മഹാഭാരതം മൂലം/വനപർവം/അധ്യായം249
| ←അധ്യായം248 | മഹാഭാരതം മൂലം/വനപർവം രചന: അധ്യായം249 |
അധ്യായം250→ |
1 [കോടി]
കാ ത്വം കദംബസ്യ വിനമ്യ ശാഖാം; ഏകാശ്രമേ തിഷ്ഠസി ശോഭമാനാ
ദേദീപ്യമാനാഗ്നിശിഖേവ നക്തം; ദോധൂയമാനാ പവനേന സുഭ്രൂഃ
2 അതീവ രൂപേണ സമന്വിതാ ത്വം; ന ചാപ്യ് അരണ്യേഷു ബിഭേഷി കിം നു
ദേവീ നു യക്ഷീ യദി ദാനവീ വാ; വരാപ്സരാ ദൈത്യ വരാംഗനാ വാ
3 വപുഷ്മതീ വോരഗ രാജകന്യാ; വനേചരീ വാ ക്ഷണദാചര സ്ത്രീ
യദ്യ് ഏവ രാജ്ഞോ വരുണസ്യ പത്നീ; യമസ്യ സോമസ്യ ധനേശ്വരസ്യ
4 ധാതുർ വിധാതുഃ സവിതുർ വിഭോർ വാ; ശക്രസ്യ വാ ത്വം സദനാത് പ്രപന്നാ
ന ഹ്യ് ഏവ നഃ പൃച്ഛസി യേ വയം സ്മ; ന ചാപി ജാനീമ തവേഹ നാഥം
5 വയം ഹി മാനം തവ വർധയന്തഃ; പൃച്ഛാമ ഭദ്രേ പ്രഭവം പ്രഭും ച
ആചക്ഷ്വ ബന്ധൂംശ് ച പതിം കുലം ച; തത്ത്വേന യച് ചേഹ കരോഷി കാര്യം
6 അഹം തു രാജ്ഞഃ സുരഥസ്യ പുത്രോ; യം കോടികാശ്യേതി വിദുർ മനുഷ്യാഃ
അസൗ തു യസ് തിഷ്ഠതി കാഞ്ചനാംഗേ; രഥേ ഹുതോ ഽഗ്നിശ് ചയനേ യഥൈവ
ത്രിഗർതരാജഃ കമലായതാക്ഷി; ക്ഷേമങ്കരോ നാമ സ ഏഷ വീരഃ
7 അസ്മാത് പരസ് ത്വ് ഏഷ മഹാധനുഷ്മാൻ; പുത്രഃ കുണിന്ദാധിപതേർ വരിഷ്ഠഃ
നിരീക്ഷതേ ത്വാം വിപുലായതാംസഃ; സുവിസ്മിതഃ പർവതവാസനിത്യഃ
8 അസൗ തു യഃ പുഷ്കരിണീ സമീപേ; ശ്യാമോ യുവാ തിഷ്ഠതി ദർശനീയഃ
ഇക്ഷ്വാകുരാജ്ഞഃ സുബലസ്യ പുത്രഃ; സ ഏഷ ഹന്താ ദ്വിഷതാം സുഗാത്രി
9 യസ്യാനുയാത്രം ധ്വജിനഃ പ്രയാന്തി; സൗവീരകാ ദ്വാദശ രാജപുത്രാഃ
ശോണാശ്വയുക്തേഷു രഥേഷു സർവേ; മഖേഷു ദീപ്താ ഇവ ഹവ്യവാഹാഃ
10 അംഗാരകഃ കുഞ്ജരഗുപ്തകശ് ച; ശത്രുഞ്ജയഃ സഞ്ജയ സുപ്രവൃദ്ധൗ
പ്രഭങ്കരോ ഽഥ ഭ്രമരോ രവിശ് ച; ശൂരഃ പ്രതാപഃ കുഹരശ് ച നാമ
11 യം ഷട് സഹസ്രാ രഥിനോ ഽനുയാന്തി; നാഗാ ഹയാശ് ചൈവ പദാതിനശ് ച
ജയദ്രഥോ നാമ യദി ശ്രുതസ് തേ; സൗവീരരാജഃ സുഭഗേ സ ഏഷഃ
12 തസ്യാപരേ ഭ്രാതരോ ഽദീനസത്ത്വാ; ബലാഹകാനീക വിദാരണാധ്യാഃ
സൗവീരവീരാഃ പ്രവരാ യുവാനോ; രാജാനം ഏതേ ബലിനോ ഽനുയാന്തി
13 ഏതൈഃ സഹായൈർ ഉപയാതി രാജാ; മരുദ്ഗണൈർ ഇന്ദ്ര ഇവാഭിഗുപ്തഃ
അജാനതാം ഖ്യാപയ നഃ സുകേശി; കസ്യാസി ഭാര്യാ ദുഹിതാ ച കസ്യ