഘാംസൂൻ ഉപസമ്പ്രാപ്താൻ ദേവാൻ ദൃഷ്ട്വാ സ പാവകിഃ
വിസസർജ മുഖാത് ക്രുദ്ധഃ പ്രവൃദ്ധാഃ പാവകാർചിഷഃ
താ ദേവസൈന്യാന്യ് അദഹൻ വേഷ്ടമാനാനി ഭൂതലേ
10 തേ പ്രദീപ്തശിരോ ദേഹാഃ പ്രദീപ്തായുധ വാഹനാഃ
പ്രച്യുതാഃ സഹസാ ഭാന്തി ചിത്രാസ് താരാഗണാ ഇവ
11 ദഹ്യമാനാഃ പ്രപന്നാസ് തേ ശരണം പാവകാത്മജം
ദേവാ വജ്രധരം ത്യക്ത്വാ തതഃ ശാന്തിം ഉപാഗതാഃ
12 ത്യക്തോ ദേവൈസ് തതഃ സ്കന്ദേ വജ്രം ശക്രാഭ്യവാസൃജത്
തദ് വിസൃഷ്ടം ജഘാനാശു പാർശ്വം സ്കന്ദസ്യ ദക്ഷിണം
ബിഭേദ ച മഹാരാജ പാർശ്വം തസ്യ മഹാത്മനഃ
13 വജ്രപ്രഹാരാത് സ്കന്ദസ്യ സഞ്ജാതഃ പുരുഷോ ഽപരഃ
യുവാ കാഞ്ചനസംനാഹഃ ശക്തിധൃഗ് ദിവ്യകുണ്ഡലഃ
യദ് വജ്രവിശനാജ് ജാതോ വിശാഖസ് തേന സോ ഽഭവത്
14 തം ജാതം അപരം ദൃഷ്ട്വാ കാലാനലസമദ്യുതിം
ഭയാദ് ഇന്ദ്രസ് തതഃ സ്കന്ദം പ്രാഞ്ജലിഃ ശരണം ഗതഃ
15 തസ്യാഭയം ദദൗ സ്കന്ദഃ സഹ സൈന്യസ്യ സത്തമ
തതഃ പ്രഹൃഷ്ടാസ് ത്രിദശാ വാദിത്രാണ്യ് അഭ്യവാദയൻ