മഹാഭാരതം മൂലം/വനപർവം/അധ്യായം286

മഹാഭാരതം മൂലം/വനപർവം
രചന:വ്യാസൻ
അധ്യായം286

1 [കർണ]
     ഭഗവന്തം അഹം ഭക്തോ യഥാ മാം വേത്ഥ ഗോപതേ
     തഥാ പരമതിഗ്മാംശോ നാന്യം ദേവം കഥം ചന
2 ന മേ ദാരാ ന മേ പുത്രാ ന ചാത്മാ സുഹൃദോ ന ച
     തഥേഷ്ടാ വൈ സദാ ഭക്ത്യാ യഥാ ത്വം ഗോപതേ മമ
3 ഇഷ്ടാനാം ച മഹാത്മാനോ ഭക്താനാം ച ന സംശയഃ
     കുർവന്തി ഭക്തിം ഇഷ്ടാം ച ജാനീഷേ ത്വം ച ഭാസ്കര
4 ഇഷ്ടോ ഭക്തിശ് ച മേ കർണോ ന ചാന്യദ് ദൈവതം ദിവി
     ജാനീത ഇതി വൈ കൃത്വാ ഭഗവാൻ ആഹ മദ് ധിതം
5 ഭൂയോ ച ശിരസാ യാചേ പ്രസാദ്യ ച പുനഃ പുനഃ
     ഇതി ബ്രവീമി തിഗ്മാംശോ ത്വം തു മേ ക്ഷന്തും അർഹസി
6 ബിഭേമി ന തഥാ മൃത്യോർ യഥാ ബിഭ്യേ ഽനൃതാദ് അഹം
     വിശേഷേണ ദ്വിജാതീനാം സർവേഷാം സർവദാ സതാം
     പ്രദാനേ ജിവിതസ്യാപി ന മേ ഽത്രാസ്തി വിചാരണാ
7 യച് ച മാം ആത്ഥ ദേവ ത്വം പാണ്ഡവം ഫൽഗുനം പ്രതി
     വ്യേതു സന്താപജം ദുഃഖം തവ ഭാസ്കരമാനസം
     അർജുനം പ്രതി മാം ചൈവ വിജേഷ്യാമി രണേ ഽർജുനം
8 തവാപി വിദിതം ദേവ മമാപ്യ് അസ്ത്രബലം മഹത്
     ജാമദഗ്ന്യാദ് ഉപാത്തം യത് തഥാ ദ്രോണാൻ മഹാത്മനഃ
9 ഇദം ത്വം അനുജാനീഹി സുരശ്രേഷ്ഠ വ്രതം മമ
     ഭിക്ഷതേ വജ്രിണേ ദദ്യാം അപി ജീവിതം ആത്മനഃ
10 [സൂര്യ]
    യദി താത ദദാസ്യ് ഏതേ വജ്രിണേ കുണ്ഡലേ ശുഭേ
    ത്വം അപ്യ് ഏനം അഥോ ബ്രൂയാ വിജയാർഥം മഹാബല
11 നിയമേന പ്രദദ്യാസ് ത്വം കുണ്ഡലേ വൈ ശതക്രതോഃ
    അവധ്യോ ഹ്യ് അസി ഭൂതാനാം കുണ്ഡലാഭ്യാം സമന്വിതഃ
12 അർജുനേന വിനാശം ഹി തവ ദാനവ സൂദനഃ
    പ്രാർഥയാനോ രണേ വത്സ കുണ്ഡലേ തേ ജിഹീർഷതി
13 സ ത്വം അപ്യ് ഏനം ആരാധ്യ സൂനൃതാഭിഃ പുനഃ പുനഃ
    അഭ്യർഥയേഥാ ദേവേശം അമോഘാർഥം പുരന്ദരം
14 അമോഘാം ദേഹി മേ ശക്തിം അമിത്രവിനിബർഹിണീം
    ദാസ്യാമി തേ സഹസ്രാക്ഷ കുണ്ഡലേ വർമ ചോത്തമം
15 ഇത്യ് ഏവം നിയമേന ത്വം ദദ്യാഃ ശക്രായ കുണ്ഡലേ
    തയാ ത്വം കർണ സംഗ്രാമേ ഹനിഷ്യസി രണേ രിപൂൻ
16 നാഹത്വാ ഹി മഹാബാഹോ ശത്രൂൻ ഏതി കരം പുനഃ
    സാ ശക്തിർ ദേവരാജസ്യ ശതശോ ഽഥ സഹസ്രശഃ
17 [വൈ]
    ഏവം ഉക്ത്വാ സഹസ്രാംശുഃ സഹസാന്തരധീയത
    തതഃ സൂര്യായ ജപ്യാന്തേ കർണഃ സ്വപ്നം ന്യവേദയത്
18 യഥാദൃഷ്ടം യഥാതത്ത്വം യഥോക്തം ഉഭയോർ നിശി
    തത് സർവം ആനുപൂർവ്യേണ ശശംസാസ്മൈ വൃഷസ് തദാ
19 തച് ഛ്രുത്വാ ഭഗവാൻ ദേവോ ഭാനുഃ സ്വർഭാനു സൂദനഃ
    ഉവാച തം തഥേത്യ് ഏവ കർണം സൂര്യഃ സ്മയന്ന് ഇവ
20 തതസ് തത്ത്വം ഇതി ജ്ഞാത്വാ രാധേയഃ പരവീരഹാ
    ശക്തിം ഏവാഭികാങ്ക്ഷൻ വൈ വാസവം പ്രത്യപാലയത്